Read Hmong Njua Exalas 4 Bible Online

Exalas 4 - Hmong Njua bible

Exalas 4

¹Cov Yudas hab cov Npeenyamees cov yeebncuab nov has tas, cov tuabneeg kws raug nteg coj moog lawm, tau rov qaab lug hab txhim khu tug TSWV kws yog cov Yixalayees tug Vaajtswv lub Tuamtsev dlua tshab.

²Puab txawm tuaj cuag Xelunpanpees hab cov thawjcoj ntawm tej cuab kwvtij, hab has rua puab tas, “Thov ca peb nrug mej koom ua tug TSWV lub Tuamtsev hab. Peb yeej pe tuab tug Vaajtswv kws mej pe hab peb yeej ibtxwm muab khoom fij rua nwg txij thaus cov Axilias tug Vaajntxwv Exahadoos tso peb lug nyob rua ntawm nuav lawm.”

³Xelunpanpees, Yesuas hab cov thawjcoj ntawm tej cuab kwvtij has rua puab tas, “Peb tsi yuav mej paab peb ua lub Tuamtsev rua tug TSWV kws yog peb tug Vaajtswv, peb yuav ua peb xwb, peb yuav ua lawv le Fuabtais Xailas kws kaav tebchaws Pawxias tau saamfwm rua peb lawm.”

⁴Ces cov tuabneeg kws nyob huv lub tebchaws ntawd pheej nrhav kev hem hab ua kuas cov Yixalayees qaug zug tsi xob txhim khu lub Tuamtsev.

⁵Hab puab tseem ndlav cov numtswv Pawxias kuas ua tej yaam tawmtsaam cov Yixalayees. Puab pheej ua le ntawd moog taag ntu kws Fuabtais Xailas kaav tebchaws hab moog txug ntu kws Fuabtais Dali-us kaav tebchaws.

⁶Thaus Xawxes pib ua fuabtais kaav tebchaws, cov tuabneeg kws nyob huv lub xeev Yudas hab huv lub nroog Yeluxalees, tej yeebncuab tau sau ntawv tuaj nkaug hab tawmtsaam cov Yixalayees.

⁷Hab thaus kws Fuabtais Ataxawxes kaav tebchaws Pawxias, Npeselas, Miledas, Tanpees hab puab cov phoojywg tau sau ib tsaab ntawv moog rua fuabtais. Tsaab ntawv ntawd sau ua lug Alamais, hab maam le txhais thaus kws nyeem.

⁸Yog le ntawd, Lehumes kws yog tug tswv xeev hab Simesais kws yog tug teev ntawv huv lub xeev, txhaj sau ib tsaab ntawv ntsig txug lub nroog Yeluxalees moog rua Fuabtais Ataxawxes has le nuav:

⁹“Tuaj ntawm Lehumes kws yog tug tswv xeev, hab Simesais kws yog tug teev ntawv huv lub xeev, nrug rua cov kws thooj sab koom ntsws, cov txav txim hab txhua tug numtswv kws puavleej yog cov tuabneeg kws ibtxwm nyob huv lub nroog Elej, nyob huv lub nroog Npanpiloos hab nyob huv lub nroog Xuxas kws nyob huv tebchaws Elames,

¹⁰hab nrug Asunpanis, tug kws muaj zug hab muaj fwjchim heev kws lwm tsaav tuabneeg kws tsiv lug nyob rua huv lub nroog Xamalis, hab lwm qhov huv lub xeev kws nyob ntawm tug Dlej Efalates saab nubpoob.”

¹¹Puab xaa ib tsaab ntawv tuaj has le nuav: “Hawm txug Fuabtais Ataxawxes, tuaj ntawm nwg cov tubkhai kws nyob huv lub xeev ntawm tug Dlej Efalates saab nubpoob.

