Read Hmong Njua Nehemis 11 Bible Online

Nehemis 11 - Hmong Njua bible

Nehemis 11

¹Cov thawjcoj moog nyob taagnrho rua huv lub nroog Yeluxalees, hab cov pejxeem kuj tuaj rhu ntawv, kaum yim twg xaiv ib yig moog nyob rua huv lub nroog dlawbhuv kws yog lub nroog Yeluxalees, dlua le cov ca nyob rua tej nroog hab tej zog saab nrau.

²Cov pejxeem suavdlawg qhuas txhua tug kws txaus sab hlo moog nyob huv lub nroog Yeluxalees,

³Cov pejxeem Yixalayees, cov povthawj, cov Levis, cov ua num huv lub Tuamtsev moog nyob lwm lub nroog hab lwm lub zog, hab Vaajntxwv Xalumoos cov tubkhai tej xeebntxwv moog nyob rua huv tej zog kws yog puab cheebtsaam aav. Ntawm nuav yog teev cov pejxeem kws yog thawjcoj nyob huv lub xeev Yudas kws tau moog nyob rua huv lub nroog Yeluxalees tej npe:

⁴Xeem Yudas: Athayas kws yog Uxiyas tug tub hab yog Xakhaliyas tug xeebntxwv. Nwg lwm cov yawmkoob kws yog xaam Amaliyas, Sefatiyas hab Mahalalees kws yog Yudas tug tub Peles cov xeebntxwv.

⁵Ma-axeyas kws yog Npalus tug tub hab yog Kauhauxes tug xeebntxwv. Nwg lwm cov yawmkoob kws yog Haxiyas, Adayas, Yauyalis hab Xakhaliyas kws yog Yudas tug tub Selas cov xeebntxwv.

⁶Peles cov xeebntxwv, muaj plaub puas rau caum yim leej kws nto moo lug nyob huv lub nroog Yeluxalees.

⁷Xeem Npeenyamees: Xalus kws yog Mesulas tug tub hab yog Yau-es tug xeebntxwv. Nwg lwm cov yawmkoob kws yog Pedayas, Kaulayas, Ma-axeyas, Ithiyees hab Yesayas.

⁸Nkanpais hab Xalais kws yog Xalus cov kwvtij txheeb. Cov Npeenyamees kws nyob huv lub nroog Yeluxalees muaj cuaj pua neeg nkaum yim leej.

⁹Yau-ees kws yog Xikhalis tug tub, ua puab tug thawjcoj hab Yudas kws Haxenu-as tug tub kws yog tug lwm thawj kws nyob huv lub nroog ntawd.

¹⁰Cov povthawj: Yauyalis tug tub Yedayas hab Yakhees.

¹¹Xelayas kws yog Hilekiyas tug tub hab yog Mesulas tug xeebntxwv. Nwg lwm cov yawmkoob kws yog Xadaus, Melayaus, hab Ahitus kws yog tug Povthawj Hlub.

¹²Taagnrho cuab kwvtij kws ua num huv lub Tuamtsev nuav, muaj yim pua neeg nkaum ob leeg. Adayas kws yog Yelauhaas tug tub hab yog Pelaliyas tug xeebntxwv. Nwg lwm cov yawmkoob kws yog Amexis, Xakhaliyas, Pasehus hab Makhiyas,

¹³taagnrho muaj ob puas plaub caug ob leeg kws yog thawjcoj ntawm puab txhua yim tuabneeg. Amaxais kws yog Axalees tug tub hab yog Axais tug xeebntxwv. Nwg lwm cov yawmkoob kws yog xaam Mesilemaus hab Imeles.

¹⁴Taagnrho puab cuab kwvtij nuav muaj ib puas neeg nkaum yim leej kws yog cov tubrog nto moo heev. Puab tug thawjcoj yog Xadiyees kws yog Hankedulees tug tub.

¹⁵Cov Levis: Semayas kws yog Hasus tug tub hab yog Axelikas tug xeebntxwv. Nwg lwm cov yawmkoob kws yog Hasanpiyas hab Npunis.

¹⁶Sanpethais hab Yuxanpas, yog ob tug thawjcoj ntawm cov Levis kws saib tej num nyob saab nrau lub Tuamtsev.

