Read Hmong Njua 2 Xwmtxheej Vaajntxwv 28 Bible Online

2 Xwmtxheej Vaajntxwv 28 - Hmong Njua bible

2 Xwmtxheej Vaajntxwv 28

¹Thaus Ahas ua vaajntxwv nwg noobnyoog muaj neeg nkaum xyoo, hab nwg nyob huv lub nroog Yeluxalees kaav tau kaum rau xyoo. Ahas tsi ua lub neej zoo lawv le nwg yawmkoob kws yog Vaajntxwv Daviv, tabsis nwg ua tej kws tsi hum tug TSWV sab nyam,

²hab nwg ua lawv le cov vaajntxwv kws kaav tebchaws Yixalayees ua. Nwg muab tooj nchuav tau ib tug mlom Npa-aas,

³nwg moog hlawv moov tshuaj tsw qaab rua huv lub Haav Hinoos, hab muab nwg cov tub tua hlawv fij rua tej mlom lawv le cov tuabneeg kws tug TSWV muab ntab tawm huv lub tebchaws moog ua ntej kws cov Yixalayees lug nyob.

⁴Ahas tua tsaj hlawv fij hab hlawv moov tshuaj tsw qaab rua ntawm tej chaw teev dlaab kws nyob sau tej pov roob hab huv qaab tej tsob ntoo kws muaj nplooj ntxoov nyog.

⁵Vim Ahas tau ua txhum, tug TSWV kws yog nwg tug Vaajtswv txhaj ca cov Xilias tug vaajntxwv tuaj tua yeej nwg hab nteg cov Yudas coob heev coj moog rua peg lub nroog Damaxes lawm. Tug TSWV tseem ca cov Yixalayees tug Vaajntxwv Pekas kws yog Lemaliyas tug tub tuaj tua yeej Ahas. Hab nub ntawd cov tubrog Yudas kws yog cov muaj sab tawv raug tua tuag ib puas neeg nkaum txheeb leej. Tug TSWV kws yog puab cov yawmkoob tug Vaajtswv ca kuas muaj tej xwm nuav lug raug cov Yudas, rua qhov puab tau tso nwg tseg lawm.

⁷Ib tug tubrog Yixalayees hu ua Xikhalis yog tug tua Vaajntxwv Ahas tug tub Ma-axeyas. Axelikas kws yog tug nom saib lub loog hab Ekanas kws yog tug thawj tubrog ntawm Vaajntxwv.

⁸Txawm yog cov Yudas yog cov Yixalayees kwvtij los cov Yixalayees tseem nteg cov Yudas ob puas txheeb leej quaspuj hab mivnyuas, hab fuab khoom ntau yaam coj moog rua peg lub nroog Xamalis lawm.

⁹Audes kws yog tug TSWV tug cevlug kws nyob huv lub nroog Xamalis. Nwg tuaj ntsib cov tubrog Yixalayees kws coj cov Yudas kws puab nteg thaus puab lug txug ntawm ntug nroog. Nwg has rua puab tas, “Tug TSWV kws yog mej cov yawmkoob tug Vaajtswv chim heev rua cov Yudas, nwg txhaj ca mej moog tua yeej cov Yudas, tabsis qhov kws mej ua limham hab tua puab tuag, Vaajtswv tub nov lawm.

¹⁰Qhov kws mej coj cov Yudas tej quaspuj hab txivneej nraag lub nroog Yeluxalees lug ua mej qhev. Mej puas paub has tas yog mej ua txhum rua tug TSWV kws yog mej tug Vaajtswv?

¹¹Mej ca le noog kuv has! Cov kws mej nteg lug nuav yog mej cov kwvtij hab cov muam, mej yuav tso puab moog lossis ca tug TSWV chim hab rau txim rua mej?”

¹²Cov Efalayees plaub tug thawjcoj kws yog, Yehauhanaas tug tub Axaliyas, Mesilemaus tug tub Npelekiyas, Salumes tug tub Yehikiyas hab Helais tug tub Amaxas los tsi pum zoo qhov kws cov tubrog ua le ntawd.

¹³Puab has tas, “Mej tsi xob coj cov tuabneeg kws mej nteg ko lug rua huv lub nroog nuav! Peb tub ua txhum rua tug TSWV ua rua nwg chim heev, hab tsimnyog nwg rau txim rua peb lawm. Nwgnuav mej tseem yuav tsub kev txhum ntxiv rua peb hab los?”

