Read Hmong Njua 2 Xwmtxheej Vaajntxwv 14 Bible Online

2 Xwmtxheej Vaajntxwv 14 - Hmong Njua bible

2 Xwmtxheej Vaajntxwv 14

¹Vaajntxwv Anpiyas tuag hab luas coj nwg moog log rua ntawm cov vaajntxwv lub toj ntxaas huv Daviv lub nroog, hab nwg tug tub Axas ua vaajntxwv hloov nwg chaw. Tam kws Axas kaav, lub tebchaws muaj kev thaajyeeb tau kaum xyoo.

²Axas ua zoo hab ua ncaaj nceeg hum tug TSWV sab nyam.

³Nwg rhuav cov tuabneeg txawv tebchaws tej thaaj hab tej chaw teev dlaab, tsoo tej ncej hab ntuv tug mlom quaspuj Aselas huv tuabsi povtseg.

⁴Axas has kuas cov Yudas noog tug TSWV kws yog puab cov yawmkoob tug Vaajtswv lug hab ua lawv le tug TSWV tej lug saamfwm.

⁵Qhov kws nwg rhuav tej chaw teev dlaab hab tej thaaj hlawv moov tshuaj tsw qaab huv cov Yudas tej nroog, nwg txhaj tswj tau lub tebchaws nyob thaajyeeb lug.

⁶Thaus Axas ua vaajntxwv kaav tebchaws, nwg xov ntsaa yeej thaiv tej nroog huv tebchaws Yudas, lub tebchaws tsi muaj tsuv tsi muaj rog tau ntau xyoo, rua qhov tug TSWV pub nwg muaj kev thaajyeeb.

⁷Nwg has rua cov Yudas has tas, “Peb ca le xov ntsaa yeej hab ua roojvaag thaiv tej nroog hab ua chaw tsomfaaj rua tej nroog, tsheem nwgnuav peb tau kaav hab lub tebchaws yog peb tug, rua qhov peb tau ua lawv le tug TSWV kws yog peb tug Vaajtswv sab nyam. Nwg tiv thaiv peb txhua phaab hab pub peb nyob kaaj sab lug.” Yog le ntawd puab txhaj txhim khu tej nroog huv lub tebchaws kuas muaj kev vaammeej.

⁸Vaajntxwv Axas muaj peb puas txheeb tug tubrog kws yog xeem Yudas, puab puavleej muaj dlaim thaiv nav ntaaj hab muv, hab ob puas yim caum txheeb tug tubrog kws yog xeem Npeenyamees, puab puavleej muaj dlaim thaiv nav ntaaj hab neevnti. Cov tubrog nuav puavleej yog cov kws muaj sab tawv hab kawm tav kev tua rog lawm.

⁹Cov Sudaas tug thawj tubrog Zelas, coj tau ib plhom tug tubrog hab peb puas lub tsheb neeg tuaj tua tebchaws Yudas hab thaus puab tuaj txug rua ntawm Malesas lawm.

¹⁰Axas txhaj coj tubrog moog tua Xelas. Ob tog tubrog tuaj txum chaw tim ntsej tim muag huv lub Haav Xefathas kws ze ntawm Malesas.

¹¹Axas thov tug TSWV kws yog nwg tug Vaajtswv has tas, “Tug TSWV, koj yog tug kws paab tau cov tubrog kws qaug zug kuas tawmtsaam yeej cov tubrog kws muaj zug. Tug TSWV kws yog peb tug Vaajtswv, nwgnuav thov koj ca le paab peb, peb tso sab rua koj, peb tuav koj lub npe tuaj tua cov tubrog kws coob heev nuav. Tug TSWV, koj yog peb tug Vaajtswv, thov koj tsi xob ca tuabneeg kovyeej koj.”

¹²Tug TSWV ua rua cov tubrog Sudaas swb, thaus Axas hab cov Yudas tua puab. Cov Sudaas tsiv,

¹³Axas hab nwg cov tubrog caum cov Sudaas tua moog ti nkaus lub nroog Nkelas. Cov tubrog Sudaas tuag taag tsi seem ib tug le. Tug TSWV hab nwg cov tubrog ua rua cov Sudaas swb. Cov tubrog Yudas txhaj fuab tau khoom ntau heev nqaa lug tsev.

¹⁴Axas puab tseem moog tua tej nroog kws nyob ibncig lub nroog Nkelas, hab puab fuab tau khoom ntau heev nqaa lug, rua qhov tug TSWV ua rua cov tuabneeg kws nyob huv tej nroog ntawd ntshai heev.

¹⁵Dlua le ntawd, puab tseem moog tua cov tuabneeg yug tsaj ntawm puab tej tsevntaub, nteg tej yaaj tej tshis hab tej ntxhuav coob heev. Ces puab txawm rov lug rua huv Yeluxalees lawm.