Read Hmong Njua Nehemis 9 Bible Online

Nehemis 9 - Hmong Njua bible

Nehemis 9

¹Lub hlis ntawd, nub neeg nkaum plaub, cov Yixalayees tuaj sis sau ua ke muab ntaub tsaaj lug naav ua kevcai yoo mov hab tsuab moov aav rua sau puab tej taubhau. Cov Yixalayees cais puab tawm ntawm lwm tsaav tuabneeg, leeg puab tej kev txhum hab tej kev phem kws puab cov yawmkoob tau ua lug lawm.

³Muab tug TSWV kws yog puab tug Vaajtswv txuj kevcai lug nyeem rua puab noog tau peb txoog teev txwm nkaus, hab peb txoog teev tom qaab yog puab leeg puab tej kev txhum, hab pehawm tug TSWV kws yog puab tug Vaajtswv.

⁴Qhov ntawm muaj ib lub saamthaj rua cov Levis, cov kws moog sawv sau yog: Yesuas, Npanis, Kamiyees, Senpaniyas, Npunis, Selenpiyas, Npanis, Hasaneyas, Selenpiyas, Haudiyas, Senpaniyas hab Pethahiyas. Puab tsaa ncauj hlo thov tug TSWV kws yog Vaajtswv.

⁵Cov Levis nraag qaab nuav yog cov kws hu suavdlawg pehawm Vaajtswv: Yesuas, Kamiyees, Npanis, Hasaneyas, Selenpiyas, Haudiyas, Senpaniyas hab Pethahiyas. Puab has tas: “Ca le sawv hab qhuas tug TSWV kws yog mej tug Vaajtswv; Qhuas nwg moog ibtxhis le! Txawm yog tsi muaj ib tug twg pehawm nwg moog rua qhov tsimnyog los peb suavdlawg ca le qhuas nwg lub npe kws zoo kawg nkaus.”

⁶Cov Yixalayees thov Vaajtswv le nraag nuav: “Tug TSWV, koj tuab leeg xwb txhaj yog tug TSWV; Koj yog tug kws tsim lub ntuj hab tej nubqub sau nruab ntug. Koj tsim dlej, aav hab txhua tsaav yaam kws nyob huv dlej hab sau dlaim aav; Hab koj rau sav rau paa rua txhua yaam ntawd. Txhua yaam kws muaj fwjchim sau nruab ntug qhau taubhau pehawm koj.

⁷Tug TSWV kws yog Vaajtswv, koj tau xaiv Anplaas ca hab coj nwg kev tawm huv lub nroog Ules kws nyob huv lub xeev Npanpiloos lug; Koj txhaj muab nwg tis dlua npe tshab hu ua Anplahaas.

⁸Koj pum nwg ua ncaaj nceeg rua koj, hab koj tau coglug rua nwg has tas, koj yuav muab lub tebchaws Kana-aas rua nwg; yog cov Hitis hab cov Amoos lub tebchaws, Cov Pelixes, cov Yenpus hab cov Nkinkasis lub tebchaws, mas yuav yog lub tebchaws kws koj muab rua nwg cov xeebntxwv nyob.

⁹“Koj tub pum peb cov yawmkoob tau tiv kev txomnyem nyob nraag tebchaws Iziv; koj tau nov puab tej suab hu thov paab nyob nraag ntug Dlej Havtxwv Lab.

¹⁰Koj tau ua tej txujci tseemceeb tawmtsaam Falaus, nwg cov numtswv hab cov tuabneeg kws nyob huv nwg lub tebchaws. rua qhov koj yeej paub tej kws puab tsimtxom koj tsaav tuabneeg. Koj tau kovyeej puab txhaj ua rua koj lub koob meej nrov nchaa moo lug lug txug naj nub nua.

¹¹Koj muab dlej havtxwv faib hlo ua kev qhuav qhawv rua koj tsaav tuabneeg taug hab koj coj puab hlaa dlhau moog rua saab aav qhuav tim u. Cov tuabneeg kws caum puab qaab ntawd tog taag rua huv qaab thu dlej ib yaam le lub pobzeb kws tog rua huv qaab thu havtxwv.

¹²Thaus nruab nub koj ua kuas muaj ib tauv fuab lug coj puab kev, hab mo ntuj, koj ua kuas muaj nplaim tawg moog ua puab ntej.

¹³Koj nqeg sau ntuj lug rua sau lub Roob Xinais; koj has lug rua koj tsaav tuabneeg, koj muab txuj kevcai tseeb, kev tswjfwm, tej kaab ke hab tej lug saamfwm cob rua puab.

