Read Hmong Njua 2 Xwmtxheej Vaajntxwv 25 Bible Online

2 Xwmtxheej Vaajntxwv 25 - Hmong Njua bible

2 Xwmtxheej Vaajntxwv 25

¹Thaus Amaxiyas ua vaajntxwv nwg noobnyoog muaj neeg nkaum tsib xyoos, hab nwg nyob huv lub nroog Yeluxalees kaav tau neeg nkaum cuaj xyoos. Nwg nam hu ua Yehauyadees kws nyob huv lub nroog Yeluxalees.

²Nwg ua lub neej lawv le tug TSWV sab nyam, tabsis nwg tsi ua kuas kawg sab kawg ntsws.

³Thaus nwg kaav lub tebchaws nyob ruaj lawm, nwg txawm muab ob tug nom kws tua nwg txiv tua povtseg huv tuabsi.

⁴Txawm le ntawd los nwg tsi tua obtug cov mivnyuas, nwg ua le ntawd txhaj lawv le tug TSWV tej lug saamfwm rua huv phoo ntawv kevcai kws Mauxes sau tseg has tas. “Tsi xob muab nam txiv tua vim mivnyuas tej kev txhum, hab tsi xob muab mivnyuas tua vim nam txiv tej kev txhum; tug twg ua txhum, tsuas tua tug ntawd xwb.”

⁵Vaajntxwv Amaxiyas sau taagnrho xeem Yudas hab xeem Npeenyamees cov txivneej ua tubrog lawv le tej cuab. Hab nwg tseem tsaa ib cov thawj saib ib txheeb leej, hab ib cov saib ib puas leej. Nwg sau cov kws muaj noobnyoog neeg nkaum xyoo rov sau, taagnrho yog muaj peb puas txheeb leej. Puab puavleej kawm kev ua rog, txawj nkaug muv, hab txawj siv dlaim thaiv nav ntaaj.

⁶Amaxiyas muab plaub taas nyaj ndlav tau ib puas txheeb leej tubrog Yixalayees tuaj paab puab.

⁷Tabsis muaj ib tug cev Vaajtswv lug tuaj has rua vaajntxwv has tas, “Koj tsi xob coj cov tubrog Yixalayees nuav nrug koj moog, rua qhov tug TSWV tsi nrug cov Yixalayees kws yog cov Efalayees.

⁸Koj xaav has tas, puab yuav tuaj paab kuas koj tug zug luj hab ntaus yeej rog, tabsis Vaajtswv yog tug kws ua kuas yeej lossis swb, nwg yuav ca yeebncuab tua yeej koj.”

⁹Amaxiyas nug tug cev Vaajtswv lug ntawd has tas, “Tabsis yuav ua le caag rua cov nyaj kws tub muab rua cov tubrog Yixalayees lawm?” Tug cev Vaajtswv lug teb has tas, “Tug TSWV yuav muab ntau tshaaj tej ntawd rua koj.”

¹⁰Yog le ntawd, Amaxiyas txhaj tso cov tubrog Yixalayees kws nwg ndlav tuaj rov moog tsev. Puab chim heev rua cov Yudas hab rov moog tsev lawm.

¹¹Amaxiyas ua sab tawv qhawv coj cov tubrog moog txug huv lub Haav Ntsev. Puab tua cov tubrog Edoos tuag kaum txheeb leej.

¹²hab nteg tau kaum txheeb leej. Puab coj cov kws puab nteg tau ntawd moog rua sau lub hauv tsua ntawm lub nroog Xelas, hab muab pov rua huv qaab tsuas tsoo pobzeb ua rua puab tuag taag.

¹³Thaus ntawd cov tubrog Yixalayees kws Amaxiyas tsi pub nrug nwg moog ntaus rog, txawm moog tua cov Yudas tej nroog kws nyob ntawm lub nroog Xamalis hab Npethes Hauloos ntu nruab nraab. Puab tua cov Yudas tuag peb txheeb leej hab fuab tau khoom ntau heev coj moog lawm.

¹⁴Thaus kws Amaxiyas moog tua yeej cov Edoos, nwg coj cov Edoos tej mlom lug teev, hab hlawv moov tshuaj tsw qaab rua tej mlom ntawd.

¹⁵Qhov kws nwg ua le nuav ua rua tug TSWV chim heev. Tug TSWV txhaj tso ib tug cev Vaajtswv lug moog has rua Amaxiyas has tas, “Vim le caag koj txhaj pe lwm tsaav tuabneeg tej vaajtswv kws tub paab tsi tau puab cov tuabneeg dlim ntawm koj txhais teg?”

