Read Hmong Njua 2 Xwmtxheej Vaajntxwv 33 Bible Online

2 Xwmtxheej Vaajntxwv 33 - Hmong Njua bible

2 Xwmtxheej Vaajntxwv 33

¹Thaus Manaxes ua vaajntxwv kaav tebchaws Yudas, nwg noobnyoog muaj kaum ob xyoos, hab nwg nyob huv lub nroog Yeluxalees kaav tau tsib caug tsib xyoos.

²Manaxes ua txhum rua tug TSWV, nwg ua kev phem kev qas ib yaam le cov tuabneeg kws tug TSWV muab ntab tawm huv lub tebchaws moog ua ntej nwg tsaav tuabneeg lug nyob lawm.

³Manaxes rov txhim khu tej chaw teev dlaab kws nwg txiv Hexekiyas muab rhuav taag lawm. Nwg ua ntau lub thaaj fij teev tug mlom Npa-aas hab puab tug mlom quaspuj Aselas ib yaam le Vaajntxwv Ahaj kws kaav tebchaws Yixalayees ua. Manaxes tseem pe tej nubqub hab.

⁴Manaxes ua ntau lub thaaj teev dlaab rua huv lub Tuamtsev, muab teeb rua ntawm qhov chaw kws tug TSWV has tas, tsimnyog ca ua qhov chaw rua suavdlawg pehawm nwg.

⁵Manaxes ua ntau lub thaaj rua ntawm ob lub tshaav puam ntawm lub Tuamtsev ua qhov chaw pe tej nubqub.

⁶Manaxes muab nwg cov tub tua hlawv fij rua huv lub Haav Hinoos. Nwg ua khawvkoob, ua yeegsiv, saib teg hab saib yaig. Manaxes ua txhum luj heev rua tug TSWV, tug TSWV txhaj chim rua nwg.

⁷Nwg muab tug mlom quaspuj Aselas lug teev rua huv lub Tuamtsev, ntawm qhov chaw kws tug TSWV has rua Daviv hab Daviv tug tub Xalumoos has tas, “Lub Tuamtsev huv lub nroog Yeluxalees nuav yog qhov chaw kws tug TSWV xaiv tawm ntawm kaum ob xeem Yixalayees lug ua qhov chaw rua suavdlawg tuaj pehawm kuv.

⁸Yog cov Yixalayees noog kuv lug hab ua lawv le tej kevcai kws kuv tug tubkhai Mauxes muab rua puab lawm, kuv yuav tsi pub kuas puab raug ntab tawm huv lub tebchaws kws kuv muab rua puab cov yawmkoob lawm.”

⁹Vaajntxwv Manaxes coj cov Yudas moog ua txhum luj tshaaj tej kev txhum kws lwm tsaav tuabneeg kws tug TSWV muab ntab tawm huv lub tebchaws moog ua ntej nwg tsaav tuabneeg lug nyob ua lawm hab.

¹⁰Txawm yog tug TSWV ntuag Manaxes hab nwg cov pejxeem los puab tsi noog tug TSWV tej lug le.

¹¹Yog le ntawd, tug TSWV txhaj ca cov tubrog Axilias tuaj tua lub tebchaws Yudas. Puab nteg tau Manaxes, muab khawb hlau chaws nwg qhovntswg hab muab saw hlau khi nwg caab moog rua tim tebchaws Npanpiloos lawm.

¹²Thaus Manaxes raug kev txomnyem le ntawd, nwg txhaj txu fwjchim hab tig rov lug cuag tug TSWV kws yog nwg tug Vaajtswv, hab thov tug TSWV paab nwg.

¹³Vaajtswv nov nwg tej lug thov hab teb nwg, tug TSWV tso nwg rov lug rua huv lub nroog Yeluxalees hab ca nwg kaav lub tebchaws dlua. Qhov nuav qha rua Manaxes paub has tas, tug TSWV yeej yog Vaajtswv tag.

¹⁴Dlhau ntawd lug, Manaxes txhim khu tug ntsaa yeej saab nrau kws thaiv Daviv lub nroog ntawm saab nubtuaj kuas sab ntxiv. Pib kag ntawm lub kaum huv lub haav kws ze lub qhovdlej Nkihoos kws nyob saab qaumteb moog rua ntawm lub Roojvaag Ntseg, hab moog rua ntawm lub nroog qhov chaw kws hu ua Aufes. Hab nwg tseem tso ib cov thawjcoj tej paab tubrog moog nyob txhua lub nroog kws muaj ntsaa yeej thaiv huv tebchaws Yudas.

¹⁵Nwg muab cov tuabneeg txawv tebchaws tej vaajtswv hab tej mlom kws puab tso rua huv lub Tuamtsev hab tej thaaj teev dlaab kws luas ua rua sau lub pov roob ntawm tug TSWV lub Tuamtsev hab huv lub nroog Yeluxalees, tshem coj moog povtseg huv tuabsi rua saab nrau ntug nroog.

¹⁶Nwg rov khu lub thaaj kws pehawm tug TSWV, nwg tua tsaj hlawv fij ua kev sis raug zoo hab ua tug TSWV tsaug rua sau lub thaaj ntawd. Nwg rov saamfwm rua cov Yudas txhua tug kuas pehawm tug TSWV kws yog cov Yixalayees tug Vaajtswv.

¹⁷Txawm le ntawd los cov tuabneeg tseem pheej moog tua tsaj hlawv fij rua lwm qhov chaw, tabsis yog puab fij rua tug TSWV kws yog puab tug Vaajtswv xwb.

¹⁸Dlua le lwm yaam kws Manaxes ua, nwg tej lug thov Vaajtswv, hab tej lug kws cov cevlug tuav tug TSWV kws yog cov Yixalayees tug Vaajtswv lub npe has rua nwg, puavleej muab sau ca rua huv phoo Ntawv Keebkwm kws teev cov Yixalayees cov vaajntxwv lub neej lawm.

¹⁹Vaajntxwv tej lug thov Vaajtswv, Vaajtswv teb nwg, nwg tej kev txhum hab tej kev phem kev qas kws nwg ua, tej thaaj teev dlaab, tej mlom quaspuj Aselas kws nwg nchuav, hab tej mlom kws nwg pe ua ntej kws nwg leeg txim, puavleej muab sau ca rua huv cov cev Vaajtswv lug phoo ntawv keebkwm lawm.

²⁰Manaxes tuag hab luas muab nwg log rua huv nwg lub loog, hab nwg tug tub Amoos ua vaajntxwv hloov nwg chaw.

²¹Thaus Amoos ua vaajntxwv kaav lub tebchaws Yudas, nwg noobnyoog muaj neeg nkaum ob xyoos, hab nwg nyob huv lub nroog Yeluxalees kaav tau ob xyoos.

²²Amoos ua txhum rua tug TSWV ib yaam le nwg txiv Manaxes ua ntaag, hab nwg pe tej mlom kws nwg txiv pe.

²³Tabsis nwg tsi txu fwjchim hab tsi tig rov lug cuag tug TSWV ib yaam le nwg txiv. Nwg hajyam ua txhum luj tshaaj nwg txiv.

²⁴Amoos ib tug numtswv ntxeev sab rua nwg, hab muab nwg tua tuag rua huv lub loog.

²⁵Cov Yudas muab cov tuabneeg kws tua Amoos tua povtseg, hab tsaa Amoos tug tub Yauxiyas ua vaajntxwv hloov nwg txiv chaw.