¹⁴Koj qha kuas puab ceev Nub Xanpataus ua nub tseemceeb, hab koj muab koj txuj kevcai cob rua koj tsaav tuabneeg lug ntawm koj tug tubkhai Mauxes.

¹⁵“Thaus puab tshaib plaab, koj pub mov sau ntuj lug rua puab noj, hab thaus puab nqhes dlej, koj ua dlej txhawv huv pobzeb lug rua puab haus. Koj has kuas puab moog txeeb lub tebchaws kws koj coglug yuav muab pub rua puab nyob.

¹⁶Tabsis peb cov yawmkoob tau ua tuabneeg khaavtheeb, tuabneeg sab tawv, hab tsi kaam ua lawv le koj tej lug saamfwm.

¹⁷Puab tsi noog koj lug, puab tsi ncu qaab txhua yaam kws koj ua taag lug lawm; puab tsi ncu qaab tej txujci kws koj tau ua lug lawm. Thaus puab muaj lub sab khaavtheeb le ntawd, puab txawm xaiv qhov kws ca puab muaj ib tug thawjcoj kws yuav coj puab rov moog ua qhev nyob nraag tebchaws Iziv. Tabsis koj yog tug Vaajtswv kws muaj kev zaam txim; Koj muaj koob moov hab kev hlub, koj tsi chim sai. Koj txujkev taabncuab luj heev; koj yeej tsi tso puab povtseg hlo le.

¹⁸Puab tau puab ib tug mlom kws tug yaam ntxwv zoo le tug mivnyuas nyuj, hab puab has tas, tug ntawd yog tug vaajtswv kws coj puab tawm nraag tebchaws Iziv lug! Tug TSWV, ua caag puab yuav ua rhuav koj luj ua luaj le!

¹⁹Tabsis koj tsi tau muab puab tso povtseg rua nraag taj zeb suabpuam, Vim koj txujkev taabncuab luj heev. Koj tseem tsi tau muab tauv fuab hab tug nplaim tawg kws qha kev rua puab moog nruab nub hab mo ntuj tshem tseg.

²⁰Koj muab koj lub sab zoo qha rua puab, koj muab manas rua puab noj hab muab dlej rua puab haus.

²¹Koj pub rua puab muaj noj tau plaub caug xyoo nraag taj suabpuam, puab tsi tu ncua ib yaam dlaabtsi le, puab tej tsoog tsho yeej tsi ndluag jhab puab tej kutaw yeej tsi mob tsi o le.

²²“Koj coj puab lug ntaus yeej ntau tsaav tuabneeg hab ntau lub tebchaws kws nyob puagncig puab lub tebchaws. Puab tseem moog ntaus yeej lub tebchaws Hesenpoos kws yog Xihoos ua tug kaav, hab txeeb tau lub tebchaws Npasaas kws yog Aunkas ua vaajntxwv kaav.

²³Koj pub rua puab muaj tub muaj ki coob ib yaam le tej nubqub sau nruab ntug, hab koj pub kuas puab muaj yeej hab lug nyob huv lub tebchaws kws koj tau coglug rua puab cov yawmkoob has tas, koj yuav muab rua puab nyob.

²⁴Puab txhaj le moog txeeb tau lub tebchaws Kana-aas; Koj tau ntaus yeej cov tuabneeg kws ibtxwm nyob huv tej tebchaws ntawd. Koj pub rua koj tsaav tuabneeg muaj fwjchim hab ua tau lawv le puab lub sab nyam rua cov tuabneeg hab cov vaajntxwv kws nyob huv tebchaws Kana-aas.

²⁵Koj tsaav tuabneeg txeeb tau tej nroog kws muaj ntsaa yeej thaiv khov kho, lub tebchaws kws aav rog hab zoo qoob, hab tej vaaj tse kws muaj txhua yaam zoo nyob huv, muaj tej qhovdlej kws luas tub khawb tau ca lawm, muaj txiv ntoo roj, txiv ntoo hab tej vaaj txiv maab. Puab tau noj txhua yaam kws puab xaav noj, ua rua puab luj hab rog; puab txaus sab rua txhua yaam zoo kws koj muab pub rua puab lawm.

