Read Hmong Njua 2 Xwmtxheej Vaajntxwv 11 Bible Online

2 Xwmtxheej Vaajntxwv 11 - Hmong Njua bible

2 Xwmtxheej Vaajntxwv 11

¹Thaus Vaajntxwv Lehaunpau-aas lug txug huv lub nroog Yeluxalees, nwg txhij tau ib puas yim caum txheeb tug tubrog kws sab tawv heev huv xeem Yudas hab Npeenyamees. Hab nwg yuam kuas puab moog tua cov Yixalayees saab Qaumteb hab txeeb kuas tau lub tebchaws rov lug rua nwg kaav,

²tabsis tug TSWV has rua Semayas kws yog tug cev Vaajtswv lug,

³kuas coj tej lug nuav moog has rua Vaajntxwv Lehaunpau-aas, hab cov tuabneeg kws yog xeem Yudas hab xeem Npeenyamees tas,

⁴“Mej tsi xob moog tua mej cov kwvtij kws yog cov Yixalayees hlo le. Mej suavdlawg ca le rov moog tsev. Yeej yog kuv pum zoo txhaj muaj tej xwm nuav tshwmsim tuaj.” Puab noog tug TSWV tej lug hab puab txhaj tsi moog tua Yelaunpau-aas.

⁵Lehaunpau-aas nyob huv lub nroog Yeluxalees, hab xov ntsaa yeej thaiv cov nroog huv lub tebchaws Yudas hab Npeenyamees le nraag nuav:

⁶Npelehees, Etas, Tekau-as,

⁷Npethexus, Xukaus, Adulas,

⁸Nkathas, Malesas, Xifes,

⁹Adaulais, Lakhis, Axekas,

¹⁰Xaulas, Aiyaloos hab Henploos.

¹¹Nwg xov ntsaa yeej khov heev thaiv cov nroog ntawd, hab ib tug thawj tubrog saib ib lub nroog, hab nwg muab zaub mov, txiv ntoo, cawv txiv maab coj moog ca rua huv txhua lub nroog,

¹²hab muab tej thaiv nav ntaaj, hab tej muv ca rua huv ib yaam nkaus. Lehaunpau-aas ua le nuav, mas nwg txhaj tswj tau cov Yudas hab cov Npeenyamees.

¹³Cov povthawj hab cov Levis kws nyob huv cov Yixalayees tej cheebtsaam lug taag rua nraag tebchaws Yudas lawm.

¹⁴Cov Levis tso puab tej tshaav tsaj hab tej aav tseg tsiv lug nyob nraag tebchaws Yudas hab huv lub nroog Yeluxalees, rua qhov Vaajntxwv Yelaunpau-aas kws kaav cov Yixalayees hab nwg cov tub tsi pub puab ua povthawj hab ua tug TSWV teg num.

¹⁵Yelaunpau-aas tsaa dlua ib cov povthawj teev dlaab ntawm tej chaw teev dlaab sau tej ncov roob, teev tej mlom tshis hab mlom nyuj kws nwg puab.

¹⁶Cov Yixalayees txhua tug kws muab sab npuab tug TSWV kws yog cov Yixalayees tug Vaajtswv puavleej nrug cov Levis lug nyob huv Yeluxalees, kuas puab txhaj tau tua tsaj hlawv fij rua tug TSWV kws yog puab cov yawmkoob tug Vaajtswv.

¹⁷Qhov nuav ua rua lub tebchaws Yudas nyob ruaj khov, puab txhawb Vaajntxwv Lehaunpau-aas kws yog Xalumoos tug tub tau peb xyoos, puab ua lawv le Vaajntxwv Daviv hab Vaajntxwv Xalumoos obtug txujkev tswjfwm.

¹⁸Lehaunpau-aas yuav Mahalas kws yog Daviv tug tub Yelimaus tug ntxhais ua quaspuj. Yelimaus nam hu ua Anpihais kws yog Eli-as tug ntxhais hab yog Yexais tug xeebntxwv.

¹⁹Lehaunpau-aas hab Mahalas muaj peb tug tub: Ye-uses, Semaliyas hab Xahas.

²⁰Tom qaab nuav nwg yuav tau Ma-akas kws yog Axaloos tug ntxhais ua nam yau, Lehaunpau-aas hab Ma-akas muaj dlua plaub tug tub: Anpiyas, Athais, Xixas, hab Selaumis.

²¹Lehaunpau-aas muaj kaum yim tug nam hlub, hab rau caum tug nam yau, nwg cov tub muaj neeg nkaum yim leej hab cov ntxhais muaj rau caum leej. Taagnrho cov nam hlub hab nam yau, mas nwg nyam Ma-akas dlua,

²²hab taagnrho nwg cov tub, nwg hlub Anpiyas kws yog Ma-akas tug tub dlua; nwg txhaj le xaiv Anpiyas ua Vaajntxwv hloov nwg chaw.

²³Lehaunpau-aas ua tuab zoo faib num rua nwg cov tub hab tso puab moog nyob rua txhua lub nroog kws muaj ntsaa yeej huv tebchaws Yudas hab Npeenyamees. Nwg pub rua puab muaj noj muaj haus nplua mag, hab yuav ntau tug quaspuj rua puab.