Read Hmong Njua 1 Xwmtxheej Vaajntxwv 5 Bible Online

1 Xwmtxheej Vaajntxwv 5 - Hmong Njua bible

1 Xwmtxheej Vaajntxwv 5

¹Ntawm nuav yog Yakhauj tug tub hlub Lunpees cov xeebntxwv. (Vim nwg tau ntxag nwg txiv tug nam yau, nwg txhaj poob lub meejmom kws yog tug tub hlub lawm, hab muab lub meejmom ua tij ntawd rua nwg tug kwv Yauxej cov tub kws yog Yakhauj cov xeebntxwv, txawm le ntawd los Yauxej yeej tsi muaj npe nyob huv Lunpees caajceg le.

²Xeem Yudas dlhau moog ua cov kws muaj fwjchim tshaaj hab muaj ib tug moog ua tau tug thawjcoj kaav taagnrho txhua xeem huv tuabsi.)

³Yakhauj tug tub hlub Lunpees muaj plaub tug tub: Hanauj yog tug tub hlub, Palus, Hexeloos hab Kalemis.

⁴Yau-ees cov xeebntxwv: Semayas yog Yau-ees tub, Nkaus yog Semayas tub, Sime-is yog Nkaus tub,

⁵Mikas yog Sime-is tub, Le-ayas yog Mikas tub, Npa-aas yog Le-ayas tub,

⁶Npe-elas yog Npa-aas tub, Npe-elas yog xeem Lunpees tug thawjcoj, hab Vaajntxwv Tikelas Pilexes kws kaav lub tebchaws Xilias nteg Npe-elas moog lawm.

⁷Luas teev xeem Lunpees tej tsev tuabneeg lawv le cov thawjcoj ntawm tej cuab kwvtij le nraag nuav: Ye-iyees, Xakaliyas,

⁸hab Npelas kws yog Axaxes tub hab yog Semas tug xeebntxwv kws yog Yau-ees caajceg. Puab cov nuav puavleej nyob huv cheebtsaam Alau-es moog rua peg Nenpaus hab Npa-aas Me-oos.

⁹Saab nubtuaj puab nyob moog txug ndlua ntawm ntug taj suabpuam ntawm tug dlej Efalates saab tim nuav, vim puab muaj tsaj txhu coob heev nyob huv tebchaws Nkile-as.

¹⁰Hab lub sijhawm kws Vaajntxwv Xa-ules kaav tebchaws, xeem Lunpees moog tua cov tuabneeg Hankelis hab muab puab tua tuag taag rua huv tshaav rog, hab kaav taagnrho puab lub tebchaws txij ndlua ntawm Nkile-as saab nubtuaj moog lawm.

¹¹Xeem Khas nyob ntawm lub xeev Npasaas txuas nkaus ntawm xeem Lunpees hauv ntej moog txug ndlua rua ntawm lub nroog Salekas.

¹²Yau-ees yog tug thawj, Safaas yog tug ob. Yanais hab Safas yog ob tug kws nyob huv Npasaas.

¹³Hab teev tej cuab kwvtij lawv le puab tej yawmkoob tsev tuabneeg muaj le nraag nuav: Mikhayees, Mesulas, Senpas, Yaulais, Yakaas, Xias hab Enpes, taagnrho huv tuabsi yog xyaa cuab kwvtij.

¹⁴Puab puavleej yog Hulis tug tub Anpihais cov xeebntxwv, yog taug ntawm puab yawmkoob lug, mas muaj lawv le nraag nuav: Anpihais, Hulis, Yalau-as, Nkile-as, Mikhayees, Yesisais, Yadaus, Npuxes,

¹⁵Ahis kws yog Adiyees tub hab yog Nkunis tug xeebntxwv, nwg yog tug thawjcoj ntawm puab tej cuab kwvtij,

¹⁶Puab nyob huv xeev Nkile-as hab Npasaas, huv tej zog ntawd hab nyob thoob plawg tej chaw kws muaj tshaav zaub huv lub tebchaws Saloos.

¹⁷(Lub sijhawm kws teev tej npe nuav ca, yog thaus Vaajntxwv Yauthaas kaav tebchaws Yudas hab Vaajntxwv Yelaunpau-aas kaav tebchaws Yixalayees.)

¹⁸Xeem Lunpees, xeem Khas hab xeem Manaxes Saab Nubtuaj, muaj plaub caug plaub txheeb xyaa pua rau caum leej tubrog kws txawj siv dlaim thaiv nav ntaaj, txawj tua ntaaj hab tua neevnti.

¹⁹Puab txhaj moog ua rog rua cov tuabneeg Hankelis, cov Yetus, cov Nafis hab cov Naudas;

²⁰Puab tso sab plhuav rua Vaajtswv hab thov nwg paab puab, Vaajtswv txhaj teb puab tej lug thov hab paab puab tua yeej cov Hankelis hab cov kws tuaj cov Hankelis tog.

²¹Puab nteg tau yeebncuab cov ntxhuav tsib caug txheeb tug, cov yaaj ob puas tsib caug txheeb tug, hab cov neeg luav ob txheeb tug hab nteg tau yeebncuab ib puas txheeb leej huv tshaav rog coj lug kaw.

²²Puab tua cov yeebncuab tuag coob kawg le, rua qhov kev ua rog zag nuav hum Vaajtswv sab. Hab puab nyob huv lub tebchaws ntawd moog txug thaus kws puab raug luas nteg moog lawm.

²³Cov Manaxes kws nyob Saab Nubtuaj fuamvaam coob kawg le, puab nyob puv nkaus huv Npasaas moog txug ndlua saab qaumteb peg Npa-aas Hemoos, Senis hab ntawm lub Roob Helemoos.

²⁴Ntawm nuav moog yog has txug cov thawjcoj ntawm tej cuab: Efes Isis, Eliyees, Axeliyees, Yelemis, Haudaviyas hab Yadiyees. Puab puavleej yog cov thawj tubrog kws muaj koob muaj meej nto moo lug, hab txawj ntse ua taug thawjcoj ntawm puab tej cuab kwvtij.

²⁵Tabsis puab ua tsi ncaaj rua puab cov yawmkoob tug Vaajtswv hab muab nwg tso tseg, puab moog pehawm tej tsaav tuabneeg kws Vaajtswv muab ntab tawm huv puab lub tebchaws moog lawm tej vaajtswv.

²⁶Yog le ntawd Vaajtswv txhaj tshoov cov Axilias tug Vaajntxwv Pules (kws muaj dlua ib lub npe hu ua Tikelas Pilexes) sab, kuas tuaj tua puab lub tebchaws. Nwg txhaj tuaj nteg xeem Lunpees, xeem Khas, hab xeem Manaxes Saab Nubtuaj hab coj puab moog nyob rua ntawm Halahes, Hanpaus, Halaas, hab nyob ntawm tug dlej Nkaxas lug txug naj nub nua.