Read Hmong Njua Exethaws 1 Bible Online

Exethaws 1 - Hmong Njua bible

Exethaws 1

¹Thaus lub sijhawm ntawd, Xawxes ua vaajntxwv kaav txij ndlua tebchaws Eedias moog txug ndlua tebchaws Sudaas. Nwg kaav ib puas neeg nkaum xyaa lub xeev, thaus ntawd Vaajntxwv Xawxes nyob sau nwg lub zwmtxwv huv lub tuamceeb nroog Susas huv tebchaws Pawxias.

³Xyoo peb kws vaajntxwv kaav tebchaws, nwg txawm npaaj muaj ib rooj noj haus luj rua nwg cov numtswv hab cov thawjtswj, cov Pawxias hab cov Midias tej thawj tubrog, cov tuabneeg kws muaj meejmom hab cov tswv xeev kuj tuaj nyob ntawd huv tuabsi hab.

⁴Ces vaajntxwv txawm qha nwg tej cuabyeej ua rog kws zoo kawg nkaus hab tej khoom kws zoo ci nplaag, rua suavdlawg saib tau rau lub hlis.

⁵Thaus kws dlhau rau lub hlis ntawd lawm, vaajntxwv tseem npaaj dlua ib rooj noj haus rua cov txivneej kws nyob huv lub tuamceeb nroog Susas ntawd noj hab. Cov tuabneeg npluanuj hab cov tuabneeg pluag puavleej tuaj nyob ua ke. Puab tuaj noj haus tau xyaa nub huv vaajntxwv lub loog.

⁶Muaj ib co ntaub paag dlawb hab xav kws yog muab ib txuj xuv paaj zaas tshuaj paajyeeb txuas rua ntawm cov khawb nyaj dlai rua ntawm cov ncej zeb. Hab muaj tej rooj nyob kws yog muab nyaj muab kub ua zoo nkauj heev txawb rua ntawm lub taj tshaav puam kws muab tej txag pobzeb dlawb, txag pobzeb lab txho hab cov plag dleg kws ci zoo nkauj heev pua.

⁷Muab tej khob kub laub cawv rua suavdlawg haus, tej khob ntawd ib lub zoo nkauj tsi thooj ib lub, hab vaajntxwv ua sab dlawb paug muab cawv txiv maab ntau kawg nkaus coj lug rua puab haus.

⁸Vaajntxwv tso plhuav rua puab haus npaum le puab yuav haus taug tsi muaj leejtwg txwv; vaajntxwv has rua nwg cov tubkhai huv nwg lub loog kuas ca puab txhua tug haus kuas txaus lawv le puab sab nyam.

⁹Vasetis kws yog vaajntxwv tug quaspuj kuj npaaj muaj ib rooj noj haus luj rua ib tsoom quaspuj nyob rua huv Vaajntxwv Xawxes lub loog tau noj hab.

¹⁰Thaus puab noj haus moog txug nub xyaa, vaajntxwv haus cawv txiv maab txaus hab zoo sab lawm, nwg txhaj hu nwg cov tubkhai: Mehumas, Npixethas, Hanpaunas, Npithas, Anpathas, Xethaas hab Kalakas kws yog xyaa tug nraug saam kuas lug cuag nwg.

¹¹Nwg saamfwm rua puab kuas moog coj nam Vaajntxwv Vasetis kuas nwg ntoo lub mom kub lug. Nam vaajntxwv yog ib tug quaspuj kws zoo nkauj heev, hab vaajntxwv xaav qha nam vaajntxwv cev txaj zaam kws zoo nkauj heev ntawd rua cov numtswv hab nwg cov qhua suavdlawg saib.

¹²Tabsis thaus cov tubkhai coj vaajntxwv tej lug saamfwm moog has rua nam Vaajntxwv Vasetis, nwg tsi kaam lug. Qhov nuav ua rua vaajntxwv chim heev.

