Read Hmong Njua 2 Xwmtxheej Vaajntxwv 36 Bible Online

2 Xwmtxheej Vaajntxwv 36 - Hmong Njua bible

2 Xwmtxheej Vaajntxwv 36

¹Cov Yudas xaiv Yauxiyas tug tub Yehau-ahas hab muab nwg tsaa ua vaajntxwv nyob huv lub nroog Yeluxalees.

²Thaus Yehau-ahas ua Vaajntxwv kaav tebchaws Yudas, nwg noobnyoog muaj neeg nkaum peb xyoos, hab nwg nyob huv lub nroog Yeluxalees kaav tau peb hlis.

³Vaajntxwv Nekaus kws kaav tebchaws Iziv tuaj nteg Vaajntxwv Yehau-ahas coj moog hab yuam kuas cov Yudas them xyaa txheeb tsib puas choj nyaj hab xyaa caum tsib choj kub rua nwg.

⁴Hab Vaajntxwv Nekaus tau tsaa Yehau-ahas tug tijlaug Eliyakees ua vaajntxwv kaav lub tebchaws Yudas, hab muab nwg hloov npe hu ua Yehauyakees. Nekaus coj Yehauyakees nrug nwg moog rua nraag tebchaws Iziv lawm.

⁵Thaus Yehauyakees ua vaajntxwv kaav tebchaws Yudas, nwg noobnyoog muaj neeg nkaum tsib xyoos, hab nwg nyob huv lub nroog Yeluxalees kaav tau kaum ib xyoos. Yehauyakees ua txhum rua tug TSWV kws yog nwg tug Vaajtswv.

⁶Vaajntxwv Nenpukajnexales kws kaav tebchaws Npanpiloos txhaj tuaj tua tebchaws Yudas hab nteg tau Yehauyakees, muab saw hlau khi coj moog rua tim tebchaws Npanpiloos lawm.

⁷Nenpukajnexales coj tej nyaj tej kub huv lub Tuamtsev ibtxha moog tso rua huv nwg lub loog kws nyob tim tebchaws Npanpiloos.

⁸Txhua yaam kws Yehauyakees ua, tsi has tej kev phem kev qas hab tej kev txhum kws nwg ua, puavleej muab sau ca rua huv Phoo Ntawv Keebkwm kws teev cov Yixalayees hab cov Yudas cov Vaajntxwv lub neej lawm, hab nwg tug tub Yehauyakhees ua vaajntxwv hloov nwg chaw.

⁹Thaus Yehauyakhees ua Vaajntxwv kaav tebchaws Yudas, nwg noobnyoog muaj kaum yim xyoo, hab nwg nyob huv lub nroog Yeluxalees kaav tau peb hlis hab kaum nub. Nwg ua txhum rua tug TSWV.

¹⁰Thaus lub caij nplooj ntoos hlaav, Vaajntxwv Nenpukajnexales txawm tuaj nteg Yehauyakhees moog rua tebchaws Npanpiloos, coj taagnrho tej nyaj tej kub huv lub Tuamtsev moog lawm. Ces nwg txhaj tsaa Yehauyakhees tug txiv ntxawm Xedekiyas ua vaajntxwv kaav cov Yudas hab cov tuabneeg kws nyob huv lub nroog Yeluxalees.

¹¹Thaus Xedekiyas ua vaajntxwv kaav tebchaws Yudas, nwg noobnyoog muaj neeg nkaum ib xyoos, hab nwg nyob huv lub nroog Yeluxalees kaav tau kaum ib xyoos.

¹²Nwg ua txhum rua tug TSWV, nwg tsi txu fwjchim, hab tsi noog Yelemis kws yog tug TSWV tug cevlug kws cev tej lug tseeb.

¹³Xedekiyas ntxeev sab rua Vaajntxwv Nenpukajnexales, tug kws yuam kuas Xedekiyas tuav Vaajtswv lub npe coglug has tas nwg yuav muab sab npuab Nenpukajnexales hab nwg muaj lub sab tawv tsi kaam leeg txim hab tig lug cuag tug TSWV kws yog cov Yixalayees tug Vaajtswv.

