Read Hmong Njua Exalas 1 Bible Online

Exalas 1 - Hmong Njua bible

Exalas 1

¹Thawj xyoo kws Xailas ua vaajntxwv kaav tebchaws Pawxias, tug TSWV txhaj ua kuas muaj lawv le nwg tau has rua Yelemis kws yog tug cev Vaajtswv lug lawm. Tug TSWV tshoov Xailas sab kuas ua lawv le tej lug saamfwm nraag qaab nuav, hab muab sau xaa moog nyeem nrov nrov rua cov pejxeem thoob plawg huv lub tebchaws kws Xailas kaav noog.

²“Ntawm nuav yog Xailas kws yog tug fuabtais kaav tebchaws Pawxias tej lug saamfwm. Tug TSWV kws yog Vaajtswv tug nyob sau ntuj tau tso kuv lug kaav taagnrho lub qaab ntuj nuav hab kuas kuv txhim khu lub Tuamtsev rua nwg nyob huv lub nroog Yeluxalees huv xeev Yudas.

³Thov Vaajtswv nrug nraim mej txhua tug kws yog nwg tsaav tuabneeg nyob. Mej ca le rov moog rua tim lub nroog Yeluxalees hab rov moog txhim khu tug TSWV kws yog cov Yixalayees tug Vaajtswv lub Tuamtsev dlua tshab. Nwg yog tug Vaajtswv kws mej pehawm nyob huv lub nroog Yeluxalees.

⁴Yog nwg tsaav tuabneeg ib leeg tug twg kws raug luas nteg coj moog lawm, xaav rov qaab lug, mas nwg cov tuabneeg zej zog nruab ze yuav tau paab nwg. Puab yuav tau muab nyaj muab kub, zaub mov noj hab neeg rua nwg thauj nwg tej nraa, coj lug fij rua Vaajtswv huv lub Tuamtsev kws nyob huv lub nroog Yeluxalees.”

⁵Ces cov thawjcoj ntawm tej cuab kwvtij ntawm xeem Yudas hab xeem Npeenyamees, cov Povthawj hab cov Levis, hab txhua tug kws Vaajtswv tau tshoov kuas muaj lub sab kub lug npaaj nrooj rov qaab moog txhim khu tug TSWV lub Tuamtsev huv lub nroog Yeluxalees dlua tshab.

⁶Taagnrho puab cov tuabneeg zej zog txawm nqeg teg nroog paab ntau yaam khoom rua puab lawv le nraag qaab nuav: Tej taig nyaj, taig kub, zaub mov noj, nyuj hab neeg thauj nraa, lwm yaam khoom siv kws muaj nqes hab tej khoom fij huv lub Tuamtsev.

⁷Fuabtais Xailas muab tej taig hab khob kws Fuabtais Nenpukajnexales tau coj huv lub Tuamtsev huv lub nroog Yeluxalees lug tso rua huv lub tsev kws nwg teev nwg tej mlom, rua puab nqaa huv tuabsi rov qaab.

⁸Fuabtais muab tej ntawd cob rua Miledas kws yog vaajntxwv tug tub ceev nyaj txag, Miledas muab tshuaj saib taag hab muab teev tseg ca rua huv ntaub ntawv hab nwg muab cob rua Senpaxas kws yog ib tug tswv xeev kaav lub xeev Yudas,

⁹muaj lawv le nuav: 1 Cov taig kub kws ca rau tej khoom fij muaj peb caug lub Cov taig nyaj kws ca rau tej khoom fij muaj ib txheeb lub Lwm yaam taig, muaj neeg nkaum cuaj lub Cov taig kub miv muaj peb caug lub Cov taig nyaj miv muaj plaub puas kaum lub Lwm yaam twj taig muaj ib txheeb lub.

¹¹Xaam taagnrho huv tuabsi muaj tsib txheeb plaub puas lub taig kub, taig nyaj hab lwm yaam twj taig kws muab cob rua Senpaxas coj nrug nwg hab nrug lwm tug kws raug nteg moog rua tim Npanpiloos nqaa rov qaab lug rua huv Yeluxalees.