Read Hmong Njua 2 Xwmtxheej Vaajntxwv 26 Bible Online

2 Xwmtxheej Vaajntxwv 26 - Hmong Njua bible

2 Xwmtxheej Vaajntxwv 26

¹Cov Yudas txawm muab Amaxiyas tug tub Uxiyas kws noobnyoog muaj kaum rau xyoo tsaa ua vaajntxwv hloov nwg txiv chaw.

²(Tom qaab kws Amaxiyas tuag lawm, Uxiyas rov moog txeeb tau lub nroog Elas hab muab txhim khu dlua tshab).

³Thaus Uxiyas ua vaajntxwv, nwg noobnyoog muaj kaum rau xyoo, hab nwg nyob huv lub nroog Yeluxalees kaav tau plaub caug ob xyoos. Nwg nam hu ua Yekauliyas kws nyob huv lub nroog Yeluxalees.

⁴Uxiyas coj lawv le nwg txiv tug yaam ntxwv, nwg ua hum tug TSWV sab nyam.

⁵Nwg ua lub neej fwm Vaajtswv lawv le Xakhaliyas qha nwg, Vaajtswv txhaj foom koob moov rua nwg lub neej vaammeej moog taag Xakhaliyas tam.

⁶Uxiyas moog tua cov Filitees. Nwg tsoo lub nroog Nkas, lub nroog Yanes, hab lub nroog Asedaus tej ntsaa yeej pob puag taag hab nwg xov ntsaa yeej thaiv tej nroog kws nyob ze lub nroog Asedaus, hab tej nroog huv tebchaws Filitees.

⁷Vaajtswv paab nwg tua yeej cov Filitees, cov Alav kws nyob huv Nkunpa-aas, hab cov Munis.

⁸Cov Amoos them nyaj hab kub ntau heev rua Vaajntxwv Uxiyas, nwg muaj fwjchim heev, hab nwg lub koob meej nrov nchaa moog txug tebchaws Iziv.

⁹Uxiyas ua tej chaw tsomfaaj rua ntawm lub Roojvaag Ceg kaum, rua ntawm lub Roojvaag Haav, hab rua ntawm tug ntsaa yeej kws nkhaus hlo huv lub nroog Yeluxalees.

¹⁰Hab nwg tseem ua ntau lub chaw tsomfaaj rua tom tej ntug nroog hab khawb ntau lub qhov rau dlej, rua qhov nwg muaj tsaj txhu coob heev nyob rua zaaj taw roob hab huv tej taj nraag saab nubpoob. Uxiyas nyam ua laj ua teb heev, nwg txhaj kuas cov pejxeem cog txiv maab txiv ntoo ntau heev rua sau tej laaj roob hab huv tej teb kws aav zoo.

¹¹Uxiyas muaj cov tubrog kws kawm tav kev tua rog coob heev. Vaajntxwv tug thawj tubrog Hananiyees hab ob tug teev ntawv kws yog Ye-iyees hab Ma-axeyas sau cov tubrog ntawd tej npe huv tuabsi ca rua huv ntawv.

¹²Taagnrho cov thawj tubrog muaj ob txheeb rau pua leej.

¹³Puab muaj peb puas xyaa txheeb tsib puas leej tubrog kws txawj tua rog heev, paab vaajntxwv tua nwg cov yeebncuab.

¹⁴Uxiyas muab tej cuabyeej ua rog, tsi has tej thaiv nav ntaaj, ntaaj, muv, lub mom hlau looj taubhau, tsho hlau, neevnti hab xub, hab qai zeb ntaus zeg hlua rua cov tubrog.

¹⁵Nyob huv lub nroog Yeluxalees, Uxiyas kuas luas ua tau ib cov cuabyeej tua xub vug hab ib cov tua pobzeb, tso rua sau tej chaw tsomfaaj, hab ntawm tej ceg kaum ntsaa yeej kws thaiv lub nroog. Uxiyas lub koob meej nrov nchaa moo lug moog rua txhua qhov hab muaj fwjchim heev, rua qhov Vaajtswv yog tug paab nwg.

¹⁶Thaus Uxiyas muaj fwjchim lawm, nwg txawm khaavtheeb heev, txhaj ua rua nwg raug puamtsuaj. Nwg ua txhum rua tug TSWV kws yog nwg tug Vaajtswv; nwg moog rua huv lub Tuamtsev hab hlawv moov tshuaj tsw qaab rua sau lub thaaj.

¹⁷Tug povthawj Axaliyas hab yim caum leej povthawj kws muaj zug hab sab tawv heev txawm lawv vaajntxwv qaab moog rua huv.

¹⁸Puab cheem vaajntxwv has tas, “Uxiyas, koj tsi muaj cai hlawv moov tshuaj tsw qaab fij rua tug TSWV; tsuas yog cov povthawj kws yog Aloos cov xeebntxwv kws tub ua kevcai ntxuav kuas huv lawm txhaj ua tau xwb. Koj ca le tawm huv qhov chaw dlawbhuv nuav moog. Koj tau ua txhum tawmtsaam tug TSWV kws yog Vaajtswv, mas koj yuav tsi tau txais koob moov ntawm Vaajtswv lawm.”

¹⁹Uxiyas tseem taabtom sawv ntawm lub thaaj fij ib saab huv lub Tuamtsev, hab tuav rawv lub taig rau moov tshuaj tsw qaab. Uxiyas chim heev rua cov povthawj, ces taamsim ntawd nwg lub hauvplaj txawm mob ruas tawg pleb nreeg.

²⁰Ces Axaliyas kws yog tug povthawj hlub hab cov povthawj saib ntsoov Uxiyas lub hauvplaj, ua rua puab ntshai kawg le. Puab txhaj ntab Uxiyas kuas ca le tawm huv lub Tuamtsev moog, Uxiyas txawm tawm ceev nrooj moog, rua qhov tug TSWV tub rau txim rua nwg lawm.

²¹Vaajntxwv Uxiyas mob ruas moog txug nub kws nwg tuag, vim nwg mob ruas, nwg txhaj nyob nwg ib lub tsev. Nwg moog tsi tau rua huv tug TSWV lub Tuamtsev le lawm. Nwg tug tub Yauthaas txhaj ua tug saib lub loog hab tswjfwm lub tebchaws.

²²Txhua yaam kws Vaajntxwv Uxiyas ua hab nwg tej kev tswjfwm, Yaxayas kws yog tug cev Vaajtswv lug kws yog Amauxes tug tub muab teev tseg ca lawm.

²³Uxiyas tuag hab luas coj nwg moog log ze rua ntawm cov vaajntxwv lub toj ntxaas, tabsis vim nwg mob ruas, luas tsi muab nwg log rua ntawm cov vaajntxwv lub toj ntxaas, hab nwg tug tub Yauthaas ua vaajntxwv hloov nwg chaw.