Read Hmong Njua Nehemis 10 Bible Online

Nehemis 10 - Hmong Njua bible

Nehemis 10

¹Thawj tug kws suam npe rua dlaim ntawv ntawd yog tug tswv xeev kws yog Hakaniyas tug tub Nehemis ntaag. Hab cov tuabneeg kws muaj npe le nraag nuav yog cov kws tau nrug suam npe rua dlaim ntawv ntawd:

²Cov Povthawj: Xelayas, Axaliyas, Yelemis, Pasehus, Amaliyas,, Makhiyas, Hatus, Senpaniyas, Malus, Halimes, Melemaus, Aunpadiyas, Daniyees, Nkenethoos, Npalus, Mesulas, Anpiyas, Miyamees, Ma-axiyas, Npelenkais hab Semayas.

⁹Cov Levis: Yesuas kws yog Axaniyas tug tub, Hanadas cuab kwvtij yog Npinu-is Kamiyees, Senpaniyas, Haudiyas, Kelitas, Pelayas, Hanas, Mikas, Lehus, Hasanpiyas, Xakules, Selenpiyas, Senpaniyas, Haudiyas, Npanis hab Npeninus.

¹⁴Cov pejxeem cov thawjcoj: Palauses, Pahas Mau-am, Elames, Xatus, Npanis, Npunis, Axenkas, Npenpais, Adauniyas, Npivais, Adines, Ates, Hexekiyas, Axules, Hudiyas, Hasus, Npexais, Halifes, Anathaus, Nenpais, Mankipiyas, Mesulas, Hexiles, Mesexanpees, Xadaus, Yaduas, Pelatiyas, Hanas, Anayas, Hauseyas, Hananiyas, Hasus, Haluhes, Pilehas, Saunpes, Lehumes, Hasanas, Ma-axeyas, Ahiyas, Hanas, Anas, Malukhes, Halimes hab Npa-anas.

²⁸Peb cov kws yog cov pejxeem Yixalayees, cov povthawj, cov Levis, cov zuv lub Tuamtsev, cov hu nkauj huv lub Tuamtsev, cov ua num huv lub Tuamtsev hab cov kws coj Vaajtswv txuj kevcai tau muab puab cais tawm ntawm lwm tsaav tuabneeg kws nyob huv peb lub tebchaws. Peb nrug peb cov quaspuj hab cov mivnyuas kws luj paub qaabhau lawm tuaj sis sau ua ke

²⁹koom nrug peb cov thawjcoj coglug, yog peb tsi coj lawv le tej lug cog tseg ntawd, thov kuas peb raug lu lug foom tsi zoo. Peb yuavtsum ua peb lub neej lawv le Vaajtswv txuj kevcai kws nwg tau muab cob rua nwg tug tubkhai Mauxes. Peb yuavtsum noog tug TSWV kws yog peb tug Vaajtswv tej lug saamfwm; hab peb yuavtsum ua lawv le nwg tej kevcai hab tej kaab ke.

³⁰Peb yuav tsi moog yuav lwm tsaav tuabneeg cov ntxhais lug rua peb cov tub, hab peb yuav tsi muab peb cov ntxhais qua rua puab tej tub lawm.

³¹Yog cov tuabneeg txawv tebchaws, coj qoobloo lossis lwm yaam tuaj muag rua peb nub Xanpataus lossis tej nub tseemceeb, peb yuav tsi yuav puab tej khoom ntawd. Xyaa lub xyoo twg, peb tseg ib xyoos tsi cog qoobloo rua huv peb tej teb, hab peb yuav zaam tej nuj nqes rua cov tuabneeg kws tshuav peb nqe.

³²Txhua xyoo twg, peb yuav tau muab nyaj ib feem peb ntawm ib laag coj moog siv rua huv lub Tuamtsev.

³³Peb yuav muab khoom moog siv rua huv lub Tuamtsev pehawm Vaajtswv lawv le nraag nuav: Cov ncuav dlawbhuv, tej qoobloo kws naj nub coj moog fij, tej tsaj kws naj nub coj moog tua hlawv ua khoom fij, tej khoom fij dlawbhuv rua Nub Xanpataus, kevcai noj haus Nub Xab Ib, hab lwm yaam kevcai noj haus, lwm yaam khoom fij kws dlawbhuv, tej khoom fij kws dlaws cov Yixalayees tej kev txhum, hab lwm yaam kws yuavtsum siv rua huv lub Tuamtsev.

³⁴Txhua xyoo twg, cov pejxeem, cov povthawj hab cov Levis, yuav rhu ntawv, kuas paub tseeb has tas, saib cuab kwvtij twg yog cuab kws yuav tau npaaj tawg lug hlawv tej khoom fij theej txhoj rua tug TSWV kws yog Vaajtswv lawv le txuj kevcai kws muaj tseg lawm.

³⁵Txhua xyoo twg, peb yuav coj tej qoobloo thawj phaum kws peb sau tau, hab thawj phaum txiv kws peb dle lug, coj moog tso rua huv lub Tuamtsev.

³⁶Peb yuav coj peb txhua tug tub hlub moog rua cov povthawj kws nyob huv lub Tuamtsev muab fij rua Vaajtswv lawv le txuj kevcai. Peb tseem yuav coj peb thawj tug mivnyuas nyuj, thawj tug mivnyuas yaaj hab thawj tug mivnyuas tshis moog rua cov povthawj.

³⁷Txhua xyoo twg, peb coj peb thawj phaum nplej kws zum tau ua moov thaus sau qoobloo hab lwm yaam khoom fij kws yog peb tej cawv txiv maab, tej txiv ntoo roj hab txhua yaam txiv ntoo, coj moog rua cov povthawj kws nyob huv lub Tuamtsev. Peb yuav coj tej qoobloo kws peb ua tau huv peb tej teb, ib feem kaum moog rua cov Levis, vim puab muaj cai sau ib feem kaum ntawm peb cov tuabneeg ua teb txhua lub zog.

³⁸Cov povthawj kws yog Aloos cov xeebntxwv nrug nraim cov Levis thaus puab sau ib feem kaum ntawd, hab cov Levis muab ib feem kaum ntawm cov ib feem kaum kws puab sau tau lug ntawd, coj moog ntim rua huv txhaab kuas tau siv huv lub Tuamtsev.

³⁹Cov pejxeem Yixalayees hab cov Levis coj tej qoobloo, cawv txiv maab hab txiv ntoo roj kws suavdlawg muab tuaj, coj moog ca rua huv cov chaav kws rau tej khoom siv huv lub Tuamtsev kws yog cov povthawj, cov zuv roojvaag hab cov hu nkauj huv lub Tuamtsev qhov chaw nyob ua num. Peb yuav tsi laam muab peb tug Vaajtswv lub tsev saib tsi muaj nqes ib zag le.