Read Hmong Njua 2 Xwmtxheej Vaajntxwv 32 Bible Online

2 Xwmtxheej Vaajntxwv 32 - Hmong Njua bible

2 Xwmtxheej Vaajntxwv 32

¹Vaajntxwv Hexekiyas muaj lub sab ncaaj nceeg ua Vaajtswv teg num txhua yaam tav. Tom qaab ntawd Xenakhelis kws yog tug vaajntxwv kaav tebchaws Axilias txawm tuaj tua tebchaws Yudas. Nwg tub xub tuaj vij cov nroog kws muaj ntsaa yeej khov kho thaiv, hab kuas nwg cov tubrog tsoo tej ntsaa yeej moog rua huv lub nroog.

²Thaus Hexekiyas pum has tas, Xenakhelis yuav tuaj tua lub nroog Yeluxalees.

³Nwg hab nwg cov numtswv txav txim sab txhub tej qhovdlej saab nrau ntug nroog kuas thaus cov Axilias tuaj txug ntawm lub nroog Yeluxalees, kuas puab tsi tau dlej haus. Cov numtswv txhaj coj ib paab tubrog coob heev le moog meem tej qhovdlej tsi pub kuas dlej ndlwg tshwm qhov twg le.

⁵Vaajntxwv khu tug ntsaa yeej kws thaiv lub nroog tej ntu kws pob lawm, hab ua tej chaw tsomfaaj rua sau tug ntsaa yeej hab ua ib txheej ntsaa yeej rua saab nrau. Dlua le ntawd nwg khu tug ntsaa yeej kws thaiv Daviv lub nroog, hab nwg ua tau ib cov muv hab ib cov thaiv nav ntaaj ntau heev.

⁶Vaajntxwv tsaa ib cov thawj tubrog ua cov saib tej pejxeem hab kuas puab tuaj sis sau rua ntawm lub roojvaag lub chaw laas tshaav. Vaajntxwv has rua puab tas,

⁷“Mej ca le ua sab tawv qhawv hab tsi xob ntshai tug vaajntxwv kws kaav tebchaws Axilias hab nwg cov tubrog. Tug kws tuaj peb tog muaj zug dlua tug kws tuaj nwg tog.

⁸Nwg tug zug tsuas yog zug tuabneeg xwb, tabsis peb muaj tug TSWV kws yog peb tug Vaajtswv paab peb tua rog.” Vaajntxwv tej lug txhawb cov pejxeem zug heev.

⁹Tom qaab ntawd, thaus Xenakhelis tseem nyob huv lub nroog Lakhis, nwg tso xuv rua Vaajntxwv Hexekiyas hab cov Yudas has tas,

¹⁰“Kuv yog Xenakhelis kws yog tug vaajntxwv kaav tebchaws Axilias nug has tas, ‘Dlaabtsi ua rua mej tso sab nyob huv lub nroog Yeluxalees kws luas tub vij taag lawm?

¹¹Hexekiyas has rua mej tas, tug TSWV kws yog mej tug Vaajtswv yuav paab kuas mej dlim ntawm peb lub fwjchim, tabsis yog Hexekiyas dlaag mej, yuav ca mej tshaib plaab hab nqhes dlej tuag xwb.

¹²Nwg yog tug kws rhuav tej chaw pehawm tug TSWV, tej thaaj fij hab tseem has rua cov Yudas hab cov tuabneeg kws nyob huv lub nroog Yeluxalees tas, mej tsuas moog pehawm hab hlawv moov tshuaj tsw qaab rua sau tuab lub thaaj xwb.

¹³Mej puas tau paub tej kws kuv cov yawmkoob hab kuv tau ua rua lwm tsaav tuabneeg lawm? Cov tuabneeg ntawd tej vaajtswv puas paab tau puab dlim ntawm tug vaajntxwv kws kaav tebchaws Axilias?

¹⁴Thaus twg cov tebchaws ntawd tej vaajtswv paab tau puab tsaav tuabneeg dlim ntawm peb? Yog le ntawd, dlaabtsi ua rua mej xaav has tas, mej tug Vaajtswv yuav paab tau mej dlim?

¹⁵Nwgnuav mej tsi xob ca Hexekiyas dlaag tau mej hab coj mej yuam kev le ntawd. Mej tsi xob ntseeg nwg tej lug! Tsi muaj ib tsaav tuabneeg twg tug vaajtswv yuav cawm tau nwg tsaav tuabneeg dlim ntawm cov Axilias tug vaajntxwv txhais teg le. Yog le ntawd, mej tug Vaajtswv los yeej cawm tsi tau kuas mej dlim le hab!’ ”

¹⁶Cov Axilias cov numtswv has lug phem heev rua tug TSWV kws yog Vaajtswv hab rua Vaajntxwv Hexekiyas kws yog tug TSWV tug tubkhai.

¹⁷Xenakhelis sau ib tsaab ntawv tuaj thuam tug TSWV kws yog cov Yixalayees tug Vaajtswv has tas, “Lwm tsaav tuabneeg tej vaajtswv tub cawm tsi tau puab dlim ntawm kuv txhais teg, txawm yog Hexekiyas tug Vaajtswv los yeej cawm tsi tau nwg tsaav tuabneeg dlim ntawm kuv txhais teg le hab!”

