Read Hmong Njua 2 Xwmtxheej Vaajntxwv 34 Bible Online

2 Xwmtxheej Vaajntxwv 34 - Hmong Njua bible

2 Xwmtxheej Vaajntxwv 34

¹Thaus Yauxiyas ua vaajntxwv kaav tebchaws Yudas, nwg noobnyoog muaj yim xyoo, hab nwg nyob huv lub nroog Yeluxalees kaav tau peb caug ib xyoos.

²Yauxiyas ua lub neej lawv le tug TSWV sab nyam, nwg ua lawv le Vaajtswv tej kevcai, ib yaam le nwg yawmkoob Daviv ua.

³Thaus Yauxiyas ua vaajntxwv tau yim xyoo, nwg tseem hluas heev, nwg pib pehawm nwg yawmkoob kws yog Vaajntxwv Daviv tug Vaajtswv. Tau plaub xyoos tom qaab nuav nwg txawm muab tej chaw teev dlaab, tej mlom quaspuj Aselas hab lwm yaam rhuav povtseg huv tuabsi.

⁴Nwg has kuas nwg cov tuabneeg muab tej thaaj fij kws teev Npa-aas hab tej thaaj kws hlawv moov tshuaj tsw qaab kws nyob ze puab tsoo povtseg. Puab muab tej mlom quaspuj Aselas hab lwm yaam mlom zum ua moov coj moog nphoo rua cov tuabneeg kws pe tej mlom ntawd tej ntxaa.

⁵Nwg muab cov povthawj kws teev dlaab tej pobtxhaa coj lug hlawv rua sau tej thaaj kws puab teev dlaab. Nwg ua le ntawd kuas cov Yudas hab cov tuabneeg kws nyob huv lub nroog Yeluxalees rov ua tau tuabneeg huv.

⁶Nwg ua ib yaam le ntawd rua xeem Manaxes, xeem Efalayees, xeem Xime-oos, hab lwm lub nroog moog txug peg xeem Nathalis cheebtsaam aav.

⁷Nwg moog thoob plawg tebchaws Yixalayees kws nyob saab qaumteb hab tsoo tej thaaj, tej mlom Aselas, muab tej mlom zum ua moov, hab tsoo tej thaaj kws luas hlawv moov tshuaj tsw qaab tawg taag, nwg maam rov lug rua huv lub nroog Yeluxalees.

⁸Thaus Yauxiyas ua vaajntxwv tau kaum yim xyoo, tom qaab kws nwg ua kevcai ntxuav lub tebchaws hab lub Tuamtsev kuas huv hab tsi muaj kev pe dlaab lawm. Vaajntxwv Yauxiyas txhaj tso Axaliyas tug tub Safas, Ma-axeyas kws yog tug tswv nroog Yeluxalees, hab Yau-ahas tug tub Yau-as kws yog ib tug numtswv moog khu tug TSWV kws yog Vaajtswv lub Tuamtsev.

⁹Cov Levis kws zuv qhovrooj sau tej nyaj kws luas coj tuaj rua huv lub Tuamtsev, coj moog rua Hilekiyas kws yog tug Povthawj Hlub. (Cov nyaj ntawd yog puab sau ntawm cov Efalayees, cov Manaxes hab cov Yixalayees kws nyob saab qaumteb, cov Yudas, cov Npeenyamees hab cov tuabneeg kws nyob huv lub nroog Yeluxalees.)

¹⁰Luas muab cov nyaj ntawd rua peb tug kws saib cov tuabneeg khu lub Tuamtsev. Hab puab muab rua cov

¹¹kws txua ntoo hab cov ua tsev, coj moog yuav pobzeb hab ntoo lug khu tej tsev kws cov Yudas cov vaajntxwv muab tso tseg puamtsuaj taag lawm.

¹²Cov tuabneeg kws khu lub Tuamtsev ncaaj nceeg heev, plaub tug Levis kws saib cov tuabneeg ua num ntawd yog: Yahaj hab Aunpadiyas kws yog cuab Malalis, Xakhaliyas hab Mesulas kws yog cuab Kauhas. (Cov Levis ntawd puavleej txawj qoj suab nkauj.)

¹³Muaj dlua ib paab Levis ua cov saib tej khoom kws luas coj tuaj, hab saib tej paab tuabneeg kws ua num. Ibtxha ua cov ceev tej ntaub ntawv lossis ua cov zuv roojvaag.

¹⁴Thaus luas muab cov nyaj ntawd nqaa tawm huv chaav rau nyaj lug taag lawm, Hilekiyas pum tug TSWV phoo ntawv kevcai, yog phoo Kevcai kws Vaajtswv muab rua Mauxes.

¹⁵Nwg has rua Safas has tas, “Kuv moog pum phoo ntawv kevcai nuav nyob huv lub Tuamtsev.” Nwg txawm muab phoo ntawv rua Safas,

¹⁶hab Safas coj moog rua vaajntxwv. Nwg has rua vaajntxwv has tas, “Peb tub moog ua txhua yaam kws koj has rua peb ua ntawd tav taag lawm.

