Read Hmong Njua 2 Xwmtxheej Vaajntxwv 19 Bible Online

2 Xwmtxheej Vaajntxwv 19 - Hmong Njua bible

2 Xwmtxheej Vaajntxwv 19

¹Thaus cov Yudas tug Vaajntxwv Yehausafas rov lug txug huv nwg lub loog huv Yeluxalees, nwg tseem noj qaab nyob zoo.

²Muaj ib tug cevlug hu ua Yehus kws yog Hananis tug tub, tuaj cuag Vaajntxwv Yehausafas hab has rua nwg tas, “Puas tsimnyog koj paab cov tuabneeg ua phem ua qas hab hlub cov tuabneeg kws ntxub tug TSWV. Qhov kws koj ua ntawd ua rua tug TSWV chim heev rua koj.

³Txawm le ntawd los koj ua tau qee yaam zoo hab. Koj tau rhuav tug mlom quaspuj Aselas kws tej tuabneeg suavdlawg pheej moog pe hab koj ua lawv le tug TSWV sab nyam.”

⁴Txawm yog Vaajntxwv Yehausafas nyob huv lub nroog Yeluxalees los nwg moog moog lug lug rua nraag lub nroog Npes Senpas hab peg lub laaj roob Efalayees, nqua hu kuas cov pejxeem suavdlawg rov lug cuag tug TSWV kws yog puab cov yawmkoob tug Vaajtswv.

⁵Vaajntxwv tsaa ib cov txav txim rua huv txhua lub nroog kws muaj ntsaa yeej thaiv huv tebchaws Yudas,

⁶hab has rua puab tas, “Mej yuavtsum ua tuab zoo saib thaus mej txav txim, rua qhov tsi yog mej txav txim lawv le tuabneeg lub sab nyam, tabsis lawv le tug TSWV sab nyam, nwg yeej nrug mej thaus mej txav txim.

⁷Mej yuavtsum fwm tug TSWV hab txav txim ncaaj nceeg, rua qhov tug TSWV kws yog peb tug Vaajtswv yog tug ncaaj nceeg, nwg tsi xaiv leejtwg ntsejmuag hab tsi yuav luas tej nyaj xab.”

⁸Yehausafas tsaa cov Levis, cov povthawj hab ib cov thawjcoj qee leej ntawm tej cuab huv Yeluxalees ua cov txav txim rua tug ua txhum rua tug TSWV txuj kevcai lossis cov pejxeem kws nyob huv lub nroog Yeluxalees tej plaub ntug.

⁹Yehausafas has rua puab tas, “Mej yuavtsum fwm tug TSWV, muab sab npuab nwg hab ua mej teg num kuas ncaaj nceeg.

¹⁰Thaus mej cov tuabneeg kws nyob huv tej nroog coj puab tej plaub ntug tuaj rua mej has, tsi has kev sis ntaus sis tua, ua txhum kevcai lossis ua txhum tug TSWV tej lug, mej yuavtsum ua tuab zoo ntuag hab qha kuas puab tsi xob ua txhum rua tug TSWV. Yog mej tsi ua le ntawd, tug TSWV txujkev chim, yuav lug raug mej hab nwg cov tuabneeg, tabsis yog mej ua mej teg num ncaaj nceeg, mej yuav tsi muaj txim.

¹¹Amaliyas kws yog tug Povthawj Hlub, yog tug txav txim thaus kawg rua tug kws ua txhum tug TSWV txuj kevcai, Isamayees tug tub Xenpadiyas kws yog cov Yudas tug tswv xeev, yog tug txav txim thaus kawg rua tug ua txhum numtswv tej kevcai. Cov Levis teg num yog saib cov txav txim. Tsi xob qaug zug rua mej teg num, thov tug TSWV nrug nraim tug kws ua ncaaj!”