¹⁸Cov Axilias cov numtswv ua lug Henplais tshev nrov nrov kuas cov tuabneeg Yixalayees kws tuaj nyob sau tug ntsaa yeej ntshai hab poob sab hab kuas puab txhaj txeeb tau lub nroog yoojyim.

¹⁹Puab has txug lub nroog Yeluxalees tug Vaajtswv ib yaam le puab has txug lwm tsaav tuabneeg tej vaajtswv kws yog tuabneeg txhais teg puab.

²⁰Ces Vaajntxwv Hexekiyas hab Yaxayas kws yog tug cev Vaajtswv lug kws yog Amauxes tug tub txawm quaj thov Vaajtswv paab.

²¹Tug TSWV txhaj tso ib tug timtswv tuaj tua cov Axilias cov numtswv hab cov tubrog tuag taag. Yog le ntawd, cov Axilias tug vaajntxwv txhaj rov qaab txaajmuag ntsuav rua peg tebchaws Axilias lawm. Muaj ib nub thaus nwg nyob huv lub tsev kws teev nwg tug vaajtswv, nwg ob tug tub txawm muab ntaaj tua nwg tuag lawm.

²²Yog le ntawd, tug TSWV txhaj cawm Vaajntxwv Hexekiyas hab cov tuabneeg huv lub nroog Yeluxalees dlim ntawm Xenakhelis kws kaav tebchaws Axilias hab ntawm lwm paab yeebncuab txhais teg. Tug TSWV ca cov Yudas nyob thaajyeeb lug tsi pub lwm tsaav tuabneeg tuaj tua puab.

²³Muaj tuabneeg coob nqaa khoom tuaj fij rua tug TSWV hab pub rua Hexekiyas huv lub nroog Yeluxalees. Yog le ntawd, txij ntawd lug txhua tsaav tuabneeg txhaj fwm Hexekiyas heev.

²⁴Thaus ntawd Vaajntxwv Hexekiyas mob nyaav hab yuav tuag. Nwg thov hab tug TSWV ua ib qhov cim qha rua nwg paub has tas nwg tug mob yuav zoo.

²⁵Tabsis Hexekiyas khaavtheeb heev, nwg tsi ncu tug TSWV tej txaj ntsig kws qha nwg ua zoo, tug TSWV txhaj chim rua nwg, rua cov Yudas hab rua cov tuabneeg kws nyob huv lub nroog Yeluxalees.

²⁶Hexekiyas leeg txim qhov kws nwg khaavtheeb, hab cov tuabneeg huv lub nroog Yeluxalees los leeg txim ib yaam nkaus, yog le ntawd tug TSWV txhaj tsi rau txim rua puab moog txug thaus Hexekiyas tuag.

²⁷Vaajntxwv Hexekiyas npluanuj, txhua tug txhaj fwm nwg heev. Vaajntxwv ua tau ib chaav tsev rau nwg tej nyaj tej kub, tej qai zeb muaj nqes, tej tshuaj tsw qaab, tej thaiv nav ntaaj hab lwm yaam kws muaj nqes.

²⁸Nwg ua tau ntau lub txhaab rau nplej, cawv txiv maab hab roj txiv ntoo, nwg ua ntau lub nkuaj kaw nwg tej nyuj, hab ua ntau lub nkuaj kaw nwg cov yaaj.

²⁹Vaajtswv foom koob moov rua Hexekiyas muaj yaaj, muaj nyuj hab muaj lwm yaam ntau heev, nwg txhaj rhawv tau ntau lub nroog.

³⁰Vaajntxwv Hexekiyas txhub tug dlej Kihoos hab khawb kwj tso ndlwg moog rua saab nubpoob ntawm Daviv lub nroog. Txhua yaam kws Hexekiyas ua puavleej vaammeej.

³¹Cov tuabneeg Npanpiloos tso ib cov numtswv tuaj nug Hexekiyas txug tej txujci kws tug TSWV ua huv nwg lub tebchaws. Vaajtswv ca Hexekiyas ua lawv le nwg sab nyam, rua qhov Vaajtswv xaav sim Hexekiyas sab.

³²Dlua le lwm yaam kws Vaajntxwv Hexekiyas ua, hab qhov kws nwg muab sab npuab tug TSWV, puavleej muab sau ca rua huv Amauxes tug tub Yaxayas kws yog tug cev Vaajtswv lug zaaj ywgtoog hab huv phoo Ntawv Keebkwm kws teev cov Yixalayees hab cov Yudas tej vaajntxwv lub neej lawm.

³³Hexekiyas tuag hab luas coj nwg moog log rua ntawm cov vaajntxwv lub toj ntxaas kws yog theem sab. Taagnrho cov Yudas hab cov tuabneeg huv lub nroog Yeluxalees, puavleej tuaj ua kevcai fwm thaus nwg tuag. Hab nwg tug tub Manaxes ua vaajntxwv hloov nwg chaw.