Read Hmong Njua 2 Xwmtxheej Vaajntxwv 18 Bible Online

2 Xwmtxheej Vaajntxwv 18 - Hmong Njua bible

2 Xwmtxheej Vaajntxwv 18

¹Thaus cov Yudas tug Vaajntxwv Yehausafas kws muaj txag npluanuj hab koob meej nrov nchaa heev lawm, nwg txawm coj nwg tsev tuabneeg ib tug moog yuav cov Yixalayees tug Vaajntxwv Ahaj tsev tuabneeg ib tug`.

²Tau ntau xyoo tom qaab nuav, Yehausafas moog saib Vaajntxwv Ahaj huv lub nroog Xamalis, Ahaj tua nyuj hab yaaj ntau tug ua ib rooj mov luj tog txais Yehausafas hab cov tuabneeg kws nrug nwg moog. Ahaj txawm yum Yehausafas kuas nrug nwg moog tua lub nroog Lamaus huv cheebtsaam Nkile-as.

³Ahaj has rua Yehausafas has tas, “Koj puas kaam nrug kuv moog tua lub nroog Lamaus?” Yehausafas teb has tas, “Thaus twg koj moog, kuv hab kuv cov tubrog yeej yuav nrug koj moog. Peb yuav koom teg nrug koj.”

⁴Yehausafas has ntxiv tas, “Tabsis peb xub nug tug TSWV tsaiv maam le moog.”

⁵Yog le ntawd, Ahaj txhaj hu cov cevlug kwvyees le plaub puas leej tuaj, hab nug puab has tas, “Puas tsimnyog kuv moog ntaus lub nroog Lamaus los tsi tsimnyog moog?” Puab teb has tas, “Koj ca le moog ntaus lub nroog ntawd, tug TSWV yuav pub kuas koj ntaus yeej xwb.”

⁶Tabsis Yehausafas nug has tas, “Puas muaj dlua lwm tug cevlug kws tseem yuav paab tau peb moog nug tug TSWV hab?”

⁷Ahaj teb has tas, “Tseem tshuav ib tug, nwg yog Imelas tug tub Mikayas. Tabsis kuv ntxub nwg heev, vim nwg yeej ibtxwm tsi cev tej lug zoo rua kuv ib zag le; tsuas yog pheej cev tej lug phem rua kuv xwb.” Yehausafas teb has tas, “Koj tseg tsi xob has le ko.”

⁸Ces Ahaj txhaj hu nwg ib tug numtswv lug hab has rua nwg tas, “Koj moog coj Mikayas tuaj taamsim nuav.”

⁹Ob tug vaajntxwv ntawd yeej naav tej rig tsho vaajntxwv, hab nyob sau obtug ob lub zwmtxwv kws nyob ntawm lub tshaav nplej saab nrau lub Roojvaag Xamalis, cov cevlug txhua tug puavleej tuaj nyob cev Vaajtswv lug ntawm ob tug xubndlag.

¹⁰Cov cevlug ntawd muaj ib tug hu ua Xedekiyas, nwg yog Kena-anas tug tub, nwg muab hlau ua tau ibtxwm kub, hab nwg has rua Ahaj has tas, “Tug TSWV has tas ‘Koj yuav siv txwm kub nuav moog tawmtsaam cov Xilias hab ntaus yeej puab taagnrho huv tuabsi.’ ”

¹¹Cov cevlug puavleej has ib yaam tas, “Koj ca le moog tua lub nroog Lamaus. Koj yuav moog tua yeej xwb. Tug TSWV yuav paab kuas koj yeej.”

¹²Lub sijhawm ntawd tug nom kws moog tog Mikayas tuaj has rua Mikayas has tas, “Taagnrho cov cevlug, puab puavleej has tas vaajntxwv yuav moog tua yeej, yog le ntawd, koj yuavtsum has tej lug zoo ib yaam le puab has hab.”

¹³Tabsis Mikayas teb has tas, “Kuv thov coglug rua tug TSWV kws muaj sa nyob has tas, kuv yuav has lawv le tej lug kws nwg qha kuas kuv has xwb.”

¹⁴Thaus Mikayas moog nyob taabmeeg Vaajntxwv Ahaj lawm, vaajntxwv nug nwg has tas, “Mikayas, puas tsimnyog Vaajntxwv Yehausafas hab kuv moog tua lub nroog Lamaus los tsi tsimnyog moog?” Mikayas teb has tas, “Meb ca le moog ntaus los mas! Meb yeej yuav tua yeej xwb. Tug TSWV yeej yuav paab kuas meb yeej.”

¹⁵Tabsis Ahaj teb has tas, “Kuv tub yeej has rua koj ntau zag lawm has tas, thaus twg koj tuav tug TSWV lub npe qha ib zaaj dlaabtsi rua kuv, koj yuavtsum qha qhov tseeb xwb nua ne! Kuv tseem yuav has pistsawg zag rua koj hab?”

¹⁶Mikayas teb has tas, “Kuv tub pum cov tubrog Yixalayees tsiv ri sua sau tej ncov roob ib yaam le paab yaaj kws tsi muaj tug tswv yug lawm. Hab tug TSWV has tas, ‘Cov tuabneeg nuav tsi muaj tug thawjcoj lawm, ca le tso puab rov moog tsev ywj sab los mas!’ ”

¹⁷Ahaj has rua Yehausafas has tas, “Kuv tub qha rua koj lawm has tas, nwg yeej tsi cev ib zaaj zoo lug rua kuv le puas yog? Nwg yeej ibtxwm cev tej lug phem rua kuv nkaus xwb!”

