Read Hmong Njua Exalas 6 Bible Online

Exalas 6 - Hmong Njua bible

Exalas 6

¹Fuabtais Dali-us saamfwm kuas moog tshawb fuabtais tej ntaub ntawv kws khaws tseg rua huv lub nroog Npanpiloos.

²Yog le ntawd, nyob huv lub nroog Enpatanas huv lub xeev Medias, puab nrhav tau thooj ntawv ntawd kws muaj lug sau tseg ca has le nraag nuav:

³“Thawj xyoo kws Fuabtais Xailas kaav tebchaws, nwg tau saamfwm kuas ca le rov txhim khu Vaajtswv lub Tuamtsev huv lub nroog Yeluxalees, txhaj tau qhov chaw fij khoom hab nqaa tej khoom tuaj hlawv fij. Lub Tuamtsev qhov sab yuavtsum yog rau caum tshim hab qhov dlaav yuavtsum yog rau caum tshim,

⁴cov phaab ntsaa peb txheej pobzeb twg yuavtsum muab ib txheej ntoo kem. Txhua yaam nqe yog muab nyaj huv vaajntxwv lub txhaab nyaj moog them.

⁵Taagnrho tej taig kub hab tej taig nyaj kws Fuabtais Nenpukajnexales coj huv lub Tuamtsev huv lub nroog Yeluxalees moog rua tim lub nroog Npanpiloos lawm, nqaa huv tuabsi rov lug tso rua ntawm tej qub chaw huv lub Tuamtsev huv lub nroog Yeluxalees.”

⁶Fuabtais Dali-us xaa cov lug teb has le nuav tas: “Txug Tatenais kws yog tug tswv xeev kws kaav ntawm tug Dlej Efalates saab nubpoob, Sethas Npuxenais hab mej cov numtswv kws nyob ntawm tug dlej Efalates saab nubpoob. “Mej tsi xob moog ze lub Tuamtsev,

⁷Hab tsi xob moog thaab cov tuabneeg kws ua tsev ntawd. Ca cov Yudas tug tswv xeev hab cov Yudas tej thawjcoj rov txhim khu Vaajtswv lub Tuamtsev rua ntawm qhov qub chaw thaus u.

⁸Dlua le ntawd, kuv saamfwm kuas mej ca le paab cov Yudas tej thawjcoj ua Vaajtswv lub Tuamtsev; muab tej nyaj se kws cov tuabneeg huv lub xeev kws nyob ntawm tug dlej Efalates saab nubpoob them tuaj coj moog them cov tuabneeg kws ua lub Tuamtsev, kuas teg num ntawd txhaj tsi tu ncua.

⁹Yaam twg kws cov povthawj huv lub nroog Yeluxalees xaav tau, tsi has ntsuag nyuj, laug yaaj, lossis tej thaav yaaj kws coj moog tua hlawv fij rua Vaajtswv tug kws nyob sau ntuj, tsi has nplej, ntsev, cawv txiv maab, lossis roj txiv ntoo pub rua puab ib nub dlhau ib nub tsi pub tu le.

¹⁰Mej yuavtsum tau ua le nuav, puab txhaj muaj tej khoom fij rua Vaajtswv tug kws nyob sau ntuj, hab thov nwg foom koob moov rua kuv hab kuv cov tub.

¹¹Kuv has ntxiv has tas, yog ib tug twg tsi noog tej lug saamfwm nuav, mas yuav muab nwg lub tsev ib tug qhaab rhu lug hlav ua muv nkaug nwg lub cev kuas tshaab. Hab muab nwg lub tsev rhuav kuas qaug ua ib pawg.

¹²Thov Vaajtswv tug kws xaiv lub nroog Yeluxalees nuav ca ua lub chaw pehawm nwg, txu tej vaajntxwv lossis tej tsaav tuabneeg kws xaav tsaa teg rhuav Vaajtswv lub Tuamtsev kws nyob huv lub nroog Yeluxalees ntawd. Kuv kws yog Dali-us tau tawm lug saamfwm le caag lawm, yuavtsum tau ua kuas lawv le kuv tej lug saamfwm txhua lu.”

¹³Tug tswv xeev Tatenais, Sethas Npauxenais hab cov numtswv tau ua lawv le fuabtais tej lug saamfwm ntawd.

¹⁴Idaus tug xeebntxwv Xakhaliyas hab Hakais kws yog ob tug cevlug, txhawb puab zug kawg le. Cov Yudas cov thawjcoj txhaj ua tau lub Tuamtsev sai heev. Puab ua lub Tuamtsev tav lawv le cov Yixalayees tug Vaajtswv tej lug saamfwm, hab lawv le Xailas, Dali-us hab Ataxawxes kws yog cov fuabtais kaav tebchaws Pawxias tau saamfwm kuas puab ua.

¹⁵Puab ua tau lub Tuamtsev tav taagnrho rua thaus lub hlis Adas nub xab peb kws Dali-us ua fuabtais kaav tebchaws tau rau xyoo.

¹⁶Ces taagnrho cov Yixalayees, cov povthawj, cov Levis hab cov tuabneeg kws raug nteg moog hab tau rov lug, muaj kev zoo sab heev hab muab lub Tuamtsev fij rua Vaajtswv.

¹⁷Thaus ua kevcai fij lub Tuamtsev ntawd, puab muab ib puas tug txiv nyuj, ob puas tug yaaj, hab plaub puas tug thaav yaaj coj lug tua fij, hab muab kaum ob tug tshis lug tua dlaws txim, ib tug rua ib xeem Yixalayees.

¹⁸Puab muab cov povthawj hab cov Levis faib lawv le teg num huv lub Tuamtsev huv lub nroog Yeluxalees, lawv le tej lug kws sau tseg rua huv Mauxes phoo ntawv lawm.

¹⁹Thaus cov tuabneeg kws raug luas nteg moog tau rov lug rua huv puab lub tebchaws lawm, xyoo tom qaab ntawd puab ua Kevcai Hlaa Dlhau rua mo kaum plaub lub ib hlis ntuj.

²⁰Taagnrho cov povthawj hab cov Levis puavleej ua kevcai ntxuav puab kuas huv lawv le kevcai. Cov Levis tua tsaj fij ua Kevcai Hlaa Dlhau rua cov tuabneeg kws tau rov lug, rua cov povthawj hab rua puab txhua tug huv tuabsi.

²¹Muab cov tsaj kws tua ua khoom fij ntawd faib rua cov tuabneeg kws tau rov lug nyob huv puab lub qub teb qub chaw, cov tuabneeg kws ibtxwm nyob huv lub tebchaws ntawd, cov tuabneeg kws tso kev pe mlom tseg hab cov tuabneeg kws tuaj koom kev pehawm tug TSWV kws yog cov Yixalayees tug Vaajtswv tau noj.

²²Puab ua kevcai noj ncuav tsi xyaw keeb zoo sab lomzem tau xyaa nub. Puab zoo sab heev rua qhov tug TSWV ua rua cov Axilias tug fuabtais txaus sab rua puab, nwg txhaj paab puab txhim khu cov Yixalayees tug Vaajtswv lub Tuamtsev dlua tshab.