¹⁴Yog le ntawd, cov tubrog txhaj muab cov Yudas kws puab nteg lug, muab tej khoom kws puab fuab tau lug cob rua cov numtswv hab cov pejxeem.

¹⁵Ces puab txawm tsaa plaub leeg ntawd ua cov saib hab faib tej rig tsho kws puab fuab tau lug, rua cov tuabneeg kws puab nteg lug. Muab tej rig tsho rua puab naav, muab tej khau khab rua puab rau, muab mov rua puab noj, hab muab dlej rua puab haus, hab muab roj txiv ntoo pleev puab tej qhov txhaab. Muab cov kws moog tsi taug kev caij neeg luav, hab coj taagnrho cov tuabneeg kws puab nteg lug ntawd rov moog rua nraag cov Yudas cheebtsaam aav ntawm Yelikaus kws yog lub nroog toovlaaj. Ces cov Yixalayees txhaj rov lug rua peg lub nroog Xamalis lawm.

¹⁶Cov Edoos rov tuaj tua cov Yudas hab nteg tau coob leej coj moog lawm. Yog le ntawd, Vaajntxwv Ahas txhaj moog thov Tilas Pelexes kws kaav tebchaws Axilias tuaj paab nwg.

¹⁸Tuab lub sijhawm ntawd cov Filitees txawm tuaj tua cov nroog kws nyob saab nubpoob ntawm tej taw roob hab huv tebchaws Yudas saab qaabteb. Puab txeeb tau lub nroog Npethes Semes, lub nroog Aiyaloos, lub nroog Kedelaus, hab lub nroog Xaukaus, lub nroog Teenas, hab lub nroog Nkixaus, nrug tej zog kws nyob ibncig hab puab ca le nyob huv tej nroog ntawd le lawm.

¹⁹Vim Vaajntxwv Ahas kws kaav tebchaws Yudas ua tsi ncaaj rua nwg cov pejxeem hab ua txhum rua tug TSWV. Tug TSWV txhaj tso kev txomnyem lug rua cov Yudas.

²⁰Tug vaajntxwv kws kaav tebchaws Axilias tsi tuaj paab Ahas tabsis nwg tuaj tua Ahas hab ua rua Ahas raug kev kub ntxhuv ntau yaam.

²¹Yog le ntawd, Ahas txhaj muab taagnrho tej kub huv lub Tuamtsev, huv lub loog hab sau taagnrho cov numtswv tej kub huv puab tej tsev moog rua tug vaajntxwv kws kaav tebchaws Axilias, txawm le ntawd los qhov kws nwg ua ntawd paab tsi tau nwg le.

²²Thaus kws Ahas raug teebmeem, nwg hajyam ua txhum rua tug TSWV heev dlua yaav taag lug.

²³Nwg tua tsaj fij rua cov Axilias tej vaajtswv kws ua rua nwg swb. Nwg has tas, “Cov Axilias tej vaajtswv ntawd tub paab cov Axilias cov vaajntxwv lawm, yog kuv tua tsaj hlawv fij rua tej vaajtswv ntawd, tej vaajtswv ntawd yuav paab kuv hab.” Qhov kws Ahas ua le nuav, ua rua nwg hab nwg lub tebchaws raug kev puamtsuaj xwb.

²⁴Ahas tseem muab tej khoom kws nyob huv lub Tuamtsev sau lug hab muab tsoo tawg taag. Nwg muab tug TSWV lub Tuamtsev kaw hab teeb tej thaaj fij rua txhua qhov huv lub nroog Yeluxalees.

²⁵Nwg ua tej chaw teev dlaab rua txhua lub nroog huv tebchaws Yudas hab hlawv tej moov tshuaj tsw qaab fij rua lwm tsaav tuabneeg tej vaajtswv. Qhov kws nwg ua le nuav ua rua tug TSWV kws yog nwg cov yawmkoob tug Vaajtswv chim heev rua nwg.

²⁶Txhua yaam kws Ahas ua hab nwg kev tswjfwm tebchaws, thaus pib moog txug thaus xaus, puavleej muab sau ca rua huv phoo Ntawv Keebkwm kws teev cov Yudas hab cov Yixalayees tej vaajntxwv lub neej lawm.

²⁷Vaajntxwv Ahas tuag hab luas coj nwg moog log rua huv lub nroog Yeluxalees, tabsis tsi yog log rua ntawm cov vaajntxwv lub toj ntxaas, hab nwg tug tub Hexekiyas ua vaajntxwv hloov nwg chaw.