¹⁸Mikayas has ntxiv tas, “Koj ca le noog tug TSWV lug! Kuv pum tug TSWV nyob sau nwg lub zwmtxwv kws nyob sau ntuj, hab cov timtswv ceebtsheej sawv ntawm nwg ob saab.”

¹⁹Tug TSWV nug has tas, “Leejtwg yuav ntxag tau Ahaj kuas moog raug tua tuag rua huv lub nroog Lamaus?” Muaj ib cov timtswv has ib yaam, hab muaj dlua lwm cov has dlua lwm yaam lawm,

²⁰ces muaj ib tug ntsujplig txaav zog lug rua ntawm tug TSWV xubndlag hab has rua tug TSWV tas, “Kuv yog tug kws yuav moog ntxag Ahaj ntaag.” Tug TSWV nug has tas, “Koj yuav moog ntxag le caag tau?”

²¹Tug ntsujplig ntawd teb has tas, “Kuv yuav moog tshoov Ahaj cov cevlug sab kuas puab qha tej lug dlaag rua nwg.” Tug TSWV txhaj has rua nwg tas, “Koj ca le moog dlaag ntxag nwg. Nwg yeej yuav noog koj zaaj xwb.”

²²Mikayas txawm xaus lug has tas, “Yeej muaj le nuav tshwm tuaj lawm, tug TSWV ua kuas koj cov cevlug tuaj dlaag koj. Tabsis tug TSWV qha tseeb has tas, koj yuav raug kev puamtsuaj xwb!”

²³Ces tug cevlug Xedekiyas txawm sawv tseeg moog xuas tawg ncuav rua Mikayas saab plhu, hab nug has tas, “Thaus twg tug TSWV tug ntsujplig tub tso kuv tseg hab moog has rua koj le ko lawm?”

²⁴Mikayas teb has tas, “Koj yeej yuav paub lawm thaus koj tsiv moog nkaum nyob rua chaav tsev huv plawv.”

²⁵Vaajntxwv Ahaj has rua nwg cov numtswv ib tug has tas, “Ca le nteg Mikayas coj moog rua tug tswv nroog Amoos hab vaajntxwv tug tub Yau-as;

²⁶has kuas obtug coj nwg moog kaw rua huv tsev lojcuj, tsuas muab mov hab dlej rua nwg noj nwg haus moog txug thaus kuv rov lug kaaj sab lug tsi muaj dlaabtsi maam le tso nwg.”

²⁷Mikayas txhaj twv has tas, “Yog koj tseem tau rov qaab lug kaaj sab lug, ces tej lug kws kuv has rua koj yeej tsi yog tug TSWV has rua kuv le.” Nwg has ntxiv tas, “Mej txhua tug nrug nov tej lug kws kuv has nuav.”

²⁸Ces Ahaj kws yog cov Yixalayees tug vaajntxwv hab cov Yudas tug Vaajntxwv Yehausafas txawm txhij tubrog moog ntaus lub nroog Lamaus huv cheebtsaam Nkile-as.

²⁹Ahaj has rua Yehausafas tas, “Thaus peb moog rua huv tshaav rog kuv yuav naav dlua lwm cev rig tsho lawm, tabsis koj naav koj cev rig tsho vaajntxwv los tau.” Yog le ntawd, cov Yixalayees tug vaajntxwv txhaj naav dlua lwm cev rig tsho moog rua huv tshaav rog tsi pub kuas leejtwg paub nwg le.

³⁰Cov Xilias tug vaajntxwv txhaj has rua nwg peb caug tug thawj tubrog tsaav tsheb neeg kuas tsi xob tua ib tug twg le, tua cov Yixalayees tug vaajntxwv tuab leeg nkaus xwb.

³¹Yog le ntawd, thaus puab pum Vaajntxwv Yehausafas, puab txawm xaav has tas nwg yog cov Yixalayees tug vaajntxwv, ces puab txhaj moog caum nwg tua. Tabsis Vaajntxwv Yehausafas qw nrov nrov, tug TSWV kws yog Vaajtswv txhaj cawm nwg hab ua rua cov tubrog Xilias tso tseg tsi tua Yehausafas.

³²Cov Xilias tug thawj tubrog tsaav tsheb neeg txhaj paub has tas, nwg tsi yog cov Yixalayees tug vaajntxwv, puab txhaj tso tseg tsi caum nwg tua ntxiv lawm.

³³Tabsis muaj ib tug tubrog Xilias laam nqug nwg raab neevnti tua moog, ua cav xibxub ca le yaa moog raug Vaajntxwv Ahaj lub tsho hlau kis nruab nraab tshaab plawg rua huv nwg lub cev lawm. Nwg txawm quaj qw rua nwg tug tsaav tsheb neeg has tas, “Kuv raug mob lawm, ca le lem tsheb rov moog hab coj kuv tawm huv tshaav rog nuav moog.”

³⁴Thaus ntawd, muaj kev sis ntaus sis tua nyaav zuj zug. Vaajntxwv Ahaj tseem txheem taug lug sawv huv nwg lub tsheb neeg nrug cov Xilias sis tua. Tabsis thaus nub poob qho nwg txawm tu sav nrho tuag lawm.