Read Hmong Njua Nehemis 13 Bible Online

Nehemis 13 - Hmong Njua bible

Nehemis 13

¹Thaus muab Mauxes txuj kevcai nyeem rua cov pejxeem noog, puab nyeem txug qhov kws has tas, tsi tso cai rua cov Amoos hab cov Mau-am tuaj koom nrug Vaajtswv tsaav tuabneeg ua ke.

²Puab ua le nuav, rua qhov cov Amoos hab Mau-am tsi pub zaub mov hab dlej rua cov Yixalayees, thaus kws puab tsiv nraag tebchaws Iziv lug, hab puab tseem muab nyaj moog ndlav Npala-aas kuas foom tsi zoo rua cov Yixalayees. Tabsis peb tug Vaajtswv muab tej lug foom tsi zoo ntawd hloov ua lug koob moov.

³Thaus cov Yixalayees nov le ntawd, ces puab txawm muab cov tuabneeg txawv tebchaws cais taagnrho tawm ntawm cov Yixalayees lawm.

⁴Tug povthawj Eli-asis kws yog tug saib cov chaav rau khoom huv lub Tuamtsev, yeej ua phoojywg zoo nrug Taunpias lug tau ntev lawm.

⁵Nwg tso cai rua Taunpias siv ib chaav luj kws yog ca rau tej khoom fij kws yog qoobloo, tej tshuaj tsw qaab, tej khoom siv rua lub Tuamtsev, tej khoom fij rua cov povthawj, hab tej khoom fij kws yog ib feem kaum ntawm tej qoobloo, cawv txiv maab hab roj txiv ntoo kws muab rua cov Levis, cov hu nkauj hab cov zuv lub Tuamtsev.

⁶Thaus kws muaj tej xwm nuav tshwmsim, kuv tsi nyob huv lub nroog Yeluxalees lawm, rua qhov txug xyoo peb caug ob kws Ataxawxes ua fuabtais nyob huv lub nroog Npanpiloos, mas kuv yuavtsum tau rov qaab moog qha kuv tej num rua nwg. Tom qaab ntawd, kuv txhaj moog thov lug tso cai ncaim vaajntxwv

⁷rov lug rua huv nroog Yeluxalees. Kuv txhaj nov tej kev txhum kws Eli-asis ua, nwg tau tso cai rua Taunpias siv ib chaav tsev rau khoom huv Vaajtswv lub Tuamtsev.

⁸Hab ua rua kuv chim heev, kuv txhaj muab txhua yaam kws yog Taunpias le coj moog povtseg huv tuabsi.

⁹Kuv txhaj saamfwm kuas ca le muab chaav ntawd ua kevcai ntxuav kuas dlawbhuv hab rov moog muab tej khoom siv huv lub Tuamtsev, tej qoobloo kws coj tuaj fij hab tej tshuaj tsw qaab rov lug tso rua huv chaav ntawd.

¹⁰Hab kuv tseem nov xuv has tas, cov hu nkauj huv lub Tuamtsev hab cov Levis ibtxha tau tawm huv nroog Yeluxalees hab rov qaab moog nyob rua huv puab tej teb lawm, rua qhov cov pejxeem coj khoom noj haus tuaj pub tsi txaus rua puab.

¹¹Yog le ntawd, kuv txhaj tshev cov numtswv has tas, “Vim le caag yuav muab Vaajtswv lub Tuamtsev tso tseg?” Hab kuv txhaj has kuas cov hu nkauj hab cov Levis rov lug nyob huv lub Tuamtsev ua puab teg num dlua.

¹²Ces cov Yixalayees txhaj rov pib coj puab tej qoobloo, cawv txiv maab hab txiv ntoo roj ib feem kaum tuaj tso rua huv lub Tuamtsev.

¹³Kuv txhaj tsaa cov tuabneeg kws muaj npe le nraag nuav ua cov saib tej chaav rau khoom ntawd: Selemiyas kws yog ib tug povthawj, Xadaus kws yog ib tug paub txuj kevcai zoo; hab Pedayas kws yog ib tug Levis. Hanas kws yog Xakus tug tub hab yog Mataniyas tug xeebntxwv, ua tug paab puab. Kuv paub hab ntseeg cov txivneej nuav sab has tas puab yuav ua num ncaaj nceeg faib tej khoom ntawd rua suavdlawg.

¹⁴Kuv tug Vaajtswv, thov koj ncu ntsoov tej kws kuv tau ua rua koj lub Tuamtsev kws yog qhov chaw pehawm koj.

¹⁵Lub sijhawm ntawd, kuv tseem pum cov pejxeem huv lub xeev Yudas moog tsu kua txiv maab Nub Xanpataus. Dlua le lwm cov, tseem caab puab tej neeg luav moog thauj nplej, thauj cawv txiv maab, thauj txiv ncuav pas hab lwm yaam khoom lug rua huv lub nroog Yeluxalees; Kuv txhaj ntuag puab kuas tsi xob muag ib yaam khoom dlaabtsi rua Nub Xanpataus hlo le.

¹⁶Muaj ib cov tuabneeg kws nyob peg lub nroog Tiles tuaj nyob huv lub nroog Yeluxalees, puab coj ntseg hab txhua yaam khoom zoo tuaj rua huv lub nroog, ces Nub Xanpataus puab muab tej ntawd muag rua peb cov tuabneeg.