¹²“Peb xaav kuas koj kws yog fuabtais paub has tas, cov Yudas kws tau rov huv koj lub tebchaws lug nyob huv Yeluxalees, puab taabtom txhim khu lub nroog phem hab ntxeev sab ntawd. Puab tub chiv puab cov ntsaa yeej lawm mas tsi ntev yeej yuav tav ntaag.

¹³Fuabtais, yog puab rov txhim khu tau lub nroog ntawd hab ua tej ntsaa yeej tav, ntshai cov tuabneeg ntawd yuav tsi kaam them se lawm, ces fuabtais tej nyaj txag yuav tsawg quas zug.

¹⁴Rua qhov nwgnuav peb yog cov kws nyob qaab tswjfwm ntawm fuabtais, peb tsi xaav ca fuabtais poob ntsejmuag. Yog le ntawd, peb txhaj sau tsaab ntawv nuav tuaj qha rua fuabtais,

¹⁵koj ca le kuas luas tshawb tej ntaub ntawv kws koj cov yawmkoob tau muab khaws ca lawm. Yog koj ua le ntawd, koj yuav paub has tas, lub nroog ntawd yog lub nroog kws ibtxwm ntxeev sab hab yaav thaus u los lub nroog ntawd pheej tsim kev kub ntxhuv rua tej vaajntxwv hab rua tej tswv xeev. Cov tuabneeg kws nyob huv yeej ibtxwm tswjfwm nyuaj kawg. Vim le ntawd lub nroog txhaj raug puamtsuaj taag lawm.

¹⁶Peb thov qha rua fuabtais paub has tas, yog ca puab rov txhim khu tau lub nroog hab tej ntsaa yeej tav taag lawm, tsi ntev fuabtais yuav tsi tau ua tug kaav lub xeev kws nyob ntawm tug Dlej Efalates saab nubpoob lawm!”

¹⁷Fuabtais sau ntawv xaa moog teb puab le nuav: “Hawm txug Lehumes kws yog tug tswv xeev, Simesais kws yog tug teev ntawv huv lub xeev, cov kws nrug puab thooj sab koom ntsws kws nyob rua huv lub xeev Xamalis hab cov kws nyob tim tug Dlej Efalates saab nubpoob.

¹⁸“Tsaab ntawv kws mej xaa tuaj, tub muab txhais hab nyeem rua kuv noog taag lawm.

¹⁹Kuv tau tso tuabneeg moog tshuaj hab tshawb taag lawm, kuv pum has tas txij le thaus u lug, lub nroog Yeluxalees yeej ibtxwm tawmtsaam cov vaajntxwv hab yog ib lub nroog kws pheej ntxeev sab tsim kev kub ntxhuv tsi tseg le.

²⁰Cov vaajntxwv muaj fwjchim kws tau kaav lub nroog ntawd hab kaav taagnrho moog rua tim lub xeev kws nyob ntawm tug Dlej Efalates saab nubpoob, mas cov tuabneeg ntawd puavleej them se hab coj khoom tuaj pub rua puab.

²¹Yog le ntawd mej ca le txwv kuas cov tuabneeg ntawd tso tseg, tsi xob txhim khu lub nroog ntawd ntxiv moog txug thaus kuv tso lug, puab maam le rov ua.

²²Mej ca le maaj nrooj moog ua qhov nuav, tsi xob ua sab nyaav rua zaaj nuav. Ntshai nyob tsaam kev puamtsuaj yuav nthuav luj tuaj ua rua kuv raug kev txaajmuag.”

²³Thaus kws Lehumes, Simesais, hab puab cov thooj sab koom ntsws tau nyeem Fuabtais Ataxawxes tsaab ntawv taag lawm, puab txhaj ceev nrooj moog rua huv lub nroog Yeluxalees hab moog txwv kuas cov Yudas ca le tso tseg, tsi xob txhim khu lub nroog ntxiv lawm.

²⁴Ces puab txawm tso tseg tsi ua lub Tuamtsev, hab nyob tog moog txug thaus Dali-us ua fuabtais kaav tebchaws Pawxias tau ob xyoos.