Read Hmong Njua Exalas 7 Bible Online

Exalas 7 - Hmong Njua bible

Exalas 7

¹Tau ntau xyoo tom qaab ntawd, thaus kws Ataxawxes tseem ua fuabtais kaav tebchaws Pawxias, muaj ib tug txivneej npe hu ua Exalas. Nwg taug nwg tej yawmkoob caajceg rov qaab moog txug rua Aloos kws yog tug Povthawj Hlub lawv le nraag qaab nuav: Exalas yog Xelayas tub, Xelayas yog Axaliyas tub, Axaliyas yog Hilekiyas tub.

²Hilekiyas yog Saloos tub, Salumes yog Xadaus tub, Xadaus yog Ahitus tub,

³Ahitus yog Amaliyas tub, Amaliyas yog Axaliyas tub, Axaliyas yog Melai-us tub,

⁴Melai-us yog Xelahiyas tub, Xelahiyas yog Uxis tub, Uxis yog Npukis tub.

⁵Npukis yog Anpisuas tub, Anpisuas yog Finehas tub, Finehas yog Ele-axas tub, Ele-axas yog Aloos tub. Aloos yog tug Povthawj Hlub.

⁶Exalas tau rov tim tebchaws Npanpiloos lug. Exalas tau kawm paub tug TSWV kws yog cov Yixalayees tug Vaajtswv tej kevcai kws muab rua Mauxes sau tseg rua huv ntawv lawm. Rua qhov tug TSWV kws yog Exalas tug Vaajtswv tau foom koob moov rua nwg, fuabtais txhaj le muab txhua yaam rua nwg lawv le nwg tau thov lawm. Ces thaus Ataxawxes ua fuabtais kaav tebchaws tau xyaa xyoo lawm, Exalas txhaj le nrug ib paab Yixalayees, cov povthawj, cov Levis, cov ntaus suab nkauj, cov zuv roojvaag hab cov tuabneeg ua num huv lub Tuamtsev, suavdlawg rov tim Npanpiloos lug rua huv lub nroog Yeluxalees.

⁸Exalas lug txug huv lub nroog Yeluxalees yog thaus lub tsib hlis ntuj kws Ataxawxes ua fuabtais tau xyaa xyoo; Vaajtswv tau tsomkwm nwg sawv kev huv lub nroog Npanpiloos lug, yog thaus lub ib hlis ntuj nub xab ib, hab nwg lug txug rua huv lub nroog Yeluxalees, thaus lub tsib hlis ntuj, nub xab ib.

¹⁰Exalas muab nwg lub neej fij rua tug TSWV, kawm tug TSWV txuj kevcai, hab xyum ua nwg lub neej kuas lawv le txuj kevcai ntawd hab nwg muab tej kevcai hab tej kaab ke ntawd qha huv tuabsi rua cov pejxeem Yixalayees.

¹¹Fuabtais Ataxawxes muab tsaab ntawv nuav cob rua tug povthawj Exalas kws yog ib tug tub txawg tub ntse, nwg kawm paub thoob plawg tej kevcai hab tej lug saamfwm kws tug TSWV muab cob rua cov Yixalayees:

¹²“Tuaj ntawm Fuabtais Ataxawxes tuaj, txug tug povthawj Exalas, tug paub Vaajtswv kws yog tug nyob sau Ntuj tej Kevcai.

¹³“Kuv saamfwm kuas cov Yixalayees kws nyob thoob plawg huv kuv lub tebchaws, cov povthawj hab cov Levis kws raug tso nrug koj moog nyob rua tim lub nroog Yeluxalees.

¹⁴Kuv hab kuv cov tuavxaam xyaa leej, tso koj moog tshuaj saib cov tuabneeg kws nyob huv lub nroog Yeluxalees, huv xeev Yudas saib puab puas coj lawv le Vaajtswv txuj kevcai kws tub muab cob rua koj lawm.

¹⁵Koj ca le nqaa tej nyaj hab tej kub kws kuv hab kuv cov tuavxaam txaus sab muab fij rua cov Yixalayees tug Vaajtswv, ua nwg lub Tuamtsev nyob huv lub nroog Yeluxalees.