¹³Muaj ib txuj kevcai kws vaajntxwv yuavtsum tau nug cov tub txawg tub ntse saib txuj cai hab tej kevcai lijchoj has tseg le caag. Yog le ntawd, nwg txhaj hu nwg cov tuavxaam kws paub tej kevcai ntawd tuaj saib yuav ua le caag.

¹⁴Cov tuavxaam kws vaajntxwv pheej txeev hu kuas tuaj nrug nwg saablaaj yog: Kasenas, Sethas, Amathas, Talasis, Meles, Maxenas hab Memukaas, puab yog xyaa tug nom kws kaav tebchaws Pawxias hab tebchaws Medias, hab yog cov numtswv kws luj tshaaj cov huv tuabsi.

¹⁵Nwg txhaj has rua cov tuavxaam tas, “Kuv kws yog Vaajntxwv Xawxes, tau muab lug saamfwm rua kuv cov tubkhai kuas moog has rua nam Vaajntxwv Vasetis, tabsis nwg tsi ua lawv le kuv tej lug saamfwm! Mas lawv le txuj kevcai has tseg ne, tsimnyog peb ua le caag rua nwg?”

¹⁶Ces Memukaas txhaj has rua vaajntxwv hab nwg cov numtswv tas, “Nam Vaajntxwv Vasetis tsi yog ua saib tsi taug vaajntxwv tuab leeg xwb, tabsis nwg ua saib tsi taug vaajntxwv cov numtswv hab txhua tug txivneej kws nyob huv lub tebchaws kws vaajntxwv kaav huv tuabsi.

¹⁷Vim qhov kws nam vaajntxwv ua le ntawd, yuav nrov nchaa moog thoob rua txhua tug quaspuj tau nov, ces yuav ua rua puab saib tsi taug puab tej quasyawg, hab puab yuav has tas, ‘Vaajntxwv Xawxes tau saamfwm kuas nam Vaajntxwv Vasetis lug sawv ntawm nwg xubndlag, tabsis nam vaajntxwv tsi kaam lug.’

¹⁸Thaus cov numtswv huv tebchaws Pawxias hab Medias tej quaspuj nov txug zaaj kws nam vaajntxwv ua nuav, ces puab yuav coj moog pav qha puab tej quasyawg ua ntej tsaus ntuj. Ces txhua tug quaspuj kws nyob rua txhua qhov yuav tsi fwm puab cov quasyawg, hab puab cov quasyawg yuav chim heev rua puab cov quaspuj.

¹⁹Yog vaajntxwv txaus sab, thov kuas vaajntxwv tawm ntawv hab muab sau tseg rua huv cov Pawxias hab Medias txuj kevcai tsi pub hloov le, kuas Vasetis tsi xob tau lug cuag Vaajntxwv Xawxes ib zag ntxiv le lawm; hab thov kuas vaajntxwv nrhav dlua ib tug nam vaajntxwv kws zoo tshaaj Vasetis lug nyob Vasetis chaw.

²⁰Yog ua le nuav mas thaus tej pejxeem kws nyob thoob plawg koj lub tebchaws kws luj hab dlaav kawg nkaus tau nov txug zaaj nuav, cov quaspuj txhaj saib taug puab tej quasyawg. Txawm yog tug quasyawg yuav muaj txag npluanuj hab pluag los puab txhaj le saib taug.”

²¹Vaajntxwv hab nwg cov numtswv nyam zaaj tswvyim nuav heev, lawv le Memukaas has ntawd.

²²Vaajntxwv txhaj sau ntawv xaa moog thoob plawg txhua lub xeev, nwg sau xaa moog rua txhua lub xeev lawv le puab tsaav tuabneeg ntawd tej lug kws has tas, kuas txhua tug txivtsev yuavtsum ua tug tswj nwg lub cuab lub yig hab muaj cai ua tug txav txim sab txhua yaam.