Read Hmong Njua 2 Xwmtxheej Vaajntxwv 1 Bible Online

2 Xwmtxheej Vaajntxwv 1 - Hmong Njua bible

2 Xwmtxheej Vaajntxwv 1

¹Xalumoos kws yog Vaajntxwv Daviv tug tub tswj lub tebchaws Yixalayees nyob ruaj khov hab tug TSWV kws yog nwg tug Vaajtswv foom koob moov rua nwg, ua rua nwg muaj fwjchim luj kawg le.

²Vaajntxwv Xalumoos has rua cov thawj tubrog, tsi has tug kws saib ib txheeb leej, tug kws saib ib puas leej, taagnrho cov numtswv, taagnrho cov thawj ntawm tej tsev tuabneeg hab taagnrho cov pejxeem,

³kuas puab nrug nwg moog rua ntawm qhov chaw pehawm tug TSWV kws nyob huv Nkinpe-oos. Puab moog rua huv Nkinpe-oos rua qhov tug TSWV lub Tsevntaub sis ntsib kws tug TSWV tug tubkhai Mauxes ua nraag taj suabpuam nyob rua huv.

⁴(Tabsis Vaajntxwv Daviv tub coj tug TSWV lub Phijxaab nraag Kile-as Ye-alees lug tso rua huv Yeluxalees, qhov chaw kws nwg npaaj tseg lawm).

⁵Puab muab lub thaaj tooj kws Ulis tug tub Npexalees kws yog Hules tug xeebntxwv ua tso rua ntawm hauv ntej tug TSWV lub Tsevntaub sis ntsib kws nyob huv lub nroog Nkinpe-oos. Vaajntxwv Xalumoos hab cov pejxeem pehawm tug TSWV qhov ntawd.

⁶Vaajntxwv pehawm tug TSWV hab tua tsaj hlawv fij rua sau lub thaaj tooj ntawm hauv ntej lub Tsevntaub; nwg tua ib txheeb tug tsaj hlawv rua sau lub thaaj ntawd.

⁷Mo ntawd Vaajtswv lug tshwm rua Xalumoos pum hab has tas, “Koj xaav kuas kuv muab dlaabtsi rua koj?”

⁸Xalumoos teb has tas, “Koj ibtxwm qha koj txujkev hlub kws luj kawg nkaus rua kuv txiv Daviv, hab nwgnuav koj pub kuv ua vaajntxwv hloov nwg chaw lawm.

⁹Tug TSWV kws yog Vaajtswv, koj tub ua tav lawv le tej lug kws koj tau cog tseg rua kuv txiv lawm. Koj tsaa kuv ua vaajntxwv kaav ib tsaav tuabneeg kws coob heev suav tsi txheeb nuav.

¹⁰Yog le ntawd, thov koj pub tswvyim hab kev txawj ntse rua kuv tswjfwm puab. Yog kuv tsi muaj tswvyim ces kuv yuav ua le caag tswjfwm tau koj tsaav tuabneeg kws coob heev nuav?”

¹¹Vaajtswv teb Xalumoos has tas, “Koj xaiv tau qhov yog lawm. Koj tsi tau thov kuas koj muaj txag npluanuj lossis muaj koob muaj meej lossis kuas koj cov yeebncuab tuag lossis kuas koj muaj txujsa ntev, tabsis koj thov tswvyim hab kev txawj ntse kuas koj tswjfwm tau kuv tsaav tuabneeg kws kuv tsaa koj ua vaajntxwv kaav ntawd.

¹²Kuv yuav pub kuas koj muaj tswvyim hab kev txawj ntse. Kuv yuav pub kuas koj muaj txag npluanuj hab kuas koj lub koob meej nrov nchaa tshaaj cov vaajntxwv kws nyob ua ntej koj lossis nyob tom qaab koj.”

¹³Yog le ntawd Xalumoos txhaj tawm huv tug TSWV lub Tsevntaub sis ntsib kws yog qhov chaw pehawm huv Nkinpe-oos rov lug rua huv lub nroog Yeluxalees hab nyob huv tswjfwm cov Yixalayees.

¹⁴Xalumoos ua tau ib txheeb plaub puas lub tsheb neeg ua rog, hab muaj kaum ob txheeb leej tubrog caij neeg, muaj ibtxha nwg ca nyob huv lub nroog Yeluxalees, hab dlua le cov nwg coj moog nyob rua lwm lub nroog lawm.

¹⁵Lub sijhawm kws Xalumoos kaav tebchaws ntawd, nwg saib nwg tej nyaj tej kub tsuas zoo le tej pobzeb huv lub nroog Yeluxalees, hab tej ntoo cab los zoo le tej ntoo xikamaus kws tuaj ntawm tej taw roob huv tebchaws Yudas xwb.

¹⁶Vaajntxwv tseem muaj cov sawv cev txais tej neeg kws caab huv tebchaws Muxilis hab Kilikias

¹⁷hab cov tsheb neeg yog coj nraag tebchaws Iziv tuaj. Puab xaa tej neeg hab cov tsheb neeg moog muag rua cov Hitis hab cov Xilias ob tug vaajntxwv ib lub rau pua dlaim nyaj, hab cov neeg muag ib tug ib puas tsib caug dlaim nyaj.