Read Hmong Njua 2 Xwmtxheej Vaajntxwv 23 Bible Online

2 Xwmtxheej Vaajntxwv 23 - Hmong Njua bible

2 Xwmtxheej Vaajntxwv 23

¹Xyoo xyaa tug povthawj Yehauyadas pum has tas, txug sijhawm kws nwg yuavtsum nqeg teg ua num lawv le nwg npaaj sab lawm. Yehauyadas txhaj has rua tsib tug thawj tubrog kws yog: Yehaulaas tug tub Axaliyas, Yehauhanaas tug tub Yisamayees, Aunpes tug tub Axaliyas, Adayas tug tub Ma-axeyas, hab Xikhalis tug tub Elisafas.

²Puab txawm moog thoob plawg txhua lub nroog huv tebchaws Yudas, coj cov Levis hab cov thawjcoj ntawm txhua cuab tuaj rua huv Yeluxalees.

³Puab suavdlawg tuaj sis sau rua huv lub Tuamtsev hab coglug nrug Yau-as kws yog Vaajntxwv tug tub. Yehauyadas has rua puab tas, “Nuav yog Vaajntxwv tug tub, nwg yuav ua vaajntxwv lawv le tug TSWV tau coglug rua Daviv lawm has tas, Daviv cov xeebntxwv yuav tau ua vaajntxwv moog le.

⁴Peb yuav tau ua le nuav: Thaus cov povthawj hab cov Levis tuaj ua num rua Nub Xanpataus, puab cov ntawd ib feem peb ua cov zuv lub Tuamtsev tej roojvaag,

⁵ib feem peb zuv vaajntxwv lub loog hab ib feem peb zuv lub Roojvaag Xules. Taagnrho cov pejxeem tuaj sis sau rua ntawm lub tshaav puam saab nrau lub Tuamtsev.

⁶Tsi pub leejtwg moog rua huv lub Tuamtsev, tsuas yog cov povthawj hab cov Levis txhaj moog tau xwb. Puab moog tau, rua qhov puab dlawbhuv lawm, tabsis cov pejxeem yuavtsum noog tug TSWV lug hab nyob saab nrau xwb.

⁷Cov Levis tuav rawv ntaaj zuv puagncig vaajntxwv, puab nrug nraim vaajntxwv txhua qhov kws nwg moog. Yog leejtwg moog huv lub Tuamtsev tug ntawd yuav raug tua povtseg.”

⁸Cov Levis hab cov Yudas ua lawv le Yehauyadas has. Cov kws ua num Nub Xanpataus taag los puab tsi tau moog tsev le. Yog le ntawd, cov thawj tubrog txhaj tau puab cov ntawd hab cov kws tuaj hloov puab nub ntawd ua num ua ke.

⁹Yehauyadas muab Vaajntxwv Daviv cov muv, cov thaiv nav ntaaj, tsi has cov luj hab cov miv kws muab khaws ca rua huv lub Tuamtsev coj lug rua tug thawj tubrog.

¹⁰Ces tug thawj tubrog txawm kuas cov tubrog tuav rawv ntaaj moog sawv thoob plawg ntawm hauv ntej lub Tuamtsev zuv vaajntxwv.

¹¹Ces Yehauyadas txawm coj Yau-as tawm lug, muab lub mom kub rua nwg ntoo hab muab Vaajtswv phoo ntawv kevcai cob rua Yau-as; puab muab roj laub rua Yau-as taubhau tsaa nwg ua vaajntxwv. Puab suavdlawg npuaj teg hab qw has tas, “Thov kuas vaajntxwv muaj sa nyob ntev!”

¹²Puj Vaajntxwv Athaliyas nov cov tubrog hab cov pejxeem qw, ces nwg txawm dlha ceev nrooj tuaj rua ntawm lub Tuamtsev kws suavdlawg tuaj sis sau.

¹³Puj Vaajntxwv pum tug vaajntxwv kws puab tsaa, sawv ntawm lub Tuamtsev tug ncej qhovrooj lawv le kevcai tsaa vaajntxwv. Cov numtswv, cov tshuab raaj tshuab xyu hab cov pejxeem sawv puagncig vaajntxwv, puab qw hab tshuab raaj tshuab xyu zoo sab kawg le. Athaliyas nyuaj sab heev, nwg dlua rhe nwg cev khaub dluag hab qw has tas, “Ntxeev sab! Ntxeev sab!”

¹⁴Yehauyadas tsi xaav kuas luas tua Athaliyas rua ntawm lub Tuamtsev, nwg txhaj hu cov thawj tubrog lug hab has rua puab tas, “Coj Athaliyas tawm lawv kis nruab nraab ntawm ob paab tubrog nuav moog. Yog leejtwg lug paab nwg, ces mej ca le muab tug ntawd tua povtseg.”

¹⁵Cov tubrog txawm nteg Athaliyas hab coj nwg moog rua ntawm lub Roojvaag Neeg kws yuav moog rua huv lub loog, hab puab muab nwg tua rua ntawd.

¹⁶Tug povthawj Yehauyadas kuas Vaajntxwv Yau-as hab cov pejxeem suavdlawg nrug nwg coglug has tas, puab yuav ua tug TSWV tsaav tuabneeg moog le.

¹⁷Ces cov tuabneeg txawm moog rua tom lub tsev teev Npa-aas hab muab lub tsev rhuav puamtsuaj taag; puab muab tej thaaj hab tej mlom tsoo tawg taag, hab muab tug povthawj Matas kws teev Npa-aas tua rua ntawm cov thaaj hauv ntej.

¹⁸Yehauyadas tsaa cov povthawj hab cov Levis ua cov saib num huv lub Tuamtsev. Puab ua tej num kws Vaajntxwv Daviv muab cob rua puab, hab puab tua tsaj hlawv fij rua tug TSWV lawv le txuj kevcai kws Mauxes sau tseg. Dlua le ntawd, puab yog cov ntaus suab nkauj hab hu nkauj.

¹⁹Hab Yehauyadas tseem tso tubrog zuv lub Tuamtsev tej roojvaag hab tsi pub tug kws tsi huv moog rua huv le.

²⁰Cov thawj tubrog, cov numtswv, cov tswv xeev hab cov pejxeem nrug Yehauyadas coj vaajntxwv tawm huv lub Tuamtsev lug rua huv lub loog. Puab coj vaajntxwv moog ntawm lub Roojvaag Theem Sab lug rua huv lub loog hab nwg moog nyob sau lub zwmtxwv.

²¹Cov pejxeem suavdlawg zoo sab kawg nkaus, ces lub nroog nyob ntsag tu, rua qhov puab tub muab Athaliyas tua tuag lawm.