Read Hmong Njua Exalas 3 Bible Online

Exalas 3 - Hmong Njua bible

Exalas 3

¹Thaus txug lub xyaa hli ntuj cov tuabneeg Yixalayees rov lug nyob taagnrho rua huv puab tej nroog. Ces puab txawm tuaj sis sau rua huv lub nroog Yeluxalees,

²Yauxadas tug tub Yesuas hab nwg cov phoojywg povthawj, hab Se-atees tug tub Xelunpanpees nrug nwg cov kwvtij, txhaj tau lug txhim khu cov Yixalayees tug Vaajtswv lub thaaj dlua tshab, kuas puab txhaj tau lub chaw hlawv tej khoom fij rua sau lawv le tej kevcai kws Mauxes tug kws yog Vaajtswv tug tuabneeg tau sau tseg lawm.

³Txawm yog cov kws rov qaab lug ntawd ntshai cov tuabneeg kws ibtxwm nyob huv lub tebchaws ntawd los puab ca le ua dlua ib lub thaaj tshab rua ntawm qhov qub chaw thaus u. Ces puab txawm naj taagkig hab naj mo pib muab khoom moog hlawv fij rua tug TSWV sau lub thaaj ntawd.

⁴Puab ua kevcai nyob tsev pheebsuab lawv le txuj kevcai kws tub muaj lug lawm. Txhua nub puab yeej muab khoom fij lawv le kws tau teev muaj tseg rua nub ntawd,

⁵hab dlua le ntawd ntxiv, puab tseem tua tsaj coj moog hlawv kheej ua khoom fij le ibtxwm muaj lug, hab tej tsaj kws coj moog fij ua rooj noj rooj haus rua nub xab ib, hab rua thaus kws taagnrho suavdlawg tuaj sis sau pehawm tug TSWV kws yog zoo sab hlo muab khoom fij pub rua tug TSWV.

⁶Txawm yog puab tseem tsi tau pib txhim khu lub Tuamtsev dlua tshab los puab ca le coj khoom tuaj fij rua tug TSWV, thaus lub xyaa hli ntuj nub xab ib le lawm.

⁷Cov tuabneeg muab nyaj tuaj them rua cov tuabneeg txaug pobzeb hab txua ntoo, muab zaub mov, dlej haus hab roj txiv ntoo, xaa moog rua peg lub nroog Tiles hab Xidoos, coj moog pauv tej ntoo cab peg tebchaws Lenpanoos, hab muab nkuam taug ntug dlej havtxwv tuaj rua ntawm lub nroog Yaupas. Taagnrho tej nuav puab tau ua lawv le Fuabtais Xailas kws kaav tebchaws Pawxias has kuas tso kev rua puab ua.

⁸Xyoo ob thaus lub ob hlis ntuj, tom qaab kws puab rov lug txug rua huv Vaajtswv lub Tuamtsev huv lub nroog Yeluxalees, Xelunpanpees kws yog Se-atiyees tug tub hab Yesuas kws yog Yauxadas tug tub nrug obtug cov kwvtij, cov povthawj, cov Levis hab txhua tug kws raug luas nteg coj moog hab tau rov lug rua huv lub nroog Yeluxalees, txhaj sis paab nqeg teg nroog ua num. Taagnrho cov Levis kws muaj noobnyoog neeg nkaum xyoo lossis tshaaj ntawd puavleej raug tsaa lug saib teg num kws txhim khu lub Tuamtsev.

⁹Cov Levis ntawd yog Yesuas hab nwg cov tub hab nwg cov kwvtij, Kamiyees hab nwg cov tub (kws yog Haudaviyas caajceg tsev tuabneeg) tau koom teg sis paab txhim khu lub Tuamtsev. (Cov Levis kws yog cuab Henadas tuaj paab huv tuabsi hab).

¹⁰Thaus cov tuabneeg chiv pua tug TSWV lub Tuamtsev lub plaag tsev, cov povthawj naav puab tej tsho ntev tuaj sawv ntawm puab tej chaw tuav rawv xyu ntawm teg, hab cov Levis kws yog cuab Axas los nqaa rawv nruag npuaj tuaj sawv ntawd hab. Puab ua tug TSWV tsaug lawv le tej kws Vaajntxwv Daviv tau qha tseg lawm.

¹¹Puab hu zaaj nkauj qhuas tug TSWV, hab rov hu ntxiv nqai tshooj has le nuav: “Tug TSWV yog tug zoo hab nwg txujkev hlub rua cov Yixalayees muaj nyob moog ibtxhis le.” Txhua leej txhua tug nyag qw kawg nyag lub zug, ua tug TSWV tsaug, rua qhov tub chiv pua tug TSWV lub Tuamtsev lub plaag tsev lawm.

¹²Thaus cov laug coob tug kws yog povthawj, cov Levis hab cov thawjcoj ntawm txhua cuab kwvtij kws puavleej tau pum thawj lub Tuamtsev, saib luas pua tug TSWV lub Tuamtsev lub plaag tsev, puab quaj tu sab kawg, tabsis lwm tug kws nyob ntawd kuj luag hab zoo sab heev.

¹³Tsi muaj leejtwg yuav noog tau tseeb, sov yog suab qw zoo sab los yog suab quaj tu sab, rua qhov tej suab kws puab qw ntawd nrov ntxhe moog dleb heev.