¹⁶Thaus tug cev Vaajtswv lug tseem taabtom has, Vaajntxwv Amaxiyas txawm teb ndlais has tas, “Leejtwg tau tsaa koj ua vaajntxwv tug tuavxaam? Koj ca le tsum tsi xob has lug lossis yuav ca kuv muab koj tua povtseg?” Ua ntej kws tug cev Vaajtswv lug tso tseg nwg txawm has tas, “Kuv paub has tas, Vaajtswv tub txav txim sab yuav ua kuas koj puamtsuaj, rua qhov koj tau ua tej nuav hab tsi noog kuv lug.”

¹⁷Vaajntxwv Amaxiyas kws kaav tebchaws Yudas hab nwg cov tuavxaam ntxeev sab rua cov Yixalayees. Nwg txhaj tso xuv moog rua Vaajntxwv Yehau-as kws kaav tebchaws Yixalayees kws yog Yehau-ahas tug tub hab yog Yehus tug xeebntxwv, kuas tuaj nrug nwg sis tua.

¹⁸Tabsis Vaajtxwv Yehau-as tso tuabneeg moog has rua Amaxiyas has tas, “Muaj ib zag ib tsob ntoo xuavpaug kws nyob peg Roob Lenpanoos tso xuv tuaj rua tsob ntoo cab has tas, ‘Muab koj tug ntxhais rua kuv tug tub yuav ua quaspuj!’ Tabsis txawm muaj ib tug tsaj qus lug muab tsob ntoo xuavpaug ntawd tsuj kag rua huv aav lawm.

¹⁹Amaxiyas, nwgnuav koj khaav qhov kws koj tua yeej cov Edoos ua rua koj nto npe, koj ca le txaus sab hab nyob tuabywv huv tsev, vim le caag koj yuav nrhav teebmeem rua koj hab koj cov pejxeem kuas puamtsuaj?”

²⁰Tabsis Amaxiyas tsi noog Yehau-as tej lug, vim Vaajtswv pum zoo ca Amaxiyas ua tug swb, rua qhov nwg pe cov Edoos tej mlom.

²¹Yog le ntawd, Vaajntxwv Yehau-as kws kaav tebchaws Yixalayees txhaj tuaj tua Vaajntxwv Amaxiyas kws kaav tebchaws Yudas. Puab tuaj sis ntsib ntawm lub nroog Npethes Semes huv tebchaws Yudas.

²²Cov tubrog Yudas txhaj swb hab tsiv taag rov moog tsev lawm.

²³Yehau-as nteg tau Amaxiyas hab coj moog rua huv Yeluxalees. Yehau-as tsoo tug ntsaa yeej kws thaiv lub nroog txij ndlua ntawm lub Roojvaag Efalayees moog ti nkaus rua ntawm lub Roojvaag Ceg kaum, ntev le ib puas dlaaj.

²⁴Yehau-as coj tej nyaj, tej kub, tej cuabyeej huv lub Tuamtsev hab txhua yaam muaj nqes huv lub nroog kws nwg tshawb tau nrug cov tuabneeg kws nwg nteg tau moog rua peg lub nroog Xamalis lawm. Yehau-as tseem coj cov tuabneeg kws raug nteg nrug nwg moog hab.

²⁵Tom qaab kws Vaajntxwv Yehau-as kws kaav tebchaws Yixalayees tuag lawm, Amaxiyas tseem ua neej nyob tau kaum tsib xyoos ntxiv.

²⁶Dlua le lwm yaam kws Amaxiyas ua thaus chiv moog txug thaus xaus hab nwg kev tswjfwm, puavleej muab sau ca rua huv Phoo Ntawv Keebkwm kws teev cov Yudas hab cov Yixalayees tej vaajntxwv lub neej lawm.

²⁷Txij thaus Amaxiyas tso tug TSWV tseg, cov tuabneeg kws nyob huv lub nroog Yeluxalees txhaj pheej ntxeev sab rua nwg. Thaus kawg nwg tsiv moog rua huv lub nroog Lakhis, tabsis nwg cov yeebncuab caum qaab moog muab nwg tua tuag rua huv lub nroog ntawd.

²⁸Luas txhaj muab neeg thauj nwg rov lug rua huv lub nroog Yeluxalees, hab coj nwg moog log rua ntawm cov vaajntxwv lub toj ntxaas huv Daviv lub nroog.