Read Hmong Njua 2 Xwmtxheej Vaajntxwv 35 Bible Online

2 Xwmtxheej Vaajntxwv 35 - Hmong Njua bible

2 Xwmtxheej Vaajntxwv 35

¹Lub ib hlis ntuj nub kaum plaub, Vaajntxwv Yauxiyas ua Kevcai Hlaa Dlhau huv lub nroog Yeluxalees qhuas tug TSWV; puab tua ntau tug tsaj ua rooj noj rooj haus.

²Vaajntxwv faib num rua cov povthawj ua huv lub Tuamtsev, hab txhawb puab zug kuas puab ua tau num zoo.

³Hab nwg has rua cov Levis kws qha cov Yixalayees kws puab muab puab fij rua tug TSWV lawm has tas, “Mej ca le muab tug TSWV lub Phijxaab coj moog tso huv lub Tuamtsev kws Daviv tug tub kws yog Vaajntxwv Xalumoos ua. Mej yuav tsi tau kwv lub Phijxaab nuav ib qho rua ib qho lawm, tabsis mej tsuas ua tug TSWV kws yog mej tug Vaajtswv teg num hab paab nwg tsaav tuabneeg Yixalayees xwb.

⁴Mej tej cuab, nyag ca le moog ua nyag teg num huv lub Tuamtsev lawv le Vaajntxwv Daviv hab nwg tug tub kws yog Vaajntxwv Xalumoos tau faib rua mej lawm,

⁵hab npaaj rawv tog paab cov Yixalayees txhua tsev tuabneeg.

⁶Mej yog cov kws tua tej yaaj hab tej tshis ua Kevcai Hlaa Dlhau. Nwgnuav mej ca le moog ua kevcai ntxuav kuas mej huv, mej txhaj fij tau cov kwvtij Yixalayees tej tsaj lawv le tug TSWV txuj kevcai kws qha rua Mauxes lawm.”

⁷Vaajntxwv Yauxiyas muab nwg cov tsaj peb caug txheeb tug yaaj, thaav yaaj hab tshis, hab peb txheeb tug txiv nyuj rua cov pejxeem tua ua Kevcai Hlaa Dlhau.

⁸Vaajntxwv cov numtswv los muab ntau yaam paab cov pejxeem, cov povthawj hab cov Levis tau siv. Tug Povthawj Hlub Hilekiyas, Xakhaliyas hab Yehiyees kws yog cov numtswv saib lub Tuamtsev muab ob txheeb rau pua tug thaav yaaj hab mivnyuas tshis hab peb puas tug txiv nyuj rua cov povthawj tua fij rua thaus ua lub rooj noj haus ntawd.

⁹Kaunaniyas, Semayas hab nwg tug kwv Nathanees, Hasanpiyas, Ye-iyees hab Yauxanpas kws yog cov Levis cov thawjcoj muab tsib txheeb tug thaav yaaj hab mivnyuas tshis hab tsib puas tug txiv nyuj rua cov Levis tua hlawv fij.

¹⁰Thaus npaaj txhua yaam ua Kevcai Hlaa Dlhau txhij lawm, cov povthawj hab cov Levis txawm moog sawv ntawm puab qhov chaw lawv le vaajntxwv has.

¹¹Tom qaab kws muab cov thaav yaaj hab mivnyuas tshis tua lawm, cov Levis muab laws tawv hab cov povthawj muab cov ntshaav nchus rua lub thaaj.

¹²Puab muab cov tsaj kws hlawv fij faib rua tej paab ntawm tej tsev tuabneeg, coj moog hlawv fij rua tug TSWV lawv le Mauxes txuj kevcai qha tseg. Cov nyuj los puab ua ib yaam nkaus le ntawd.

¹³Cov Levis muab cov thaav yaaj kws tua ua Kevcai Hlaa Dlhau coj moog ca hab muab cov nqaj kws ua kevcai fij dlawbhuv lug hau rua huv laujkaub, huv qhws, huv yag hab muab tej nqaj ntawd faib rua cov pejxeem.

¹⁴Tom qaab kws ua le nuav taag lawm, cov Levis maam faib nqaj rua puab hab cov povthawj kws yog Aloos cov xeebntxwv. Rua qhov cov povthawj tseem hlawv tej tsaj kws muab hlawv taagnrho hab hlawv tej roj fij moog txug thaus tsaus ntuj.

