Read Hmong Njua Exalas 5 Bible Online

Exalas 5 - Hmong Njua bible

Exalas 5

¹Thaus lub sijhawm ntawd muaj ob tug cevlug, Hakais hab Xakhaliyas. Xakhaliyas yog Idaus tug xeebntxwv txawm pib tuav cov Yixalayees tug Vaajtswv lub npe has rua cov Yudas kws nyob huv lub xeev Yudas hab cov kws nyob huv lub nroog Yeluxalees.

²Thaus kws Se-atiyees tug tub Xelunpanpees hab Yauxadas tug tub Yesuas nov dlheev tej lug ntawd, obtug txawm sawv tseeg rov moog pib ua lub Tuamtsev huv lub nroog Yeluxalees, hab ob tug cev Vaajtswv lug los kuj nqeg teg paab puab ua.

³Tuab lub sijhawm ntawd Tatenais kws yog tug tswv xeev kaav saab tim tug Dlej Efalates saab nubpoob, Sethas Npauxenais hab obtug cov numtswv, txawm tuaj rua huv lub nroog Yeluxalees hab has rua cov Yudas tas, “Leejtwg yog tug tso cai rua mej txhim khu lub Tuamtsev nuav hab tej cuabyeej siv ntawd?”

⁴Puab tseem nug taagnrho cov tuabneeg kws tuaj paab ua lub Tuamtsev ntawd tej npe huv tuabsi hab.

⁵Tabsis Vaajtswv yeej saib ntsoov cov Yudas tej thawjcoj, ces cov Pawxias txhaj txav txim sab tsi ua ib yaam dlaabtsi moog txug thaus puab sau ntawv moog rua Fuabtais Dali-us hab tau txais tej lug teb lawm.

⁶Ntawm nuav yog tsaab ntawv kws puab sau xaa moog rua fuabtais:

⁷“Hawm txug Fuabtais Dali-us, thov kuas koj kaav lub tebchaws nyob thaajyeeb lug.

⁸“Fuabtais, peb xaav kuas koj paub has tas, peb tau moog rua huv lub xeev Yudas hab pum puab taabtom muab tej laag zeb lug txhim khu Vaajtswv tug kws luj kawg nkaus lub Tuamtsev dlua tshab hab muab tej laag ntoo coj lug ntsa tuav tej phaab ntsaa. Puab rau sab ntso ua hab yeej yuav ua kuas tav tsi ntev nuav ntaag.

⁹“Hab peb tau nug cov tuabneeg ntawd cov thawjcoj kuas qha rua peb paub saib leejtwg yog tug tso cai rua puab txhim khu lub Tuamtsev ntawd?

¹⁰Peb tseem nug puab tej npe huv tuabsi kuas peb paub qha rua koj has tas, leejtwg yog tug thawjcoj txhim khu lub Tuamtsev.

¹¹“Puab teb has tas, ‘Peb yog Vaajtswv tug kws nyob sau ntuj hab huv nplajteb nuav cov tubkhai, hab peb taabtom txhim khu hab tsaa lub Tuamtsev nuav dlua tshab kws ntau xyoo taag lug lawm cov Yixalayees ib tug vaajntxwv kws muaj fwjchim luj dlua ndlais tub ua tseg lawm.

¹²Tabsis, vim peb cov yawmkoob tau ua rua Vaajtswv tug kws nyob sau ntuj chim, nwg txhaj le muab puab cob rua Nenpukajnexales kws yog tuabneeg Nkade-as kws ua vaajntxwv kaav lub nroog. Npanpiloos txhais teg, nwg txhaj tuaj muab lub Tuamtsev rhuav puamtsuaj taag, mas cov tuabneeg Yudas txhaj raug nteg coj moog rua tim tebchaws Npanpiloos lawm.

¹³Ces thawj xyoos kws Xailas ua fuabtais kaav lub nroog Npanpiloos, Xailas txhaj le sau ntawv tso cai rua peb kuas ca le rov txhim khu Vaajtswv lub Tuamtsev.

¹⁴Nwg thim tej taig kub hab taig nyaj kws Nenpukajnexales tau nqaa huv lub Tuamtsev huv lub nroog Yeluxalees moog tso rua huv lub tsev teev mlom huv lub nroog Npanpiloos huv tuabsi rov qaab. Fuabtais Xailas muab tej taig ntawd cob rua tug txivneej kws npe hu ua Senpaxas, tug kws nwg tsaa ua tug tswv xeev kaav cov Yudas.

¹⁵Fuabtais has rua nwg has tas, “Coj tej twj taig nuav rov qaab moog ca rua huv lub Tuamtsev kws nyob huv lub nroog Yeluxalees, hab ca le rov ua Vaajtswv lub Tuamtsev rua ntawm qhov qub chaw.”

¹⁶Yog le ntawd, Senpaxas txhaj tuaj chiv pua Vaajtswv lub Tuamtsev lub plaag tsev huv lub nroog Yeluxalees; peb tau chiv ua thaus ntawd lug txug taamsim nuav, tabsis tseem ua tsi tau tav.’

¹⁷“Fuabtais, yog koj pum zoo, nwgnuav ca le tshawb nrhav fuabtais tej ntaub ntawv huv lub nroog Npanpiloos, saib puas yog Fuabtais Xailas tau tso cai kuas rov txhim khu Vaajtswv lub Tuamtsev huv lub nroog Yeluxalees. Hab thov has qha rov tuaj rua peb paub, saib koj pum zoo le caag.”