Read Hmong Njua Exalas 9 Bible Online

Exalas 9 - Hmong Njua bible

Exalas 9

¹Tom qaab kws ua tej ntawd tav taag lawm, cov Yixalayees cov thawjcoj qee leej tuaj qha rua kuv has tas, cov pejxeem Yixalayees, cov povthawj hab cov Levis tsi cais puab tawm ntawm tej tuabneeg zej zog kws yog cov Amoos, cov Mau-am hab cov Iziv lossis cov Kana-aas, cov Hitis, cov Pelixes, cov Yenpus hab cov Amaules. Puab pheej ua tej kev phem ib yaam le cov tuabneeg ntawd ua hab.

²Vim cov Yudas tau moog yuav lwm tsaav tuabneeg cov ntxhais lug ua quaspuj; yog le ntawd, puab txhaj ua rua tsaav tuabneeg dlawbhuv, nrug cov tuabneeg kws nyob huv lub tebchaws ntawd sis xyaw. Tej kev kws ua tsi ncaaj tsi nceeg nuav tub yog cov thawjcoj hab cov numtswv ntaus thawj ua ntaag.

³Thaus kuv nov txug tej ntawd, kuv txhaj le dlua rhe kuv lub tsho, dlob kuv tej plaubhau, tej fwjtxwv, hab nyob ua ntsejmuag mluag mlob tu sab kawg le.

⁴Kuv nyob qhov ntawd tu sab kawg moog txug lub caij fij khoom thaus yaav tsaus ntuj, hab cov pejxeem txawm pib tuaj sawv vij kuv. Taagnrho suavdlawg puavleej txhawj hab ntshai kawg, rua qhov cov Yixalayees tug Vaajtswv has txug cov tuabneeg kws raug nteg moog rua lwm lub tebchaws hab tau rov lug ntawd tej kev txhum.

⁵Thaus yuav tsaus ntuj kws txug lub caij fij tej khoom, kuv txhaj sawv ntawm qhov chaw kws kuv nyob ntawd moog, tabsis kuv tseem naav rawv kuv lub tsho kws kuv muab dlua ndluag taag ntawd, kuv txhaj txhus caug ndlua tsaa kuv ob txhais teg thov tug TSWV kws yog kuv tug Vaajtswv.

⁶Kuv thov has tas, “Vaajtswv, kuv txaajmuag kawg nkaus, kuv tsi tsaa taubhau saib tuaj rua ntawm koj qhov chaw nyob. Peb tej kev txhum sab tshaaj peb taubhau lawm hab; tej kev txhum ntawd sab nto ntuj lawm.

⁷Txij thaus peb cov yawmkoob lug txug naj nub nua, peb cov kws yog koj tsaav tuabneeg tau ua kev txhum luj kawg le. Vim peb tej kev txhum, txhaj ua rua peb, peb cov vaajntxwv hab cov povthawj poob moog rua tej vaajntxwv txawv tebchaws teg, peb txhaj raug luas tua, raug luas fuab hab raug luas nteg coj moog lawm.

⁸Tug TSWV kws yog peb tug Vaajtswv, tau ib nyuas ntu taag lug, koj tau taabncuab peb, ca peb kovyeej hab tsiv dlim ntawm txujkev ua luas qhev hab tau lug nyob thaajyeeb lug huv lub chaw dlawbhuv nuav. Koj tau coj peb tsiv tawm ntawm qhov chaw kws ua luas qhev lug hab pub peb muaj lub neej tshab.

⁹Peb tub poob moog ua luas qhev lawm, tabsis koj tsi ca peb ua luas qhev moog le. Koj txhaj tau tshoov Pawxias cov fuabtais sab kuas puab taabncuab peb, nyam peb hab ua ntawv tso cai rua peb rov lug nyob huv nuav hab txhim khu koj lub Tuamtsev kws pob puag taag lawm dlua tshab. Hab pub peb tau nyob thaajyeeb lug huv lub xeev Yudas hab huv lub nroog Yeluxalees.

¹⁰“Vaajtswv, nwgnuav peb yuav has tau dlaabtsi tom qaab kws tej xwm nuav tub tshwmsim muaj lawm? Vim peb rov tsi noog koj tej lug saamfwm

¹¹kws koj tau muab cob rua peb lug ntawm koj cov tubkhai kws yog cov cevlug. Puab qha rua peb has tas, lub tebchaws kws peb yuav moog txeeb nyob, yog lub tebchaws kws muaj kev tsi ncaaj nceeg, rua qhov cov tuabneeg kws nyob huv lub tebchaws ntawd ua kev phem kev qas puv nkaus saab tebchaws nuav moog ti nkaus saab tebchaws kawg tom u.

¹²Puab qha has tas, yog peb xaav ntsib kev tau zoo hab nyob kaaj sab lug huv lub tebchaws ntawd, hab xaav tau lub tebchaws ntawd rua peb tej xeebntxwv nyob moog ibtxhis, kuas peb tsi xob pub peb tej tub tej ntxhais moog yuav cov tuabneeg ntawd tej tub tej ntxhais, hab tsi xob txhawb puab tej kev vaammeej lossis txujkev tau zoo hlo le.

¹³Txawm yog has tas peb tub raug txim vim tej kev phem kev qas kws peb tau ua hab tej kws peb tau yuam kev ua txhum luj heev ntawd los peb paub tseeb has tas, koj kws yog peb tug Vaajtswv tub tsi tau rau txim kuas tsimnyog tej kev txhum kws peb ua ntawd, hab koj tseem ca peb muaj sa nyob.

¹⁴Sov yog vim le caag peb ca le tsi quavntsej koj tej lug saamfwm hab ca le moog yuav cov tuabneeg kws phem ntawd tej ntxhais lug ua quaspuj lawm hab? Yog peb tau ua lawm tag, koj yuav chim heev rua peb hab rhuav kuas peb puamtsuaj taag tsi pub ib tug seem le.

¹⁵Tug TSWV kws yog cov Yixalayees tug Vaajtswv, koj yog tug kws ncaaj nceeg, tabsis koj tseem ca peb muaj sa nyob. Peb leeg peb tej kev txhum rua koj; yeej tsi tsimnyog peb tuaj tshwm ntawm koj lub xubndlag.”