¹⁵Cov hu nkauj kws yog Axafes cov xeebntxwv moog sawv ntawm puab qhov chaw lawv le Vaajntxwv Daviv, Axafes, Hemaas hab Yeduthoos kws yog vaajntxwv tug cev Vaajtswv lug has tseg lawm. Cov Levis kws zuv lub Tuamtsev tej roojvaag, tsi taag yuav tso puab teg num tseg moog ua lwm yaam, rua qhov cov Levis tub npaaj Kevcai Hlaa Dlhau rua puab lawm.

¹⁶Yog le ntawd, nub ntawd puab ua txhua yaam tav taag, tsi has kev pehawm tug TSWV, Kevcai Hlaa Dlhau hab tua tsaj hlawv fij rua sau lub thaaj lawv le Vaajntxwv Yauxiyas has rua puab.

¹⁷Cov Yixalayees ua Kevcai Hlaa Dlhau, hab noj Ncuav tsi xyaw Keeb tau xyaa nub.

¹⁸Txij thaus tug cev Vaajtswv lug Xamuyees tam lug, tsi tau ua Kevcai Hlaa Dlhau luj le zag nuav. Cov vaajntxwv kws kaav taag lug lawm, tsi muaj ib tug ua Kevcai Hlaa Dlhau luj npaum le Vaajntxwv Yauxiyas, cov povthawj, cov Levis, cov Yudas, cov Yixalayees hab cov tuabneeg kws nyob huv lub nroog Yeluxalees ua zag nuav

¹⁹kws yog thaus Yauxiyas kaav tebchaws tau kaum yim xyoo lawm.

²⁰Tom qaab kws Vaajntxwv Yauxiyas ua tej nuav tav taag rua lub Tuamtsev lawm, Vaajntxwv Nekaus kws kaav tebchaws Iziv coj ib paab tubrog tuaj tua rog rua ntawm Kakhemis kws nyob ntawm tug Dlej Efalates. Yauxiyas txawm moog cheem Nekaus,

²¹tabsis Nekaus tso xuv tuaj rua Yauxiyas has tas, “Cov Yudas tug Vaajntxwv, kuv tuaj ua rog zag nuav, tsi txug koj yuav tuaj txuam yuaj. Kuv tuaj nuav tsi yog tuaj tua koj, tabsis tuaj tua kuv cov yeebncuab hab Vaajtswv kuas kuv ca le kawgkag moog. Vaajtswv tuaj kuv tog, koj tsi xob tuaj taabkaum kuv, nyob tsaam Vaajtswv ua rua koj puamtsuaj!”

²²Tabsis Yauxiyas tsi noog Vaajtswv tej lug kws has rua Vaajntxwv Nekaus, rua qhov nwg yeej npaaj sab tuaj sis tua ntaag. Yog le ntawd, Yauxiyas txawm hloov ua cuav moog sis tua huv lub taj Menkidaus.

²³Thaus puab taabtom sis tua, cov Iziv txhaj tua xub neevnti tuaj raug Vaajntxwv Yauxiyas. Nwg has rua nwg cov tubrog has tas, “Kuv raug mob saab heev lawm, ca le coj kuv moog.”

²⁴Puab tsaws nwg huv nwg lub tsheb neeg lug rua lwm lub tsheb neeg kws nyob ntawd, hab coj nwg lug rua huv lub nroog Yeluxalees. Yauxiyas tuag rua huv lub nroog Yeluxalees, hab luas coj nwg moog log rua ntawm cov vaajntxwv lub toj ntxaas. Thaus Yauxiyas tuag, taagnrho cov Yudas hab cov tuabneeg kws nyob huv lub nroog Yeluxalees puavleej quaj ntsuag.

²⁵Tug cev Vaajtswv lug Yelemis sau tau ib zaaj nkauj quaj ntsuag hu rua Vaajntxwv Yauxiyas. Zaaj nkauj ntawd ca le ua ib zaaj nkauj rua cov Yixalayees hu thaus tej txivneej lossis tej quaspuj ib tug twg tuag. Zaaj nkauj nuav muab sau tseg rua huv phoo nkauj quaj ntsuag.

²⁶Txhua yaam kws Yauxiyas ua, qhov kws nwg muab sab npuab tug TSWV, ua lawv le txuj kevcai,

²⁷hab nwg lub neej thaus pib moog txug thaus xaus puavleej muab sau ca rua huv phoo Ntawv keebkwm kws teev cov Yixalayees hab cov Yudas tej vaajntxwv lub neej lawm.