Read Hmong Njua 2 Xwmtxheej Vaajntxwv 8 Bible Online

2 Xwmtxheej Vaajntxwv 8 - Hmong Njua bible

2 Xwmtxheej Vaajntxwv 8

¹Xalumoos siv sijhawm neeg nkaum xyoo ua lub Tuamtsev hab nwg lub loog.

²Nwg txhim khu cov nroog kws Vaajntxwv Hilaas muab rua nwg hab tso cov Yixalayees moog nyob huv cov nroog ntawd.

³Nwg moog txeeb tau cheebtsaam Hamas hab Xaunpas,

⁴hab nwg txhim ntsaa yeej thaiv lub nroog Pamilas ua chaw rau khoom.

⁵Hab Xalumoos txhim khu cov nroog nuav: Lub nroog Npethes Hauloos Theem Sab hab lub nroog Npethes Hauloos Theem Qeg, (yog ob lub nroog kws muaj ntsaa yeej hab roojvaag thaiv),

⁶lub nroog Npa-alas hab taagnrho cov nroog kws nwg rau khoom, cov nroog kws nwg rau nwg tej neeg hab tej tsheb neeg. Nwg siv tug qauv nuav moog ua rua huv lub nroog Yeluxalees, huv lub tebchaws Lenpanoos hab thoob plawg rua txhua cheebtsaam kws nwg kaav.

⁷Xalumoos yuam cov tuabneeg Kana-aas kws cov Yixalayees tsi muab tua thaus puab lug nyob huv lub tebchaws ntawd, tsi has cov Hitis, cov Amaules, cov Pelixes, cov Hivis hab cov Yenpus ua qhev lug txug naj nub nua.

⁹Cov Yixalayees tsi raug yuam ua qhev, tabsis puab ua tubrog; ua tug thawj tsaav tsheb neeg, hab ua tubrog caij neeg.

¹⁰Xalumoos tsaa ob puas tsib caug leej ua cov thawj saib cov tuabneeg ua vaaj ua tsev.

¹¹Vaajntxwv Xalumoos coj nwg tug quaspuj kws yog cov Iziv tug vaajntxwv tug ntxhais huv Daviv lub nroog lug nyob rua huv lub tsev kws Xalumoos ua rua nwg tug quaspuj nyob. “Nwg yuavtsum tsi xob nyob huv cov Yixalayees tug Vaajntxwv Daviv lub loog, rua qhov txhua qhov kws tso tug TSWV lub Phijxaab rua puavleej dlawbhuv.”

¹²Xalumoos muab khoom hlawv rua lub thaaj kws nwg ua rua ntawm hauv ntej lub Tuamtsev fij rua tug TSWV.

¹³Nwg muab khoom fij lawv le txuj kevcai kws Mauxes sau tseg has txug tej nub su nuav: Nub Xanpataus, Nub ua Kevcai Hli Xab, Nub ua Kevcai noj Ncuav Tsi Xyaw Keeb, Nub Ua Kevcai Sau Qoobloo, hab Nub Ua Kevcai Nyob Tsev Pheebsuab kws naj xyoo ua.

¹⁴Nwg ua lawv le txuj Kevcai kws nwg txiv Daviv tau has tseg lawm, nwg faib num rua cov povthawj hab cov Levis kws yog cov hu nkauj, hab paab cov povthawj ua num txhua nub. Nwg faib num rua cov kws zuv lub Tuamtsev ua tej paab ua puab tej num ntawm roojvaag txhua nub lawv le Daviv kws yog Vaajtswv tug tuabneeg has tseg lawm.

¹⁵Hab puab ua lawv le Daviv tej lug kws nwg has rua cov povthawj hab cov Levis txug tej tsev rau khoom hab lwm yaam huv tuabsi.

¹⁶Txhua yaam kws Xalumoos ua puavleej ua tav taag rua lub sijhawm nuav, tsi has thaus chiv ua tug TSWV lub Tuamtsev, hab tej khoom kws siv rua huv lub Tuamtsev.

¹⁷Ces Xalumoos txawm moog rua huv lub nroog Exi-oosnkenpes hab Elas kws nyob ntawm ntug havtxwv huv tebchaws Edoos.

¹⁸Vaajntxwv Hilaas tso nwg ib cov numtswv saib cov tuabneeg kws tsaav nwg cov nkoj nrug Xalumoos cov numtswv. Puab tsaav nkoj moog rua tebchaws Aufiles hab thauj tau kaum rau taas kub lug rua Xalumoos.