²⁶“Tabsis koj tsaav tuabneeg tau ntxeev sab hab tsi noog koj lug; Puab tig nrausqaum rua koj txuj kevcai. Puab muab koj cov cevlug kws ntuag puab tua povtseg taag, puab yog koj cov cevlug kws has kuas puab rov qaab lug cuag koj. Puab tau ua rhuav koj ntsejmuag ib zag dlhau ib zag,

²⁷yog le ntawd, koj txhaj ca puab cov yeebncuab tua yeej puab hab tswjfwm puab. Thaus puab raug kev txomnyem, puab thov koj paab, hab koj nyob sau ntuj teb puab. Vim koj muaj txujkev taabncuab luj heev, koj txhaj khaiv ib cov thawjcoj lug paab puab kuas dlim ntawm puab cov yeebncuab.

²⁸Thaus puab muaj kev thaajyeeb lawm, puab rov qaab ua txhum rua koj dlua, koj txhaj le tso puab cov yeebncuab tuaj tua yeej puab. Ces thaus puab leeg txim hab thov koj paab cawm puab, koj nyob sau ntuj, koj nov hab koj tau cawm puab ib zag dlhau ib zag ntawm koj txujkev hlub.

²⁹Koj ntuag kuas puab noog koj tej lug qha, tabsis vim puab khaavtheeb puab txhaj tsi ua lawv le koj tej kevcai, puab yeej paub has tas, yog ua lawv le koj txuj kevcai, yog txujkev kws coj moog tau txujsa. Puab lub sab tawv kawg nkaus hab puab tig nrausqaum rua koj, puab tsi noog koj tej lug.

³⁰Koj ua sab ntev kawg nkaus hab ntuag puab ib xyoos dlhau ib xyoos; koj muab lug rua koj cov cevlug kuas has rua puab, tabsis koj tsaav tuabneeg laag ntseg lawm, yog le ntawd, koj txhaj ca lwm tsaav tuabneeg tuaj tua yeej puab.

³¹Txawm le ntawd los, vim koj txujkev taabncuab kws luj kawg nkaus, koj txhaj tsi tso puab povtseg lossis ca puab raug kev puamtsuaj. Koj yog Vaajtswv tug kws muaj koob moov nplua mag, hab muaj txujkev hlub luj kawg nkaus!

³²“Vaajtswv kws yog peb tug Vaajtswv, koj yog tug zoo tshaaj plawg! Muaj fwjchim luj hab txaus ntshai kawg nkaus! Koj yeej ua ncaaj nceeg lawv le tej lug kws koj tau cog tseg lawm. Txij thaus kws Axilias cov vaajntxwv tuaj tsimtxom peb, txawm ua rua peb raug kev txomnyem lug txug nwgnuav! Thov koj ncu ntsoov has tas, peb cov vaajntxwv, peb cov thawjcoj, Peb cov povthawj hab cov cev koj lug, peb cov yawmkoob, hab peb tsaav tuabneeg puavleej raug kev txomnyem.

³³Qhov kws koj rau txim rua peb ntawd, koj yeej ua yog lawm; Txawm yog peb ua txhum npaum twg los koj yeej ua ncaaj nceeg xwb.

³⁴Peb cov yawmkoob, cov vaajntxwv, cov thawjcoj hab cov povthawj, tsi ua lawv le koj tej kevcai hlo le. Puab tsi noog koj tej lug saamfwm hab tej lug ntuag.

³⁵Koj tau foom koob moov rua puab muaj vaajntxwv kaav koj tsaav tuabneeg thaus puab nyob huv lub tebchaws kws aav rog hab zoo qoob kws koj tau muab pub rua puab; tabsis puab tsi kaam tso puab tej kev txhum tseg hab puab tsi tig rov lug cuag koj.

³⁶Nwgnuav peb ua luas qhev nyob huv lub tebchaws kws koj muab pub rua peb nyob, lub tebchaws nuav aav rog hab zoo qoob heev peb txhaj muaj noj muaj haus.

³⁷Tej kws peb khwv tau huv lub tebchaws nuav, puavleej muab rua cov vaajntxwv kws koj tso tuaj kaav peb vim peb tau ua kev txhum. Puab ua lawv le puab sab nyam rua peb hab peb tej tsaj txhu, hab peb muaj kev nyuaj sab kawg nkaus le.”

³⁸Vim muaj tej xwmtxheej kws tshwmsim nuav mas peb cov pejxeem Yixalayees txhaj tuaj nyob ua ke ntawm nuav sau ib dlaim ntawv coglug pum zoo, hab peb cov thawjcoj, cov Levis hab cov povthawj muab puab tej homthawj nas rua dlaim ntawv ntawd.