¹⁶Hab koj ca le nqaa taagnrho tej nyaj tej kub kws koj moog sau tau thoob plawg huv xeev Npanpiloos, hab nqaa tej nyaj kws cov Yixalayees hab cov povthawj coj tuaj fij rua puab tug Vaajtswv lub Tuamtsev kws nyob huv lub nroog Yeluxalees huv tuabsi nrug koj moog.

¹⁷“Koj yuavtsum ua tuab zoo siv tej nyaj txag nuav, koj muab yuav tej txiv nyuj, tej laug yaaj, tej thaav yaaj, nplej cawv txiv maab hab koj coj tej ntawd moog fij rua sau lub thaaj ntawm Vaajtswv lub Tuamtsev huv lub nroog Yeluxalees.

¹⁸Koj muab tej nyaj hab tej kub kws seem coj moog yuav tej kws koj hab cov tuabneeg zej zog nruab ze xaav siv ua yaam dlaabtsi los tau lawv le mej tug Vaajtswv pum zoo rua mej siv.

¹⁹Koj ca le nqaa tej taig kws peb tub muab cob rua koj lawm, coj moog rua Vaajtswv huv lub nroog Yeluxalees, txhaj tau siv huv Vaajtswv lub Tuamtsev.

²⁰Hab txhua yaam kws koj xaav yuav coj lug siv rua huv lub Tuamtsev, koj ca le moog rhu nyaj huv fuabtais lub txhaab nyaj lug siv xwb.

²¹“Kuv saamfwm rua cov numtswv tuav nyaj txag kws nyob huv lub xeev kws nyob ntawm tug Dlej Efalates saab nubpoob tas, yog tug povthawj Exalas kws kawm paub Vaajtswv tug nyob sau Ntuj txuj kevcai, tuaj thov yaam twg ntawm mej, mej ca le muab rua nwg lawv le nwg thov,

²²tsuas pub muab xyaa txheeb tsib puas choj nyaj, tsib puas kawm nplej, ib txheeb ib puas fwj cawv txiv maab, ib txheeb ib puas laamfwj roj txiv ntoo, hab ntsev muab ntau npaum le kws nwg xaav tau.

²³Yaam twg kws Vaajtswv tug kws nyob sau ntuj xaav tau, mej ca le muab kuas tau coj moog siv rua huv nwg lub Tuamtsev, kuas nwg txhaj tsi chim rua kuv hab kuv cov tub.

²⁴Txwv tsi pub mej moog sau se ntawm cov povthawj, cov Levis, cov ntaus suab nkauj, cov zuv lub Tuamtsev, cov kws tu lub Tuamtsev, lossis txhua tug kws ua num huv lub Tuamtsev.

²⁵“Exalas, koj ca le siv lub tswvyim kws koj tug Vaajtswv muab pub rua koj lug tsaa kuas muaj ib cov tuabneeg lug ua thawjcoj saib cov pejxeem, hab ib paab lug tu plaub ntug saib cov tuabneeg kws nyob ntawm tug Dlej Efalates saab nubpoob, kuas puab txhaj ua lub neej lawv le koj tug Vaajtswv txuj Kevcai. Koj yuavtsum qha txuj kevcai ntawd rua txhua tug kws tsi tau paub, kuas puab paub.

²⁶Yog leejtwg tsi coj lawv le koj tug Vaajtswv txuj kevcai, lossis tug fuabtais kws kaav lub tebchaws tej kevcai, nwg yuavtsum raug txim taamsim ntawd. Yuavtsum muab nwg tua povtseg lossis muab nwg ntab tsiv tawm huv lub tebchaws moog, lossis muab txhua yaam kws yog nwg tug txeeb kuas taag, lossis muab nwg coj moog kaw rua huv tsev lojcuj.”

²⁷Exalas has tas, “Ua tug TSWV kws yog peb cov yawmkoob tug Vaajtswv tsaug! Tug TSWV tshoov fuabtais sab kuas fwm tug TSWV lub Tuamtsev kws nyob huv lub nroog Yeluxalees.

²⁸Vim Vaajtswv txujkev hlub, nwg txhaj pub kuv ua tau hum fuabtais, nwg cov tuavxaam hab nwg tsoom numtswv kws muaj fwjchim luj sab nyam, tug TSWV kws yog kuv tug Vaajtswv txhawb kuv zug kawg nkaus le, kuv txhaj muaj cuabkaav has tau cov Yixalayees txhua tug thawjcoj ntawm txhua xeem nrug kuv rov lug.”