¹⁷Kuv txhaj tshev cov Yudas tej thawjcoj hab has rua puab tas, “Mej sim saib tej kev phem vuabtsuab kws mej ua ntawd saib! Mej ua rua Nub Xanpataus tsi dlawbhuv lawm ntaag.

¹⁸Mej cov yawmkoob tsi tau ua dlua le nuav, hab Vaajtswv tsi tau tso tej kev puamtsuaj lug raug peb hab lub nroog nuav dlua le los? Qhov nuav, yog mej coj kev puamtsuaj lug rua cov Yixalayees, vim mej tau ua tsi huv rua Nub Xanpataus.”

¹⁹Kuv txhaj saamfwm kuas muab tej roojvaag nroog Yeluxalees kaw ua ntej thaus yuav tsaus ntuj, mo kws ua ntej Nub Xanpataus, kuv saamfwm kuas yuavtsum kaw tej roojvaag taagnrho hab tsi xob qheb moog txug thaus kws dlhau Nub Xanpataus lawm. Hab kuv tseem tso kuv cov tuabneeg moog soj tej roojvaag saib puas pum muaj tuabneeg coj khoom lug rua huv lub nroog Nub Xanpataus.

²⁰Tabsis tseem muaj tuabneeg muag txhua yaam khoom tuaj nyob saab nrau ntug nroog Yeluxalees zuv tog ib ob zag ua ntej mo kws yuav txug Nub Xanpataus hab.

²¹Kuv ceebtoom rua puab has tas, “Tsi muaj qaabhau dlaabtsi rua mej tuaj nyob saab nrau ko zuv tog txug taagkig kaaj ntug. Yog has tas, mej tseem pheej ua le nuav ntxiv, kuv yuav rhu nplawm rua mej ntaag.” Txij thaus ntawd lug, Nub Xanpataus puab txawm tsi tuaj le lawm.

²²Kuv tau saamfwm kuas cov Levis moog ua kevcai ntxuav kuas puab huv, moog zuv tej roojvaag kuas zoo txhaj ua rua Nub Xanpataus dlawbhuv. Vaajtswv, thov koj ncu ntsoov kuv, hab thov koj tseg kuv txujsa, rua qhov koj yog tug kws muaj txujkev hlub luj kawg nkaus.

²³Lub sijhawm ntawd, kuv tseem nov has tas muaj cov Yudas coob leej tau moog yuav cov tuabneeg Asedaus, cov Amoos hab cov Mau-am tej ntxhais lug ua quaspuj hab.

²⁴Puab cov mivnyuas ib nraab yeej has lug Asedaus hab has lwm yaam lug lawm xwb, yeej tsi txawj has peb tej lug le lawm.

²⁵Kuv txhaj tshev puab hab foom tsi zoo rua puab, kuv muab qee leej ntaus, hab tsawv puab tej plaubhau caab, kuv has kuas puab tuav Vaajtswv lub npe coglug hab has tas, “Mej tseg tsi xob qua mej tej ntxhais rua puab tej tub, hab tsi xob moog yuav puab tej ntxhais lug rua mej tej tub lossis rua mej yuav ua quaspuj ntxiv lawm.”

²⁶Kuv has rua puab tas, “Tsi yog cov quaspuj kws yog tuabneeg txawv tebchaws nuav ua rua Vaajntxwv Xalumoos poob rua txujkev txhum los? Ntau tsaav tuabneeg yeej tsi muaj ib tug vaajntxwv zoo le nwg. Nwg yog tug kws Vaajtswv hlub, Vaajtswv tsaa nwg ua vaajntxwv kaav cov Yixalayees; txawm le ntawd los cov quaspuj kws yog tuabneeg txawv tebchaws tseem ntxag tau nwg moog ua kev txhum hab.

²⁷Puas tsimnyog ca peb noog mej lug hab xyum ua txhum luj npaum le mej tau tawmtsaam peb tug Vaajtswv kws yog moog yuav cov tuabneeg txawv tebchaws tej ntxhais lug ua quaspuj?”

²⁸Yauyadas tub yog Eli-asis kws yog tug Povthawj Hlub tug tub ntaag. Tabsis Yauyadas ib tug tub tseem moog yuav Xanpalas kws nyob huv lub nroog Npethes Hauloos tug ntxhais lug ua quaspuj hab, yog le ntawd kuv txhaj le muab Yauyadas ntab tawm huv lub nroog Yeluxalees moog lawm.

²⁹Kuv tug Vaajtswv, thov koj ncu ntsoov puab cov ntawd, rua qhov puab tau ua tsi huv rua txuj kevcai ua povthawj, hab tej kws cov povthawj hab cov Levis tau coglug tseg lawm.

³⁰Kuv tau ua kevcai ntxuav puab ntawm txhua yaam kws yog cov tuabneeg txawv tebchaws le; kuv npaaj tau ib txuj kevcai rua cov povthawj hab cov Levis coj, kuas puab txhua tug nyag txhaj paub nyag lub luag num zoo;

³¹Kuv saamfwm kuas npaaj tej tawg ca tau hlawv tej khoom fij rua tej lub sijhawm kws tsimnyog, hab lub sijhawm kws cov tuabneeg suavdlawg coj puab tej qoobloo hab tej txiv ntoo thawj phaum kws sau tau lug tuaj ua khoom fij. Vaajtswv, thov koj ncu ntsoov kuv hab foom koob moov rua kuv!