Read Hmong Njua 2 Xwmtxheej Vaajntxwv 5 Bible Online

2 Xwmtxheej Vaajntxwv 5 - Hmong Njua bible

2 Xwmtxheej Vaajntxwv 5

¹Thaus kws Vaajntxwv Xalumoos ua lub Tuamtsev txhua yaam tav lawm, nwg muab tej cuabyeej kws nwg txiv Daviv muab fij rua tug TSWV lawm tso rua huv chaav rau khoom huv lub Tuamtsev, tsi has tej nyaj tej kub hab lwm yaam.

²Vaajntxwv Xalumoos kuas cov Yixalayees tej thawjcoj ntawm tej xeem hab tej cuab tuaj rua huv Yeluxalees, kuas moog coj tug TSWV lub Phijxaab huv Xi-oos kws yog Daviv lub nroog lug tso rua huv lub Tuamtsev.

³Puab tuaj ua ke rua thaus lub sijhawm kws ua Kevcai nyob Tsev Pheebsuab.

⁴Thaus cov thawjcoj tuaj ua ke lawm, cov Levis tsaws lub Phijxaab

⁵kwv lug tso rua huv lub Tuamtsev. Cov povthawj hab cov Levis muab tug TSWV lub Tsevntaub sis ntsib lauj nqaa nrug tej cuabyeej txhua yaam lug rua huv lub Tuamtsev.

⁶Vaajntxwv Xalumoos hab cov Yixalayees tuaj sawv ntawm hauv ntej tug TSWV lub Phijxaab, puab tua yaaj hab tua nyuj ntau heev suav tsi txheeb le.

⁷Tom qaab ntawd cov povthawj maam le nqaa tug TSWV lub Phijxaab lug tso rua huv Chaav Dlawbhuv kawg nkaus, hab huv qaab ob tug qhelunpees ob phob tis.

⁸Ob tug qhelunpees ob phob tis nthuav lug roog lub Phijxaab hab ob tug laag ntoo huv tuabsi.

⁹Yog leejtwg sawv ntawm hauv ntej Chaav Dlawbhuv kawg nkaus saib moog txhaj le pum cov tw laag, tabsis yog nyob lwm qhov saib tuaj tsi pum le. (Cov laag ntoo ntawd tseem nyob lug txug naj nub nua.)

¹⁰Huv tug TSWV lub Phijxaab tsuas muaj ob dlaim txag zeb kws Mauxes muab tso rua huv thaus puab tseem nyob ntawm Roob Xinais. Ob dlaim txag zeb ntawd yog tug TSWV sau nwg tej lug cog tseg rua cov Yixalayees, thaus puab tsiv nraag tebchaws Iziv lug.

¹¹Taagnrho cov povthawj, tsi has paab twg, puavleej tawm huv chaav dlawbhuv tuaj ua kevcai ntxuav. Cov Levis kws ntaus nkauj nogncaas yog Axafes, Hemaas, Yeduthoos, hab cov kws yog puab tej cuab kwvtij. Puab suavdlawg puavleej naav ntaub maag sawv ntawm hauv ntej lub thaaj fij saab nubtuaj, puab tuav rawv lub nruag npuaj hab nkauj nogncaas, hab ib puas neeg nkaum leej povthawj tshuab xyu nrug puab. Cov hu nkauj hu dlhos cov suab xyu, suab raaj, suab nruag npuaj hab lwm yaam suab zoo heev qhuas tug TSWV has tas: “Ca le qhuas tug TSWV, rua qhov nwg yog tug kws zoo, hab nwg txujkev hlub nyob moog ibtxhis.” Taamsim ntawd muaj ib tauv fuab lug puv nkaus lub Tuamtsev, hab tug TSWV tug tshwjchim ci ntsaa ab, ua rua cov povthawj ua tsi tau tug TSWV teg num.