Read Hmong Njua Nehemis 12 Bible Online

Nehemis 12 - Hmong Njua bible

Nehemis 12

¹Cov povthawj hab cov Levis kws nrug Se-atiyees tug tub Xelunpanpees hab nrug tug Povthawj Hlub Yesuas rov lug muaj npe le nraag nuav:

²Cov povthawj: Selayas, Yelemis, Exalas, Amaliyas, Malukhis, Hatus, Sekaniyas, Lehumes, Melemaus, Idaus, Nkinethau-is, Anpiyas, Miyamees, Ma-adiyas, Npilenkas, Semayas, Yauyalis, Yedayas, Xalus, Amaukes, Hilikiyas hab Yedayas. Cov tuabneeg kws muaj npe sau nuav puavleej yog thawjcoj ntawm puab cov kwvtij kws yog cov povthawj hab nyob rua Yesuas tam.

⁸Cov Levis: Ntawm nuav moog yog has txug cov Levis kws xaiv ua cov hu nkauj qhuas Vaajtswv: Yesuas, Npeenau-is, Kamiyees, Selenpiyas, Yudas hab Mataniyas.

⁹Npanpukiyas, Aunaus, hab obtug cov phoojywg Levis, ua cov hu nkauj kws sawv ncaaj ntawm obtug thaus pehawm Vaajtswv.

¹⁰Yesuas yog Yauyakees txiv, Yauyakees yog Eli-asis txiv, Eli-asis yog Yauyadas txiv;

¹¹Yauyadas yog Yaunathaas txiv,; hab Yaunathaas yog Yaduas txiv.

¹²Thaus kws Yauyakees ua tug Povthawj Hlub, cov povthawj kws muaj npe le nraag nuav, yog cov thawj ntawm puab txhua cuab kwvtij: [Cov povthawj] — [Cuab kwvtij] Melayas — Xelayas Hananiyas — Yelemis Mesulas — Exalas Yehauhanaas — Amaliyas Yaunathaas — Malukhis Yauxej — Senpaniyas Anas — Halimes Helekais — Melayaus Xakhaliyas — Idaus Mesulas — Nkinethoos Xikhalis — Anpiyas… Miniyamees Piletais — Mau-adiyas Samuas — Npilenkas Yehaunathaas — Semayas, Matenais — Yauyalis Uxis — Yedayas Kalais — Xalais Enpes — Amaukes Hasanpiyas — Hilekiyas Nethanees — Yedayas

²²Phoo ntawv nuav yog teev cov Levis cov thawjcoj hab cov povthawj tej tsev tuabneeg tam kws cov Povthawj Hlub tseem ua neej nyob: Eli-asis, Yehauyadas, Yaunathaas, hab Yaduas. Phoo ntawv nuav sau tav rua thaus Dali-us ua fuabtais kaav lub tebchaws Pawxias.

²³Txawm le ntawd los cov Levis cov thawjcoj tej tsev tuabneeg kws muab teev tseg rua huv cov numtswv tej ntaub ntawv, mas tsuas muaj lug txug rua ntu kws Eli-asis tug xeebntxwv Yaunathaas tam xwb.

²⁴Cov Levis cov thawjcoj yog: Hasanpiyas, Selenpiyas, Yesuas, Npeenu-is Kamiyees hab puab cov phoojywg sawv nrug puab sis ncaag zog, qhuas Vaajtswv hab has lug sis law ua nwg tsaug lawv le Vaajntxwv Daviv kws yog Vaajtswv tug tuabneeg tau saamfwm tseg lawm.

²⁵Cov zuv lub Tuamtsev tej chaav rau khoom ntawm cov roojvaag, muaj npe lawv le nraag nuav: Mataniyas, Npanpukiyas, Aunpadiyas, Mesulas, Talemoos hab Akus.

²⁶Cov tuabneeg nuav yog cov kws ua neej nyob thaus Yesuas tug tub Yauyakees kws yog Yauxadas tug xeebntxwv tam, hab yog lub sijhawm kws Nehemis ua tswv xeev, hab Exalas kws yog ib tug povthawj txawj ntse paub txug Vaajtswv txuj kevcai.

²⁷Thaus muab tug ntsaa yeej kws thaiv lub nroog Yeluxalees fij rua Vaajtswv, cov Levis kws nyob txhua qhov tuaj huv tuabsi, puab tuaj koom ua kevcai ua Vaajtswv tsaug nrug tej suab hu nkauj, tej suab nkauj nogncaas hab nruag npuaj.

²⁸Cov Levis kws yog tsev tuabneeg hu nkauj puavleej tuaj ntawm cheebtsaam kws nyob ibncig lub nroog Yeluxalees hab tuaj huv tej zog kws nyob ibncig lub nroog Netaufas,

²⁹hab tuaj huv Npethes Nkilenkas, Nkenkas hab huv lub nroog Axemaves tuaj.

³⁰Cov povthawj hab cov Levis ua kevcai ntxuav puab kuas huv; hab puab ua kevcai ntxuav cov pejxeem, cov roojvaag hab tug ntsaa yeej kws thaiv lub nroog huv tuabsi.

³¹Kuv kuas cov Yudas cov thawjcoj tuaj sis sau rua sau tug ntsaa yeej, hab muab puab faib ua ob paab, ncig moog kuas thoob plawg lub nroog, ua Vaajtswv tsaug. Paab ib pib ntawm saab xis sau tug npoo ntsaa yeej moog rua ntawm lub Roojvaag Quav Hlawv.

