Read Hmong Njua Nehemis 8 Bible Online

Nehemis 8 - Hmong Njua bible

Nehemis 8

¹Thaus lub xyaa hli ntuj, cov pejxeem Yixalayees txawm moog nyob taag rua huv puab tej nroog lawm. Lub hlis ntawd nub xab ib, taagnrho suavdlawg txhaj tuaj sis sau ua ke rua huv lub nroog Yeluxalees, ntawm lub tshaav puam kws nyob ntawm lub Roojvaag Dlej saab huv. Puab txhaj thov kuas tug povthawj Exalas kws yog tug kawm paub txuj kevcai kws tug TSWV tau muab cob rua Mauxes, moog nqaa phoo kevcai ntawd tuaj.

²Yog le ntawd, Exalas txhaj nqaa phoo kevcai tuaj rua ntawm qhov chaw kws cov pejxeem tuaj sis sau, tsi has cov quaspuj, cov txivneej hab cov mivnyuas kws luj hab paub qaabhau kws tuaj ntawd.

³Exalas txawm nyeem phoo kevcai rua puab noog ntawm lub tshaav puam kws nyob ntawm lub roojvaag saab huv, thaus kaaj ntug txoog moog txug thaus taav su, hab puab puavleej ua tuab zoo noog.

⁴Exalas sawv sau lub saamthaj kws yeej ua lug npaaj rua tej lub sijhawm kws muaj le ntawd. Matithiyas, Semas, Anayas, Uliyas, Hikiyas, hab Ma-axeyas, yog cov txivneej kws sawv ntawm nwg saab xis; hab Pedayas, Misayees, Makhiyas, Hasoos, Hasenpadanas, Xakhaliyas hab Mesulas, yog cov txivneej kws sawv ntawm nwg saab txhumphem.

⁵Exalas sawv sau lub saamthaj kws sab tshaaj cov tuabneeg, cov pejxeem suavdlawg puavleej tig moog saib nwg. Thaus nwg nthuav hlo phoo ntawv, puab suavdlawg puavleej sawv ntsug taagnrho.

⁶Exalas has tas, “Ua tug Tswv kws yog Vaajtswv tug muaj fwjchim luj kawg nkaus tsaug!” Taagnrho cov tuabneeg suavdlawg puavleej tsaa teg rua sau ntuj hab teb has tas, “Amees! Amees!” Hab puab txawm txhus caug ndlua nyo hau ua ntsejmuag ti nkaus rua huv aav pehawm Vaajtswv.

⁷Ces puab rov sawv ntsug hab nyag sawv ntawm nyag qhov chaw, hab cov Levis kws muaj npe le nraag nuav txhaj lug pav txuj kevcai rua puab noog: Yesuas, Npanis, Selenpiyas, Yamees, Akus, Sanpethais, Haudiyas, Ma-axeyas, Kelitas, Axaliyas, Yuxanpas, Hanas hab Pelayas.

⁸Puab txhais Vaajtswv txuj kevcai hab pav txuj kevcai ntawd qha kuas cov pejxeem paub tseeb.

⁹Thaus cov tuabneeg nov tej kws txuj kevcai ntawd qha kuas suavdlawg ua, puab tu sab hab quaj kawg le. Nehemis kws yog tug tswv xeev, hab Exalas kws yog tug povthawj hab yog tug kws kawm paub txuj kevcai nuav zoo, hab cov Levis kws qha Vaajtswv txuj kevcai, txhaj has rua cov pejxeem tas, “Nub nua yog ib nub kws dlawbhuv rua tug TSWV kws yog mej tug Vaajtswv, yog le ntawd, mej tsi xob tu sab hab tsi xob quaj.”

¹⁰Ces nwg txawm has rua puab tas, “Mej ca le rov moog tsev, noj tej nqaj, haus tej cawv qaab zib hab muab ibtxha pub rua cov tuabneeg kws tsi tau npaaj dlaabtsi noj; rua qhov nub nua yog nub kws dlawbhuv rua peb tug TSWV; hab tsi xob nyuaj sab, vim txujkev zoo sab kws lug ntawm tug TSWV tub txhawb tau mej tug zug lawm.”

¹¹Cov Levis ncig moog thoob plawg cov tuabneeg, has kuas suavdlawg nyob tuabywv hab tsi xob nyuaj sab rua nub dlawbhuv ntawd.

¹²Yog le ntawd, cov pejxeem txhaj le rov moog tsev, hab noj haus tsau npo muaj kev zoo sab hab faib tej kws puab muaj pub rua lwm tug, rua qhov puab totaub zoo txug txuj kevcai kws nyeem rua puab noog ntawd lawm.

¹³Nub tom qaab, txhua tug thawjcoj ntawm txhua cuab kwvtij, nrug cov povthawj hab cov Levis, txawm sis sau ua ke tuaj kawm Vaajtswv txuj kevcai ntawm Exalas.

¹⁴Puab pum has tas txuj kevcai kws tug TSWV muab cob rua Mauxes, yeej qha rua cov Yixalayees kuas yuavtsum nyob huv cov Tsev Pheebsuab moog txug nub kws puab ua kevcai taag lawm.

¹⁵Yog le ntawd, puab txhaj le tshaajtawm tej lug kws has le nraag nuav xaa moog thoob plawg huv lub nroog Yeluxalees, lwm lub nroog hab lwm cov zog has tas, “Suavdlawg ca le nce moog rua peg tej roob, moog luv tej ceg thuv, ceg txiv ntoo roj, ceg ntoo tsw qaab, nplooj toovlaaj, hab lwm yaam ntoo lug ua Tsev Pheebsuab lawv le tej lug kws tau sau tseg rua huv phoo kevcai lawm.”

¹⁶Yog le ntawd, cov tuabneeg txhaj moog luv tej ceg ntoo coj lug ua Tsev Pheebsuab rua sau puab tej tsev txheej sau, rua ntawm puab tej togvaaj togtsev, rua ntawm lub tshaav puam ntawm lub Tuamtsev, hab ua rua ntawm lub tshaav puam kws nyob ntawm lub Roojvaag Dlej hab lub Roojvaag Efalayees.

¹⁷Taagnrho cov tuabneeg kws raug luas nteg moog hab tau rov lug, puavleej ua Tsev Pheebsuab hab moog nyob huv tej tsev ntawd. Suav txij thaus Noos tug tub Yausuas tam lug txug rua lub sijhawm nuav, zag nuav yog thawj zag kws puab ua, txhua tug txaus sab hab zoo sab kawg nkaus le.

¹⁸Thawj nub kws puab pib ua kevcai lug txug rua nub kws ua kevcai xaus, Exalas muab Vaajtswv phoo kevcai nyeem rua cov pejxeem noog txhua nub. Puab ua kevcai tau xyaa nub, nub yim yog nub kws puab xaus lawv le txuj kevcai tau qha tseg lawm.