Read Hmong Njua 2 Xwmtxheej Vaajntxwv 16 Bible Online

2 Xwmtxheej Vaajntxwv 16 - Hmong Njua bible

2 Xwmtxheej Vaajntxwv 16

¹Thaus Axas ua vaajntxwv kaav tebchaws Yudas tau peb caug rau xyoo, Vaajntxwv Npa-asas kws kaav tebchaws Yixalayees tau tuaj tua cov Yudas, hab tsim lub nroog Lamas, ua chaw txav kev tsi pub cov Yudas moog lug.

²Yog le ntawd, Vaajntxwv Axas txhaj muab tej nyaj tej kub kws seem huv lub Tuamtsev hab huv lub loog rua nwg cov numtswv nqaa moog rua peg lub nroog Damaxes hab muab cob rua cov Xilias tug vaajntxwv Npeehadas kws yog Taleemoos tug tub hab yog Hexi-oos tug xeebntxwv, nrug cov lug kws has le nuav:

³“Ca wb Tuav teg ua phoojywg, ib yaam le thaus koj txiv hab kuv txiv ua phoojywg lug lawm. Cov nyaj hab cov kub nuav, yog coj tuaj pub rua koj ua kev sis raug zoo. Nwgnuav thov koj ca le txav kev ua phoojywg nrug cov Yixalayees tug Vaajntxwv Npa-asas kuas nwg txhaj thim nwg cov tubrog tawm huv kuv cheebtsaam aav moog.”

⁴Vaajntxwv Npeehadas pum zoo ua le Axas has, hab tso nwg cov thawj tubrog coj puab tej tubrog moog tua cov Yixalayees tej nroog. Puab moog txeeb tau lub nroog Iyoos, lub nroog Daas, lub nroog Anpees Npethes Makhas, cheebtsaam kws ze Havtxwv Kalilais hab taagnrho cov Nathalis tej nroog.

⁵Thaus Vaajntxwv Npa-asas nov tej xwmtxheej nuav lawm, nwg tso tseg tsi tsim lub nroog Lamas ntxiv, hab rov qaab moog rua huv lub nroog Tilexas lawm.

⁶Ces Vaajntxwv Axas txawm hu cov pejxeem thoob plawg tebchaws Yudas tuaj nqaa tej pobzeb hab tej ntoo kws Npa-asas coj tuaj tsim lub nroog Lamas moog tsim lub nroog Nkenpas hab lub nroog Mixepas.

⁷Lub sijhawm ntawd Hananis kws yog tug cev Vaajtswv lug moog cuag Vaajntxwv Axas hab has tas, “Tub tsimnyog koj ca sab rua tug TSWV kws yog koj tug Vaajtswv, tabsis koj tsua ca sab rua tug vaajntxwv kws kaav tebchaws Xilias, vim le ntawd, tug vaajntxwv kws kaav tebchaws Xilias cov tubrog txhaj tsiv dlim ntawm koj moog lawm.

⁸Puas yog cov Sudaas hab cov Linpias tseem muaj tubrog muaj tsheb neeg ua rog hab muaj cov tubrog caij neeg coob heev? Tabsis thaus ntawd koj ca sab rua tug TSWV, nwg txhaj le paab kuas koj tua yeej puab lawm.

⁹Tug TSWV yeej saib ntsoov lub nplajteb nuav hab txhawb cov kws muab sab npuab nwg tug zug. Vim koj tau ua tej yaam kws ruag kawg nkaus, yog le ntawd, txij nuav moog koj lub tebchaws yuav ua tsuv ua rog tsi tu le.”

¹⁰Qhov nuav ua rua Vaajntxwv Axas chim hab npautawg heev, nwg txhaj muab saw hlau khi tug cev Vaajtswv lug ntawd. Tuab lub sijhawm ntawd, Axas tseem ua nruj ua tsiv rua cov pejxeem ibtxha hab.

¹¹Dlua le lwm yaam kws Vaajntxwv Axas ua taag lug, nwg lub peevxwm, hab tej nroog kws nwg ua, puavleej muab sau ca rua huv phoo ntawv Keebkwm kws teev cov Yudas hab cov Yixalayees tej Vaajntxwv lub neej lawm.

¹²Thaus Axas ua vaajntxwv tau peb caug cuaj xyoos, nwg muaj mob rua nwg ob txhais kutaw; txawm le ntawd los nwg tsi thov kuas tug TSWV paab nwg, tabsis nwg moog cuag tej kws tshuaj xwb.

¹³Axas ua vaajntxwv tau plaub caug ib xyoos ces nwg txawm tuag lawm.

¹⁴hab luas coj nwg moog log rua huv lub qhov ntxaa kws nyob sau ib lub roob zeb kws txaug ca rua nwg huv Daviv lub nroog. Puab muab ntau yaam moov tshuaj hab roj tsw qaab pleev Axas lub cev coj nwg moog log. Puab rauv ib cubtawg hlub heev hab puab hawm nwg.