¹⁴Tsi yog le ntawd xwb, cov Yudas tej thawjcoj, cov povthawj hab cov tuabneeg ca le moog nrug tej tuabneeg kws nyob ibncig puab pe puab tej mlom, ua rua tug TSWV lub Tuamtsev kws dlawbhuv tsi huv lawm.

¹⁵Tug TSWV kws yog puab cov yawmkoob tug Vaajtswv khaiv cov cev Vaajtswv lug ntuag puab ua ntu zug, rua qhov nwg hlub nwg tsaav tuabneeg hab lub Tuamtsev.

¹⁶Tabsis puab saib tsi taug Vaajtswv cov cevlug, tsi quavntsej nwg tej lug hab luag cov cev Vaajtswv lug plig moog txug thaus tug TSWV chim rua nwg tsaav tuabneeg, puab txhaj tsiv tsi dlim tug TSWV txujkev rau txim le.

¹⁷Yog le ntawd, tug TSWV txhaj coj tug vaajntxwv kws kaav tebchaws Npanpiloos tuaj tua puab. Tug vaajntxwv ntawd tua cov Yudas tej tub hluas tuag pawg lug rua huv lub Tuamtsev. Nwg tsi taabncuab leejtwg le, tsi has tug laug tug hluas, quaspuj lossis txivneej, tug muaj mob lossis tug noj qaab nyob zoo. Vaajtswv muab puab txhua tug cob rua Vaajntxwv Nenpukajnexales teg.

¹⁸Tug vaajntxwv kws kaav tebchaws Npanpiloos muab tej nyaj huv lub Tuamtsev, muab vaajntxwv hab nwg cov numtswv tej nyaj kub, hab txhua yaam coj moog rua tim tebchaws Npanpiloos lawm.

¹⁹Nwg tis tawg hlawv lub Tuamtsev hab lub nroog Yeluxalees, vaajntxwv tej loog hab txhua yaam muaj nqes kws nyob huv tej loog kub nyab taag, hab tsoo tug ntsaa yeej kws thaiv lub nroog pob puag taag.

²⁰Nwg coj cov tuabneeg kws seem moog huv tuabsi rua tim tebchaws Npanpiloos. Puab ua nwg hab nwg cov xeebntxwv qhev moog txug thaus lub tebchaws Pawxias muaj vaajntxwv kaav.

²¹Yog le ntawd, txhaj muaj lawv le tug TSWV tej lug kws has rua Yelemis kws yog tug cev Vaajtswv lug has tas, “Lub tebchaws yuav nyob qhuav nkuag xyaa caum xyoo, kuas lub tebchaws muaj xyoo Xanpataus su, rua qhov puab tsi ca lub tebchaws su le.”

²²Thawj xyoo kws Xailas ua fuabtais kaav tebchaws Pawxias, tug TSWV txhaj ua kuas muaj lawv le nwg tau has rua Yelemis tug cev Vaajtswv lug lawm. Tug TSWV tshoov Xailas sab kuas ua lawv le tej lug saamfwm nraag nuav. Hab muab sau xaa moog nyeem nrov nrov rua tsoom pejxeem thoob plawg huv lub tebchaws kws Xailas kaav noog.

²³“Ntawm nuav yog Xailas kws yog tug fuabtais kaav tebchaws Pawxias tej lug saamfwm. Tug TSWV kws yog Vaajtswv, tug kws nyob sau ntuj tau tso kuv lug kaav taagnrho lub qaab ntuj nuav hab kuas kuv txhim khu lub Tuamtsev rua nwg nyob huv lub nroog Yeluxalees huv lub xeev Yudas. Nwgnuav mej cov kws yog Vaajtswv tsaav tuabneeg, mej ca le rov qaab moog rua mej lub tebchaws hab thov tug TSWV kws yog mej tug Vaajtswv nrug nraim mej.”