Read Hmong Njua 2 Xwmtxheej Vaajntxwv 17 Bible Online

2 Xwmtxheej Vaajntxwv 17 - Hmong Njua bible

2 Xwmtxheej Vaajntxwv 17

¹Yehausafas ua vaajntxwv hloov nwg txiv Axas chaw, hab nwg hajyam ua rog nyaav rua cov Yixalayees.

²Nwg tso tubrog moog nyob rua huv cov Yudas tej nroog kws muaj ntsaa yeej thaiv, tej nroog huv tebchaws Yudas hab tej nroog huv xeev Efalayees kws nwg txiv Axas txeeb tau lug.

³Vim Yehausafas ua zoo lawv le nwg txiv lub neej thaus xubthawj, nwg tsi pe Npa-aas, tug TSWV txhaj foom koob moov rua nwg.

⁴Nwg pehawm nwg txiv tug Vaajtswv, nwg ua lawv le Vaajtswv tej lug saamfwm, nwg tsi ua le cov Yixalayees tej vaajntxwv ua.

⁵Mas tug TSWV txhaj pub Yehausafas tswj tau lub tebchaws Yudas nyob ruaj khov. Cov pejxeem coj khoom tuaj rua nwg. Yog le ntawd, nwg txhaj muaj txag npluanuj hab muaj koob meej nto moo lug.

⁶Nwg kub sab lug ua lawv le tug TSWV txuj kevcai, rhuav tej chaw teev dlaab hab tug mlom quaspuj Aselas huv tebchaws Yudas povtseg.

⁷Thaus Yehausafas kaav tebchaws tau peb xyoos, nwg tso Npeehais, Aunpadiyas Xakhaliyas, Nethanees hab Mikhayas kws yog nwg cov numtswv moog cob qha cov Yudas nyob huv tej nroog.

⁸Muaj cuaj tug Levis hab ob tug povthawj nrug cov ntawd moog. Cov Levis yog Semayas, Nethaniyas, Xenpadiyas, Axahees, Semilamaus, Yehaunathaas, Adauniyas, Taunpiyas hab Taunpadauniyas; hab ob tug povthawj yog Elisamas hab Yehaulaas.

⁹Puab coj tug TSWV phoo ntawv kevcai moog cob qha cov pejxeem suavdlawg kws nyob txhua lub nroog huv tebchaws Yudas.

¹⁰Tug TSWV ua rua cov tebchaws kws nyob ibncig ntshai hab tsi tuaj tua Vaajntxwv Yehausafas lawm.

¹¹Cov Filitees qee leej coj nyaj hab khoom ntau yaam tuaj pub rua Yehausafas. Hab cov Alav coj tau xyaa txheeb xyaa pua tug yaaj hab xyaa txheeb xyaa pua tug tshis tuaj rua nwg.

¹²Yog le ntawd, Yehausafas txhaj muaj fwjchim heev zuj zug. Nwg ua ntau lub chaw faajxwm hab ntau lub tsev rau khoom rua huv tej nroog thoob tebchaws Yudas,

¹³hab nwg coj khoom ntau heev moog ca rua huv. Yehausafas tso cov tubrog kws txawj tua rog heev nyob huv lub nroog Yeluxalees

¹⁴lawv le puab tej cuab kwvtij. Adinas yog tug thawj saib cov tubrog kws yog xeem Yudas hab muaj peb puas txheeb leej.

¹⁵Yehauhanaas yog tug ob, nwg saib ob puas yim caum txheeb leej tubrog,

¹⁶hab tug peb yog Xikhalis tug tub Amaxiyas, nwg saib ob puas txheeb leej tubrog, (Amaxiyas yog ib tug kws txaus sab ua tug TSWV teg num).

¹⁷Eli-adas yog tug thawj saib cov tubrog kws yog Npeenyamees. Nwg yog ib tug tubrog kws ua tau heev, nwg saib ob puas txheeb leej tubrog kws muaj dlaim thaiv nav ntaaj hab neevnti.

¹⁸Yehauxanpas yog tug ob, nwg saib ib puas yim caum txheeb leej tubrog kws muaj tej cuabyeej ua rog kws zoo heev.

¹⁹Cov tubrog nuav ua num rua vaajntxwv nyob huv lub nroog Yeluxalees, hab vaajntxwv tseem tso dlua lwm paab tubrog moog nyob rua cov Yudas tej nroog kws muaj ntsaa yeej thaiv.