¹⁷Mikas tug tub Mataniyas, yog Xanpedis tug xeebntxwv hab yog Axafes caajceg. Nwg ua tug coj cov hu nkauj qhuas Vaajtswv huv lub Tuamtsev. Npanpukiyas yog tug kws paab Mataniyas. Samuas tug tub Anpedas kws yog Nkalas tug xeebntxwv, nwg yog Yeduthoos caajceg.

¹⁸Taagnrho cov Levis kws nyob huv lub nroog dlawbhuv kws yog lub nroog Yeluxalees muaj ob puas yim caum plaub leeg.

¹⁹Cov zuv lub Tuamtsev: Akus, Talemoos hab ob tug cov kwvtij huv tuabsi muaj ib puas xyaa caum ob leeg.

²⁰Dlua le cov pejxeem Yixalayees, cov povthawj hab cov Levis, puab nyob huv puab cheebtsaam aav kws yog puab tej nroog hab tej zog huv xeev Yudas lawm.

²¹Cov kws ua num rua huv lub Tuamtsev, nyob rua ib ceg kaum huv lub nroog Yeluxalees kws hu ua Aufees kws yog muaj Xihas hab Nkisepas obtug, ua ob tug coj puab ua num.

²²Tug thawjcoj ntawm cov Levis kws nyob huv lub nroog Yeluxalees, yog Npanis tug tub Uxis kws yog Hasanpiyas tug xeebntxwv. Nwg cov yawmkoob yog Mataniyas hab Mikas, hab nwg yog Axafes xeebntxwv kws yog cov hu nkauj qhuas Vaajtswv huv lub Tuamtsev.

²³Vaajntxwv yeej muaj txuj kevcai kuas tej cuab kwvtij ntawd tuaj sis hloov coj hu nkauj huv lub Tuamtsev txhua nub.

²⁴Mesexanpees tug tub Pethahiyas kws yog Zelas cuab kwvtij hab nwg yog xeem Yudas, nwg ua num sawv cev vaajntxwv rua cov pejxeem Yixalayees.

²⁵Muaj tuabneeg nyob coob heev huv tej zog kws ze ntawm puab tej teb. Xeem Yudas nyob huv lub nroog Kiliyas Alenpas, Dinpoos, Yekaxees hab huv tej zog kws ze ntawm cov nroog ntawd.

²⁶Hab puab tseem moog nyob huv lub nroog Yesuas, lub nroog Mauladas, lub nroog Npethepeletes,

²⁷lub nroog Haxasuas, lub nroog Npeesenpas hab huv cov zog kws nyob ibncig cov nroog ntawd.

²⁸Puab nyob huv lub nroog Xikelas, lub nroog Mekaunas hab cov zog kws nyob ibncig cov nroog ntawd.

²⁹Nyob huv lub nroog, lub nroog Elimoos, lub nroog Xaulas, lub nroog Yamus,

³⁰lub nroog Xanau-as, lub nroog Adulas hab huv cov zog kws ze cov nroog ntawd. Puab nyob huv Lakhis hab huv tej teb kws nyob ze ibncig ntawd, hab huv lub nroog Axekas hab tej zog kws nyob ibncig ntawd. Cov Yudas moog nyob huv cheebtsaam kws nyob nruab nraab ntawm Npeesenpas saab qaabteb hab lub Haav Hinoos saab qaumteb.

³¹Cov pejxeem kws yog xeem Npeenyamees nyob txij ndlua ntawm Nkenpas saab qaumteb moog txug rua lub nroog Mikhemas, lub nroog A-is, lub nroog Npethees hab cov zog kws nyob ibncig ntawd,

³²Anathaus, Naunpas, Ananiyas,

³³Haxaus, Lamas, Nkithas,

³⁴Hadis, Xenpauyees, Nenpalas,

³⁵Laudis hab Aunaus, nyob huv cov kws Txawj Txua txhua yaam lub Haav.

³⁶Muab cov Levis qee paab kws ibtxwm nyob huv cov Yudas cheebtsaam aav, faib moog nrug cov Npeenyamees nyob lawm.