Read Hmong Njua Nehemis 6 Bible Online

Nehemis 6 - Hmong Njua bible

Nehemis 6

¹Xanpalas, Taunpias, Nkesees hab lwm paab kws yog peb cov yeebncuab nov has tas, peb khu tau tug ntsaa yeej tav ntum nti tsi muaj ib qhov twg khoob le lawm, tsuas yog peb tseem tsi tau coj cov txag roojvaag moog dlhos rua ntawm cov roojvaag xwb.

²Vim le ntawd, Xanpalas hab Nkesees txhaj tso tuabneeg tuaj has rua kuv, kuas kuv moog ntsib obtug rua huv ib lub zog ntawm cov zog kws nyob huv lub Taj Nraag Aunaus. Qhov nuav tub yog obtug tuavhuv xaav ua phem rua kuv nkaus xwb.

³Kuv txhaj tso tuabneeg moog has rua obtug tas, “Kuv tseem muaj num tseemceeb heev, kuv tuaj ntsib tsi tau meb. Kuv yuav tsi tso kuv teg num tseg, hab ca le tuaj ntsib meb nkaus xwb.”

⁴Obtug tso tuabneeg tuaj has rua kuv txug plaub zag, puavleej has ib yaam nkaus le ntawd, hab txhua zag kuv teb rua obtug los teb ib yaam nkaus le hab.

⁵Ces zag tsib Xanpalas txawm tso kag nwg tug tubkhai tuaj has rua kuv, zag nuav nwg nqaa ib tsaab ntawv tsi nas homthawj rua le.

⁶Tsaab ntawv ntawd has le nuav: “Nkesees has rua kuv tas, muaj ib cov nyuas lug xaiv tsi zoo kws pheej has nyob rua huv cov pejxeem, hab Nkesees has tas, cov lug ntawd yeej muaj tseeb tag, koj hab cov Yudas xaav ntxeev sab, yog le ntawd, mej txhaj le txhim khu tug ntsaa yeej. Hab Nkesees tseem has ntxiv tas, yog koj npaaj sab xaav kuas tsaa koj ua vaajntxwv.

⁷Hab koj tseem tau has kuas cov cev Vaajtswv lug qee leej tshaajtawm rua huv lub nroog Yeluxalees tas, koj yog cov Yudas tug vaajntxwv, zaaj nuav tub nrov moog txug fuabtais lawm. Yog le ntawd kuv has rua koj paub tas, koj hab kuv yuavtsum tau tuaj sis ntsib hab thaam txug zaaj nuav.”

⁸Kuv txhaj khaiv tuabneeg moog has rua Nkesees le nuav: “Tej lug kws koj has taag lug ntawd yeej tsi muaj ib lus tseeb le, koj laam ntxeev lug xwb.”

⁹Puab nrhav kev ua kuas peb ntshai hab tso teg num nuav tseg. Kuv txhaj thov Vaajtswv has tas, “Vaajtswv, taamsim nuav thov koj txhawb kuv tug zug lauj!”

¹⁰Thaus ntawd, kuv txhaj moog saib Delayas tug tub Semayas kws yog Mehetanpees tug xeebntxwv kws nwg yeej tsi muaj cuabkaav yuav tawm tau huv nwg lub tsev hlo le. Nwg has rua kuv tas, “Koj hab kuv yuavtsum tau tsiv moog nkaum rua huv chaav dlawbhuv huv lub Tuamtsev hab muab tej qhovrooj laag huv tuabsi, rua qhov puab npaaj sab yuav tuaj muab koj tua. Txij nuav moog, txhua mo puab yuav tuaj nyaag nrhav koj tua povtseg.”

¹¹Kuv teb nwg has tas, “Kuv tsi yog hom tuabneeg kws yuav nrhav kev tsiv moog nkaum. Koj xaav has tas, kuv yuav moog nrhav chaw nkaum huv lub Tuamtsev, kuas cawm tau kuv txujsa nua los? Kuv tsi ua le ntawd ib zag le.”

¹²Thaus kuv muab zaaj nuav ua tuab zoo xaav lawm, kuv paub has tas, Vaajtswv tsi tau lug has rua Semayas, tabsis yog Xanpalas hab Taunpias obtug ndlav kuas Semayas tuaj ceebtoom le ntawd rua kuv xwb.

¹³Obtug ndlav nwg tuaj tso hemthawj rua kuv kuas kuv moog ua txhum, obtug txhaj le yuav ua tau rua kuas kuv lub koob lub npe puag hab muab kuv txu kuas poob ntsejmuag.

¹⁴Kuv thov Vaajtswv has tas, “Vaajtswv, thov koj ncu ntsoov tej kws Taunpias hab Xanpalas obtug ua, hab rau txim rua obtug. Hab thov ncu ntsoov tug quaspuj Naudiyas kws yog tug cevlug, hab lwm tug cevlug kws pheej nrhav kev ua kuas kuv ntshai ntawd.”

¹⁵Tau tsib caug ob nub tom qaab, teg num kws ua tug ntsaa yeej maam le tav rua nub neeg nkaum ntsib lub hli Elus.

¹⁶Thaus peb cov yeebncuab kws yog cov tebchaws nyob puagncig peb nov has txug tej ntawd, puab poob ntsejmuag kawg le. Rua qhov txhua tug puavleej paub has tas, tej num ntawm tav taag vim yog muaj Vaajtswv ua tug paab.

¹⁷Lub sijhawm ntawd, cov Yudas cov thawjcoj puavleej tau koom teg nrug Taunpias.

¹⁸Muaj cov Yudas coob leej tuaj Taunpias tog, rua qhov nwg yawmtxiv yog Alas tug tub Sekaniyas kws yog tuabneeg Yudas. Dlua le ntawd, nwg tug tub Yehauhanaas tseem yuav Npelekhiyas tug tub Mesulas tug ntxhais ua quaspuj hab.

¹⁹Cov tuabneeg pheej has zum zawg taabmeeg rua ntawm kuv xubndlag has txug Taunpias tej num zoo, hab pheej coj txhua yaam kws kuv tau has moog pav qha huv tuabsi rua Taunpias noog. Hab nwg tseem pheej xaa ntawv tuaj hem kuas kuv ntshai.