³²Thaus cov hu nkauj moog lawm, Hausaiyas hab cov Yudas ib nraab thawjcoj maam moog ua qaab.

³³Cov povthawj kws muaj npe le nraag nuav, yog cov kws tshuab raaj tshuab xyu, puab yog cov tawm moog lawv cov thawjcoj qaab: Axaliyas, Exalas, Mesulas, Yudas, Npeenyamees, Semayas hab Yelemis. Paab kws lawv qaab ntawd yog Yaunathaas tug tub Xakhaliyas kws yog Semayas tug xeebntxwv. (Nwg cov yawmkoob yog: Mataniyas, Mukaiyas, hab Xakus kws yog Axefas xeebntxwv.)

³⁶Nwg tawm moog lawv Semayas, Axalees, Milalais, Nkilalais, Ma-ais, Nethanees, Yudas hab Hananis kws yog nwg cov kwvtij qaab. Puab nqaa tej nkauj nogncaas hab nruag npuaj kws Vaajntxwv Daviv kws yog Vaajtswv tug tuabneeg nyam ntaus nrug puab moog. Exalas kws yog tug txawj ntse ua tug coj paab nuav ntaag.

³⁷Puab pib ntawm lub Roojvaag Qhovdlej, nce ntaiv ntawd moog rua peg Daviv lub nroog, moog dlhau nplawg Daviv lub loog hab rov lug rua ntawm tug ntsaa yeej ntawm lub Roojvaag Qhovdlej kws nyob ntawm lub nroog saab nubtuaj.

³⁸Dlua le lwm paab ntawm cov kws ua Vaajtswv tsaug txawm taug tug ntsaa yeej moog rua saab txhumphem hab kuv txawm lawv cov pejxeem ib nraab ntawd qaab. Peb taug kev moog rua ntawm lub chaw Tsomfaaj Qhovtxus, dlhau moog rua ntawm tug Ntsaa Yeej Dlaav,

³⁹hab peb pib qhov ntawd moog hlaa lub Roojvaag Efalayees, lub Roojvaag Yesanas, lub Roojvaag Ntseg, lub Chaw Tsomfaaj Hananees hab lub Chaw Tsomfaaj Ib Puas, moog txug rua ntawm lub Roojvaag Yaaj. Peb taug moog xaus rua ntawm lub roojvaag kws moog rua huv lub Tuamtsev.

⁴⁰Yog le ntawd, ob paab tuabneeg kws ua Vaajtswv tsaug ntawd puavleej moog txug rua ntawm lub Tuamtsev huv tuabsi lawm. Kuv hab ib nraab thawjcoj kws nrug kuv,

⁴¹kuv paab yog xaam cov povthawj hab cov tshuab xyu muaj lawv le nraag nuav: Eli-akees, Ma-axeyas, Miniyamees, Mikayas, Eli-aunais, Xakhaliyas hab Hananiyas;

⁴²hab paab kws lawv puab qaab yog: Ma-axeyas, Semayas, Ele-axas, Uxis, Yehauhanaas, Makhiyas, Elames hab Exes. Yelahiyas yog tug coj hu nkauj kws suab nrov tshaaj cov huv tuabsi.

⁴³Nub ntawd, puab coj khoom tuaj fij ntau kawg nkaus le, hab cov pejxeem muaj kev zoo sab lomzem heev, rua qhov Vaajtswv ua rua puab muaj kev zoo sab. Cov quaspuj hab cov mivnyuas los tuaj koom ua kevcai hab tej suab kws puab tuaj ua ntawd nrov ntxhe moog dleb heev.

⁴⁴Lub sijhawm ntawd, puab tsaa ib paab txivneej ua cov saib chaav rau khoom kws ntim tej khoom kws cov tuabneeg coj tuaj khaws ca rua huv lub Tuamtsev kws yog ib feem kaum ntawm thawj phaum qoobloo hab txiv maab txiv ntoo kws sav txhua xyoo. Cov txivneej ntawd teg num yog moog sau tej qoobloo huv luas tej teb kws nyob ze ntawm tej nroog, coj tuaj ua khoom fij rua cov povthawj hab cov Levis, lawv le txuj kevcai kws teev tseg lawm. Taagnrho cov Yudas txaus sab rua cov povthawj hab cov Levis,

⁴⁵rua qhov puab yog cov kws ua kevcai ntxuav dlawbhuv hab ua kevcai pehawm Vaajtswv lawv le Vaajtswv tau saamfwm tseg. Cov hu nkauj hab cov zuv lub Tuamtsev, ua puab lub luag num lawv le txuj kevcai kws Vaajntxwv Daviv hab nwg tug tub Xalumoos tau rhawv tseg lawm.

⁴⁶Txij thaus Vaajntxwv Daviv hab Axafes kws yog tug hu nkauj tam yeej muaj cov coj hu nkauj qhuas Vaajtswv hab ua Vaajtswv tsaug lug lawm.

⁴⁷Tam kws Xelunpanpees hab Nehemis ua thawjcoj, mas cov pejxeem naj nub coj puab tej khoom tuaj rua cov hu nkauj hab cov zuv lub Tuamtsev. Cov pejxeem coj tej khoom fij tuaj rua cov Levis, hab cov Levis maam muab feem kws yog cov povthawj le rua cov povthawj.