Read Hmong Njua Nehemis 1 Bible Online

Nehemis 1 - Hmong Njua bible

Nehemis 1

¹Zaaj nuav yog Hakaliyas tug tub Nehemis tej lug. Thaus Ataxawxes ua fuabtais kaav tebchaws Pawxias tau neeg nkaum xyoo tim nkaus rua lub hli Kislev, kuv kws yog Nehemis, tseem nyob huv lub tuamceeb nroog Susas.

²Hananis kws yog kuv ib tug tijlaug, nrug ib paab tuabneeg tuaj tim tebchaws Yudas tuaj txug, hab kuv nug puab txug lub nroog Yeluxalees hab peb cov kwvtij Yudas kws luas tso tawm huv lub nroog Npanpiloos moog lawm.

³Puab qha rua kuv has tas, cov tuabneeg kws seem hab dlim tau rov lug nyob rua huv puab tej qub teb qub chaw, mas txomnyem kawg le, hab cov tuabneeg txawv tebchaws kws nyob ze puab, ua saib tsi taug puab le. Hab puab tseem qha rua kuv has tas, tug ntsaa yeej thaiv lub nroog Yeluxalees los pob puag taag, hab tej roojvaag los yeej tsi tau khu ib lub le, txij thaus luas muab hlawv lug txug naj nub nua.

⁴Thaus kuv nov dlheev txug txhua yaam kws has nuav, kuv ca le nyob tsawg ndlua quaj. Kuv nyuaj sab hab quaj tau ob peb nub, tsi noj ib qho mov le. Kuv txhaj thov Vaajtswv has tas,

⁵“Tug TSWV kws yog Vaajtswv tug nyob sau Ntuj! Koj yog tug kws muaj fwjchim luj, hab peb suavdlawg fwm koj nkaus xwb. Koj yog tug kws ncaaj nceeg hab ua lawv le koj tej lug cog tseg rua cov tuabneeg kws muab sab npuab koj, hlub koj hab ua lawv le koj tej lug saamfwm.

⁶Tug TSWV, thov koj tsaa qhovmuag saib kuv, hab tig qhovntsej noog tej lug kws kuv naj nub naj mo thov koj paab cov tubkhai kws yog tsaav tuabneeg Yixalayees. Kuv thov leeg tej kev txhum kws peb cov tuabneeg Yixalayees tau ua rua koj lawm. Kuv cov yawmkoob hab kuv los tau ua txhum rua koj lawm hab.

⁷Peb tau ua txhum rua koj luj kawg nkaus, hab tsi tau ua lawv le koj tej lug saamfwm ib nyuas qhov le. Peb tsi coj lawv le koj tej Kevcai kws koj muab cob rua peb lug ntawm koj tug tubkhai Mauxes hlo le.

⁸Nwgnuav thov koj ncu ntsoov tej lug kws koj tau cog tseg rua Mauxes has tas: ‘Yog mej cov tuabneeg ua tsi ncaaj tsi nceeg rua kuv, kuv yuav muab mej ntab moog nyob xyaw luas lwm tsaav tuabneeg.

⁹Tabsis yog has tas, mej tig rov lug cuag kuv hab ua lawv le tej lug kws kuv saamfwm rua mej lawm, ces txawm yog mej moog nyob rua qaab ntuj kawg lawm los kuv yuav coj mej rov lug nyob qhov chaw kws kuv tub xaiv tseg ca rua mej tau pehawm kuv lawm.’

¹⁰“Tug Tswv, puab yog koj cov tubkhai hab yog koj tsaav tuabneeg ntaag. Koj tub tau cawm puab dlim lug ntawm koj lub fwjchim hab koj tug zug kws luj kawg nkaus.

¹¹Nwgnuav thov koj noog kuv tej lug thov hab lwm tug kws yog koj cov tubkhai kws fwm koj tej lug thov. Nub nua thov koj pub kuas kuv tau txais kev vaammeej, hab thov koj tshoov fuabtais sab kuas nwg muaj lub sab taabncuab kuv.” Lub sijhawm ntawd kuv yog tug laub cawv txiv maab rua fuabtais haus.