Read Hmong Njua 2 Xwmtxheej Vaajntxwv 24 Bible Online

2 Xwmtxheej Vaajntxwv 24 - Hmong Njua bible

2 Xwmtxheej Vaajntxwv 24

¹Thaus Yau-as ua vaajntxwv kaav tebchaws Yudas, nwg noobnyoog muaj xyaa xyoo, hab nwg nyob huv lub nroog Yeluxalees kaav tau plaub caug xyoo. Nwg nam hu ua Xinpiyas kws nyob huv lub nroog Npesenpas.

²Yau-as ua lawv le tug TSWV sab nyam moog taag tug povthawj Yehauyadas tam.

³Yehauyadas yuav tau ob tug quaspuj rua Vaajntxwv Yau-as. Obtug yug tau tub hab ntxhais coob leej rua Yau-as.

⁴Thaus Yau-as ua vaajntxwv tau tsi ntev, nwg txawm txhim khu lub Tuamtsev.

⁵Yau-as has kuas cov povthawj hab cov Levis moog thoob plawg txhua lub nroog huv tebchaws Yudas, hab sau cov pejxeem tej nyaj lug khu lub Tuamtsev lawv le naj xyoo khu. Yau-as kuas puab ca le nqeg teg ua, tabsis cov Levis tseem pheej ncua tseg tsi ua,

⁶yog le ntawd, vaajntxwv txhaj hu Yehauyadas kws yog puab tug thawjcoj lug cuag nwg hab has tas, “Yog vim le caag mej tseem tsi kuas cov Levis ca le moog sau se ntawm cov Yudas hab cov tuabneeg kws nyob huv lub nroog Yeluxalees, lawv le tug TSWV tug tubkhai Mauxes tau has kuas cov pejxeem yuavtsum them se tuaj khu tug TSWV lub Tuamtsev?”

⁷(Athaliyas kws yog tug tuabneeg ua phem ua qas cov tuabneeg tuaj muab lub Tuamtsev rhuav pob puag taag. Hab coj tej khoom tseemceeb huv moog siv rua Npa-aas lawm.)

⁸Vaajntxwv has kuas cov Levis txua ib lub thawv, hab kuas muab tso rua ntawm lub roojvaag kws moog rua huv lub Tuamtsev rua suavdlawg coj nyaj tuaj tso rua.

⁹Puab tshaajtawm rua huv lub nroog Yeluxalees hab thoob plawg tebchaws Yudas, kuas txhua tug coj se tuaj rua tug TSWV lawv le Vaajtswv tug tubkhai Mauxes tau has kuas suavdlawg ua thaus puab nyob nraag taj suabpuam.

¹⁰Cov numtswv hab cov pejxeem txaus sab coj puab tej nyaj tuaj tso puv nkaus huv lub thawv ntawd.

¹¹Txhua nub, cov Levis coj thawv nyaj ntawd moog rua vaajntxwv cov numtswv kws saib cov nyaj ntawd. Thaus puab pum has tas nyaj puv thawv lawm, vaajntxwv tug teev ntawv hab tug Povthawj Hlub tuaj muab cov nyaj ntawd rhu tawm hab muab lub thawv moog tso rua ntawm qhov qub chaw. Puab ua le nuav txhaj tau nyaj ntau heev.

¹²Vaajntxwv hab Yehauyadas coj cov nyaj ntawd moog rua cov kws saib cov khu lub Tuamtsev, ces puab coj moog ndlav cov kws txawj txaug pobzeb, txawj kaw ntoo hab txawj nchuav tooj nchuav hlau tuaj khu lub Tuamtsev.

¹³Txhua tug puavleej siv zug ua num hab puab khu tau lub Tuamtsev khov hab zoo ib yaam le lub qub.

¹⁴Thaus puab khu tav lawm, puab coj tej nyaj tej kub kws seem siv tsi taag lug cob rua vaajntxwv hab Yehauyadas. Obtug muab tej nyaj tej kub ntawd coj moog nchuav ua taig hab tej cuabyeej siv rua huv lub Tuamtsev. Thaus kws Yehauyadas ua neej nyob, suavdlawg tseem tua tsaj hlawv fij rua tug TSWV ntawm lub Tuamtsev tsi tu le.

