Read Hmong Njua Nehemis 4 Bible Online

Nehemis 4 - Hmong Njua bible

Nehemis 4

¹Thaus Xanpalas nov has tas, peb cov tuabneeg Yudas taabtom pib txhim khu tej ntsaa yeej dlua tshab, nwg chim heev hab txobthuam peb kawg le.

²Nwg taabmeeg has rua nwg cov tuabneeg hab cov tubrog Xamalis has tas, “Cov tuabneeg Yudas kws txomnyem ntsuav ntawd puab xaav le caag, puab txhaj ua le ntawd? Puab xaav has tas, puab yuav txhim khu lub nroog nuav dlua tshab nua los? Puab xaav has tas, qhov kws puab muab khoom fij yuav paab puab ua teg num ntawd tav kag rua tuab nub nua los? Puab puas yuav muab tau tej tog ntoo hab tej txhais zeb kws kub nyab taag lawm coj lug ua thwvcib khu tug ntsaa yeej nuav?”

³Taunpias kws yog tuabneeg Amoos sawv ntawm nwg ib saab, hab nwg has ntxiv tas, “Tug ntsaa yeej kws puab taabtom khu ntawd, yuav khov npaum twg? tub tsi txaus ib nyuas maa nce rua sau ntshai tub pob lawm!”

⁴Kuv thov Vaajtswv has tas, “Vaajtswv, thov koj nrug nov tej lug kws puab thuam peb ntawd lauj! Thov kuas puab tej lug kws thuam peb ntawd poob rov lug raug puab. Thov ca tubsaab tuaj nyag txhua yaam kws puab muaj, hab thov ca cov tuabneeg txawv tebchaws tuaj nteg puab coj moog rau txim rua huv luas lub tebchaws.

⁵Thov tsi xob zaam tej kev phem kev qas kws puab ua ntawd, hab tsi xob zaam puab tej kev txhum kws puab thuam hab saib tsi taug peb cov kws taabtom txhim khu tug ntsaa yeej nuav.”

⁶Yog le ntawd, peb txhaj le koom teg txhim khu tug ntsaa yeej tuaj sis cob, hab qhov sab tub ua txug nraab lawm, rua qhov cov tuabneeg suavdlawg rau sab ua num kawg le.

⁷Thaus Xanpalas, Taunpias, cov Alav, cov Amoos hab cov Asedaus nov has tas, peb taabtom puab tug ntsaa yeej kws thaiv lub nroog Yeluxalees tav zuj zug, hab tej qhov tawg pleb ntawm tug ntsaa yeej los peb tub muab txhaws yuav taag, mas ua rua puab chim kawg nkaus rua peb.

⁸Yog le ntawd, puab txhaj tuavhuv sis sau tuaj ntaus lub nroog Yeluxalees hab ua kuas muaj kev kub ntxhuv,

⁹tabsis peb thov peb tug Vaajtswv hab tso tuabneeg zuv nruab nub mo ntuj, tawmtsaam puab tsi pub kuas tuaj tau ti peb hlo le.

¹⁰Cov tuabneeg Yudas muaj ib zaaj nkauj kws puab hu has tas, “Peb qaug zug heev hab peb ris nraa nyaav kawg; hab muaj ntau yaam ua luaj rua peb khaws moog povtseg. Nub nua peb yuav ua le caag ua tau tug ntsaa yeej?”

¹¹Peb cov yeebncuab xaav has tas, peb yuav tsi pum puab lossis tsi paub puab tej kev tuavhuv ua tsi zoo rua peb moog txug thaus puab tuaj txuv peb, tua peb hab rhuav peb teg num kuas ua tsi tav.

¹²Tabsis cov Yudas kws nrug peb cov yeebncuab nyob sis xyaw ua ke ntawd, pheej tuaj qha rua peb tsi tseg txug tej kws peb cov yeebncuab tuavhuv yuav tuaj tawmtsaam peb ntawd.

¹³Yog le ntawd kuv txhaj le muab tej cuabyeej ua rog kws yog ntaaj, muv, hab neevnti cob rua cov pejxeem hab muab puab faib lawv le tej xeem moog zuv ntawm tug ntsaa yeej tej ntu kws tseem khu tsi tau tav.

¹⁴Kuv pum has tas, cov pejxeem suavdlawg txhawj kawg, yog le ntawd, kuv txhaj has rua puab hab puab cov thawjcoj hab cov numtswv tas, “Mej tsi xob ntshai peb cov yeebncuab. Mej yuavtsum ncu ntsoov has tas tug TSWV kws yog tug muaj fwjchim luj hab txaus ntshai, nwg yuav ua tug tawmtsaam mej cov yeebncuab paab mej cov kwvtij neejtsaa, mej cov quaspuj mivnyuas hab mej tej vaaj tse.”

¹⁵Peb cov yeebncuab nov has tas, peb tub paub tej kws puab tuav tswvyim ua phem ntawd hab puab paub has tas, Vaajtswv tub kovyeej puab lub tswvyim ua phem ntawd lawm. Ces peb suavdlawg txawm rov moog koom teg txhim khu tug ntsaa yeej dlua.

¹⁶Txij thaus ntawd lug, kuv txhaj muab kuv cov tuabneeg faib ib nraab moog ua num hab ib nraab moog ua tubrog zuv. Kuv muab tej rig tsho hlau rua puab naav, muab muv, muab dlaim thaiv nav ntaaj hab neevnti rua puab. Peb cov thawjcoj puavleej tuaj tom qaab txhawb cov Yudas

¹⁷kws taabtom txhim khu tug ntsaa yeej ntawd tug zug. Puab ua num nyaav kawg le, ib saab teg nqaa pobzeb moog puab tug ntsaa yeej, hab ib saab teg nqaa rawv tej cuabyeej ua rog,

¹⁸hab txhua tug kws txhim khu tug ntsaa yeej, puab puavleej ris ntaaj rawv rua ntawm dluav. Tug txivneej kws tshuab xyu ceebtoom rua suavdlawg, yeej nrug nraim kuv nyob ua ke.

¹⁹Kuv has rua cov pejxeem, cov numtswv hab cov thawjcoj tas, “Peb lub luag num nuav nthuav moog dleb, hab ua rua peb cov tuabneeg kws nyob sau tug ntsaa yeej ib leeg nyob nrug dleb ib leeg heev lawm.

²⁰Yog thaus twg mej nov tshuab xyu, mej ca le sau zog lug nyob ua ib pawg puagncig kuv. Peb tug Vaajtswv yuav paab peb tua peb cov yeebncuab.”

²¹Txhua nub thaus kaaj ntug txoog moog txug thaus tsaus ntuj kws nubqub tawm dlawb vog, peb cov tuabneeg muaj ib nraab ua num nyob rawv sau tug ntsaa yeej hab muaj ib nraab tuav rawv muv sawv nreg nroog faajxwm.

²²Lub sijhawm ntawd, kuv has rua cov tuabneeg has tas kuas txhua tug tuabneeg hab nwg tug tubkhai ca le pw huv lub nroog Yeluxalees, mo ntuj puab paab peb zuv lub nroog hab nruab nub puab ua num.

²³Txawm yog mo ntuj los kuv hab kuv cov phoojywg, kuv cov tubkhai, hab cov tub faajxwm, peb tsi hle peb tej rig tsho le. Peb tuav rawv peb tej cuabyeej ua rog ntawm teg tsi tso tseg le.