Read Hmong Njua 2 Xwmtxheej Vaajntxwv 10 Bible Online

2 Xwmtxheej Vaajntxwv 10 - Hmong Njua bible

2 Xwmtxheej Vaajntxwv 10

¹Lehaunpau-aas moog huv Sekhees, qhov chaw kws cov Yixalayees nyob saab Qaumteb tuaj txoos ua ke tsaa nwg ua vaajntxwv.

²Thaus Nenpas tug tub Yelaunpau-aas kws tsiv Vaajntxwv Xalumoos moog nkaum nraag tebchaws Iziv lawm, nov xuv txug zaaj nuav, nwg txhaj le rov lug tsev.

³Taagnrho cov xeem kws nyob qaumteb tso tuabneeg moog hu Yelaunpau-aas tuaj, ces puab suavdlawg txawm ua ke moog cuag Lehaunpau-aas hab has rua nwg tas,

⁴“Koj txiv ua nruj ua tsiv hab muab tej num nyaav heev rua peb, yog koj txu kuas peb tau num sib, hab pub peb muaj kev kaaj sab, peb txaus sab ua koj pejxeem moog le.”

⁵Lehaunpau-aas teb has tas, “Peb nub sau nuav mej rov tuaj cuag kuv, kuv maam le teb mej.” Yog le ntawd, puab txawm rov moog tsev lawm.

⁶Vaajntxwv Lehaunpau-aas moog nrug cov laug kws ibtxwm yog nwg txiv Xalumoos cov tuavxaam saablaaj. Nwg nug puab has tas, “Mej yuav paab tswvyim rua kuv rov moog teb cov pejxeem le caag?”

⁷Puab teb has tas, “Yog koj xaav ua koj teg num kuas cov pejxeem poog koj, mas koj yuav tau teb kuas lawv le puab sab nyam, puab txhaj yuav ua koj cov pejxeem hab muab sab npuab koj moog le.”

⁸Tabsis nwg tsi yuav tej lug kws cov laug ntawd qha. Nwg txawm moog cuag cov tuavxaam hluas kws nrug nwg ib phaum saablaaj.

⁹Lehaunpau-aas nug puab has tas, “Mej paab kuv tuav tswvyim saib yuav teb le caag rua cov pejxeem kws tuaj thov kuv has tas, ‘Thov muab tej num nyaav kws koj txiv muab rua peb ua txu kuas sib mivntsiv.’ ”

¹⁰Puab teb has tas, “Koj teb rua puab le nuav: ‘Kuv tug rwg ntivteg tseem luj dlua kuv txiv lub dluav!’

¹¹Mej has tas, ‘Tej num kws kuv txiv muab rua mej ua nyaav heev, tabsis kuv tseem yuav muab tej num kws nyaav tshaaj ntawd rua mej ua hab. Nwg muab hlua tsaaj nplawm mej xwb; kuv yuav muab hlua tawv nplawm mej.’ ”

¹²Peb nub tom qaab Yelaunpau-aas hab cov pejxeem rov tuaj cuag Vaajntxwv Lehaunpau-aas, lawv le kws nwg tau has rua puab lawm.

¹³Vaajntxwv tsi ua le tej lug kws cov laug qha, nwg txhaj le has lug nyaav rua cov pejxeem,

¹⁴lawv le cov tuavxaam hluas qha. Nwg has tas, “Tej num kws kuv txiv muab rua mej ua nyaav heev; tabsis kuv tseem yuav muab tej num kws nyaav tshaaj ntawd rua mej ua hab. Kuv txiv muab hlua tsaaj nplawm mej xwb, tabsis kuv yuav muab hlua tawv nplawm mej!”

¹⁵Qhov kws Vaajntxwv tsi noog cov pejxeem lug, tub yog ua kuas tav lawv le tej lug kws tug TSWV kws yog Vaajtswv kuas Ahiyas kws yog tug cev Vaajtswv lug kws nyob huv lub nroog Silaus moog has rua Nenpas tug tub Yelaunpau-aas ntaag.

¹⁶Thaus cov pejxeem pum has tas, vaajntxwv tsi noog puab tej lug lawm, puab txhaj qw has tas, “Muaj qaabhau dlaabtsi moog nrug Daviv hab nwg tsev nyuas tuabneeg ntawd ua ke! Puab tub tsi tau ua ib yaam dlaabtsi paab peb le los sav? Cov Yixalayees, ca le rov moog tsev los mas! ca Lehaunpau-aas, nwg rov kaav nwg nkaus xwb txhaj zoo!” Yog le ntawd cov Yixalayees txhaj ntxeev sab,

¹⁷tseg Lehaunpau-aas ua vaajntxwv kaav cov tuabneeg nyob huv xeev Yudas nkaus xwb.

¹⁸Ces Vaajntxwv Lehaunpau-aas txhaj tso Adaunilaas kws yog tug saib cov tub zug moog cuag cov Yixalayees, tabsis puab muab pobzeb ntaus nwg tuag lawm. Thaus muaj tej xwm nuav lawm, Lehaunpau-aas txhaj le dlha ceev moog nce nwg lub tsheb neeg hab rov moog rua nraag lub nroog Yeluxalees lawm.

¹⁹Txij nub ntawd lug, cov Yixalayees kws nyob peg qaumteb txhaj ntxeev sab rua Daviv cov xeebntxwv lug le lawm.