¹⁵Yehauyadas noobnyoog muaj ib puas peb caug xyoo ces nwg txawm tuag lawm.

¹⁶Vim Yehauyadas muaj txaj ntsig rua cov Yixalayees, rua Vaajtswv teg num hab lub Tuamtsev, luas txhaj coj Yehauyadas moog log rua ntawm cov vaajntxwv lub toj ntxaas huv Daviv lub nroog.

¹⁷Tabsis tom qaab kws Yehauyadas tuag lawm, cov Yudas tej numtswv txawm tuaj thov kuas Vaajntxwv Yau-as ua lawv le puab has.

¹⁸Yog le ntawd, cov Yudas txawm tso tseg tsi tuaj pehawm tug TSWV kws yog puab cov yawmkoob tug Vaajtswv huv lub Tuamtsev lawm, tabsis puab moog pe tej mlom hab tug mlom quaspuj Aselas. Puab ua txhum le ntawd, ua rua tug TSWV chim heev rua cov Yudas hab cov tuabneeg kws nyob huv lub nroog Yeluxalees.

¹⁹Tug TSWV tso nwg cov cevlug moog coj puab rov lug cuag nwg, tabsis puab tsi noog Vaajtswv cov cevlug has le.

²⁰Vaajtswv tug ntsujplig lug kaav hlo Xakhaliyas kws yog tug povthawj Yehauyadas tug tub. Xakhaliyas txhaj moog sawv taabmeeg cov pejxeem hab has rua puab tas, “Tug TSWV kws yog Vaajtswv nug has tas, ‘Vim le caag mej tsi noog nwg tej lug saamfwm?’ Mej yuav tsi vaammeej, rua qhov mej tso tug TSWV tseg lawm, nwg txhaj tso mej tseg hab!”

²¹Vaajntxwv Yau-as nrug cov pejxeem ntxeev sab tawmtsaam Xakhaliyas. Vaajntxwv has kuas cov pejxeem muab pobzeb ntaus Xakhaliyas tuag rua huv lub tshaav puam ntawm hauv ntej lub Tuamtsev.

²²Vaajntxwv tsi ncu txug Xakhaliyas txiv tej txaj ntsig zoo kws nwg tau ua lawm, nwg txhaj muab Xakhaliyas tua tuag lawm. Thaus Xakhaliyas yuav tuag, nwg has tas, “Thov kuas tug TSWV pum tej kws koj ua nuav hab rau txim rua koj.”

²³Xyoo ntawd thaus lub caij nplooj ntoos zeeg, cov tubrog Xilias txawm tuaj tua lub tebchaws Yudas hab lub nroog Yeluxalees. Puab muab cov thawjcoj tua tuag taag hab fuab tau tej khoom ntau heev coj moog rua peg lub nroog Damaxes lawm.

²⁴Txawm yog cov tubrog Xilias tsi coob los tug TSWV ca puab tua yeej cov tubrog Yudas kws coob heev, rua qhov cov Yudas tso tug TSWV kws yog puab cov Yawmkoob tug Vaajtswv tseg lawm. Qhov nuav yog Vaajtswv rau txim rua Yau-as.

²⁵Yau-as raug mob saab kawg le, thaus cov yeebncuab thim rov qaab lawm, nwg ob tug thawj tubrog txawm ntxeev sab hab muab nwg tua rua sau txaaj, pauj qhov kws nwg tua tug povthawj Yehauyadas tug tub. Luas coj nwg moog log rua huv Daviv lub nroog, tabsis tsi yog log rua ntawm cov vaajntxwv lub toj ntxaas.

²⁶(Obtug kws ntxeev sab rua Yau-as, yog Xanpas kws nwg nam hu ua Sime-as kws yog tuabneeg Amoos, hab yog Yehauxanpas, nwg nam hu ua Simelis kws yog tuabneeg Mau-am.)

²⁷Nwg cov tub, hab tej lug qha tshwm kws has txug nwg, qhov kws nwg txhim khu tug TSWV lub Tuamtsev, puavleej muab sau ca rua huv Phoo Ntawv kws teev cov vaajnxtwv lub neej lawm. Hab nwg tug tub Amaxiyas ua vaajntxwv hloov nwg chaw.