¹⁷Peb muab cov nyaj kws nyob huv lub Tuamtsev coj moog rua cov tuabneeg kws khu lub Tuamtsev hab cov thawj kws saib puab lawm.”

¹⁸Safas has tas, “Phoo ntawv nuav Hilekiyas muab rua kuv.” Ces Safas txawm muab nyeem rua vaajntxwv noog.

¹⁹Thaus vaajntxwv nov tej lug huv phoo ntawv kevcai ntawd, vaajntxwv nyuaj sab heev hab dlua rhe nwg lub tsho,

²⁰hab has rua Hilekiyas, Ahikas kws yog Safas tug tub hab Anpedoos kws yog Mikayas tug tub, has rua Safas kws yog tug teev ntawv hab Axayas kws yog tug kws nrug nraim vaajntxwv has tas,

²¹“Mej ca le paab kuv hab cov tuabneeg kws nyob huv tebchaws Yixalayees hab tebchaws Yudas nug tug TSWV txug tej lug huv phoo ntawv nuav saib qha le caag. Tug TSWV chim heev rua peb los tub yog peb cov yawmkoob tsi noog tug TSWV tej lug hab tsi ua lawv le tej lug kws sau rua huv phoo ntawv nuav kuas yuavtsum tau ua.”

²²Hilekiyas, Ahikas, Anpaus, Safas hab Axayas txawm moog cuag ib tug cev Vaajtswv lug kws yog quaspuj hu ua Hulidas kws nyob huv lub nroog Yeluxalees ceg kaum kws luas ua tshab. (Hulidas tug quasyawg hu ua Salumes kws yog Tivas tug tub hab yog Hahas tug xeebntxwv, nwg yog tug saib cov tsho ntev huv lub Tuamtsev.) Puab pav tej ntawd rua Hulidas noog,

²³nwg kuas puab rov moog cuag vaajntxwv,

²⁴hab has rua vaajntxwv has tas, tug TSWV has le nuav: “Kuv rau txim rua lub nroog Yeluxalees hab cov tuabneeg kws nyob huv lub nroog, lawv le tej lug kws sau tseg rua huv phoo ntawv kws vaajntxwv nyeem ntawd.

²⁵Puab tau tso kuv tseg hab moog tua tsaj hlawv fij rua lwm tsaav tuabneeg tej vaajtswv, kuv txhaj chim rua tej kws puab ua, hab kuv chim rua lub nroog Yeluxalees. Kuv tej kev chim yuav tsi xaam moog sai.

²⁶Kuv yog tug TSWV kws yog cov Yixalayees tug Vaajtswv, kuv has le nuav rua vaajntxwv: Thaus koj nov tej lug huv phoo ntawv nuav taag lawm,

²⁷koj leeg koj tej kev txhum hab txu fwjchim taabmeeg kuv, koj quaj tu sab hab dlua rhe koj lub tsho, thaus koj paub has tas, kuv yuav rau txim rua lub nroog Yeluxalees hab cov tuabneeg huv tuabsi. Tabsis vim kuv tub nov koj tej lug thov lawm,

²⁸kuv yuav tog kuas koj tuag tsaiv, kuv maam le rau txim rua lub nroog Yeluxalees. Kuv yuav ca koj tuag kaaj sab lug.” Puab txawm coj tej lug ntawd moog pav rua Vaajntxwv Yauxiyas noog.

²⁹Vaajntxwv Yauxiyas kuas cov Yudas tej thawjcoj hab cov tuabneeg kws nyob huv lub nroog Yeluxalees tuaj cuag nwg,

³⁰hab puab ua ke moog rua huv lub Tuamtsev, tsi has cov povthawj, cov Levis hab taagnrho cov pejxeem tug muaj tug pluag los moog huv tuabsi. Vaajntxwv nyeem taagnrho phoo ntawv coglug kws nrhav tau huv lub Tuamtsev rua suavdlawg noog.

³¹Vaajntxwv sawv ib saab ntawm tug ncej kws cov vaajntxwv ibtxwm sawv, coglug rua tug TSWV has tas, yuavtsum fwm nwg, ua lawv le nwg tej kevcai hab tej lug saamfwm kuas kawg sab kawg ntsws, hab ua kuas tau lawv le tej lug cog tseg kws sau rua huv phoo ntawv nuav.

³²Vaajntxwv has kuas cov Npeenyamees hab txhua tug kws tuaj rua huv lub nroog Yeluxalees coglug has tas, puab yuav ua lawv le puab tej lug cog tseg ntawd. Yog le ntawd, cov tuabneeg kws nyob huv lub nroog Yeluxalees txhaj ua lawv le tej lug kws puab tau cog rua puab cov yawmkoob tug Vaajtswv.

³³Vaajntxwv Yauxiyas rhuav tej mlom phem qas kws nyob huv cov Yixalayees lub tebchaws hab Yauxiyas kuas suavdlawg yuavtsum pehawm tug TSWV kws yog puab cov yawmkoob tug Vaajtswv moog taag nwg simneej le.