Read Hmong Njua 2 Xwmtxheej Vaajntxwv 15 Bible Online

2 Xwmtxheej Vaajntxwv 15 - Hmong Njua bible

2 Xwmtxheej Vaajntxwv 15

¹Vaajtswv tug Ntsujplig lug kaav Aunpes tug tub Axaliyas,

²ces nwg txawm tuaj cuag Vaajntxwv Axas. Nwg has tas, “Vaajntxwv Axas, koj hab cov Yudas, hab cov Npeenyamees ca le noog kuv has! Tug TSWV yuav nrug nraim mej, yog mej tsi tso nwg tseg. Yog mej nrhav nwg, nwg yuav ca mej ntsib nwg, tabsis yog mej tsi muab sab npuab nwg, nwg yuav tso mej tseg.

³Cov Yixalayees ua neej nyob tsi muaj tug Vaajtswv tseeb, tsi muaj cov povthawj qha puab hab tsi muaj kevcai tswjfwm puab lug ntev lawm.

⁴Tabsis yog thaus puab raug kev nyuaj sab, puab tig lug cuag tug TSWV kws yog cov Yixalayees tug Vaajtswv. Thaus puab nrhav nwg, puab yeej ntsib nwg.

⁵Lub sijhawm ntawd, tsi yoojyim rua tej tuabneeg moog moog lug lug, rua qhov muaj kev kub ntxhuv nyob txhua qhov huv lub tebchaws.

⁶Ib tsaav tuabneeg tsimtxom ib tsaav tuabneeg hab ib lub nroog tsimtxom ib lub nroog, rua qhov Vaajtswv tso tej kev kub ntxhuv nuav lug rua puab ntaag.

⁷Tabsis mej yuavtsum ua sab luj, tsi xob qaug zug. Tej num kws mej ua mej yuav tau txais nqe zug.”

⁸Thaus Axas nov Aunpes tug tub Axaliyas tej lug qha tshwm, nwg txhaj ua tau sab luj. Nwg rhuav tej mlom huv tebchaws Yudas hab Npeenyamees hab huv txhua lub nroog kws nwg txeeb tau sau lub laaj roob Efalayees povtseg. Hab nwg rov khu tug TSWV lub thaaj kws nyob huv lub tshaav puam ntawm lub Tuamtsev.

⁹Xeem Efalayees, Manaxes hab Xime-oos tsiv coob heev lug tuaj Axas tog hab nyob huv nwg lub tebchaws, rua qhov puab paub has tas tug TSWV nrug Axas. Vaajntxwv Axas txhaj le txheeb taagnrho puab cov ntawd, cov Yudas hab cov Npeenyamees tej npe.

¹⁰Thaus Axas ua vaajntxwv tau kaum tsib xyoos, lub peb hlis ntuj, puab tuaj sis sau rua huv lub nroog Yeluxalees.

¹¹Nub ntawd puab muab tej tsaj kws puab fuab tau lug tua hlawv fij rua tug TSWV: xyaa pua tug nyuj hab xyaa txheeb tug yaaj.

¹²Puab coglug has tas puab yuav pehawm tug TSWV kws yog puab cov yawmkoob tug Vaajtswv kuas kawg sab kawg ntsws.

¹³Txhua tug, tsi has tug laug tug hluas, quaspuj txivneej, yog leejtwg tsi pehawm tug TSWV, yuav muab tug ntawd tua povtseg.

¹⁴Puab txhua tug qw nrov nrov hab tuav tug TSWV lub npe coglug has tas, puab yuav ua lawv le tej lug cog tseg ntawd. Puab qw nrov nrov, hab tshuab raaj tshuab xyu.

¹⁵Taagnrho cov Yudas zoo sab kawg le, rua qhov puab tau coglug nrhav tug TSWV kawg sab kawg ntsws, puab txhaj ntsib tug TSWV, hab tug TSWV pub puab noj qaab nyob zoo.

¹⁶Vaajntxwv Axas muab nwg nam txu lub meejmom puj Vaajntxwv, rua qhov nwg puab tug mlom quaspuj Aselas. Axas muab tug mlom ntawd tsoo tawg ntsoog ntxawg, hab coj moog hlawv huv lub Haav Kiloos.

¹⁷Txawm yog Axas tsi tau muab tej chaw teev dlaab sau tej ncov roob huv lub tebchaws rhuav povtseg los nwg muab sab npuab tug TSWV taag nwg simneej le.

¹⁸Nwg tau muab txhua yaam kws nwg txiv Anpiyas tub muab fij rua tug TSWV lawm, coj rov moog tso rua huv lub Tuamtsev.

¹⁹Ntu kws Axas ua vaajntxwv tau peb caug tsib xyoos ntawd lub tebchaws tsi ua tsuv tsi ua rog le.