Read Hmong Njua Exethaws 2 Bible Online

Exethaws 2 - Hmong Njua bible

Exethaws 2

¹Tom qaab ntawd, vaajntxwv txujkev chim txag lawm, tabsis nwg pheej xaav txug tej kws Vasetis tau ua taag lug hab tsaab ntawv kws nwg tau sau moog tawmtsaam Vasetis ntawd.

²Vaajntxwv cov tuavxaam qee leej kws nwg tso sab tau rua txawm has rua vaajntxwv tas, “Vim le caag koj tsi moog nrhav tej tug nkaujxwb kws zoo nkauj heev?

³Koj ca le tsaa ib cov numtswv kws nyob rua txhua lub xeev kws koj kaav, kuas coj cov hluas nkauj kws zoo nkauj heev tuaj rua huv lub chaw txoos cov hluas nkauj huv lub tuamceeb nroog Susas. Hab koj tso puab rua Henkais kws yog tug nraug saam kws saib cov quaspuj ua tug tsomkwm puab, hab kuas puab muab tshuaj pleev puab kuas puab zoo nkauj.

⁴Tug ntxhais twg yog tug koj nyam tshaaj, koj ca le coj tug ntawd lug ua nam vaajntxwv hloov Vasetis chaw.” Vaajntxwv xaav has tas zaaj nuav yog ib zaaj tswvyim zoo, nwg txhaj ua lawv le ntawd.

⁵Muaj ib tug tuabneeg Yudais npe hu ua Maudekhais kws yog Yais tug tub hab yog Kises hab Sime-is tug xeebntxwv kws yog xeem Npeenyamees, nwg nyob huv lub nroog Susas.

⁶Maudekhais yog ib tug kws raug nteg tuab lub sijhawm thaus Nenpukajnexales kws ua vaajntxwv kaav tebchaws Npanpiloos tau nteg Yehauyakhees kws ua vaajntxwv kaav cov Yudais hab cov pejxeem huv lub nroog Yeluxalees moog.

⁷Exethaws yog Maudekhais ib tug kwvtij tug ntxhais, thaus Exethaws nam hab txiv tuag lawm, Maudekhais sau Exethaws lug ua nwg tug ntxhais, Exethaws lub npe Henplais hu ua Hadasas; nwg yog ib tug ntxhais kws zoo nkauj hab ntxim nyam kawg le.

⁸Thaus vaajntxwv saamfwm hab tshaajtawm moog lawm, ces puab txawm coj tau cov hluas nkauj coob heev tuaj rua huv lub tuamceeb nroog Susas, hab Exethaws yog ib tug kws puab coj tuaj rua huv vaajntxwv lub loog kws yog Henkais ua tug zuv cov hluas nkauj ntawd.

⁹Henkais nyam Exethaws hab hlub nwg kawg le; Henkais txhaj maaj nrooj muab tshuaj lug rua Exethaws pleev hab muab tej zaub mov zoo lug rua nwg noj. Henkais muab qhov chaw kws zoo tshaaj plawg rua Exethaws nyob, hab xyaa tug hluas nkauj kws xaiv tshwjxeeb huv vaajntxwv lub loog lug ua cov tu Exethaws.

¹⁰Exethaws yeej tsi qha rua leejtwg paub has tas, nwg yog tuabneeg Yudais, rua qhov Maudekhais yeej txwv tsi pub nwg qha rua leejtwg paub le.

¹¹Maudekhais naj nub tuaj ncig moog ncig lug ntawm lub tsev halees kws vaajntxwv cov hluas nkauj nyob, noog xuv saib Exethaws puas ua tau zoo hab saib puas muaj xwm dlaabtsi rua Exethaws.

¹²Lawv le kevcai, mas txhua tug hluas nkauj yuavtsum xub tu nwg lub cev ib lub xyoos ua ntej kws coj moog cuag Vaajntxwv Xawxes, thawj rau lub hlis yog pleev tshuaj tsw qaab hab rau lub hlis tom qaab yog pleev cov roj ntoos tsw qaab. Tom qaab ntawd maam le coj cov hluas nkauj ib tug zuj zug moog cuag Vaajntxwv Xawxes.

¹³Thaus kws tug hluas nkauj tawm ntawm lub tsev Halees moog rua huv vaajntxwv lub loog, nwg xaav coj saw hab naav tsoog tsho zoo le caag los yeej tau le.

¹⁴Thaus yuav tsaus ntuj nwg moog cuag vaajntxwv, hab taagkig thaus sawv ntxuv luas coj nwg moog rua lwm lub Halees hab tso rua Sasakas kws yog tug nraug saam saib vaajntxwv cov nam yau ua tug saib. Nwg tsi tau rov moog cuag vaajntxwv ntxiv le lawm, yuavtsum yog vaajntxwv nyam nwg txaus sab hab hu txug nwg npe lawm xwb.

¹⁵Thaus lub sijhawm kws lug txug rua Maudekhais tug yawm laug Anpihais tug ntxhais Exethaws kws Maudekhais sau lug ua nwg tug ntxhais moog cuag vaajntxwv lawm, Exethaws tsi thov ib yaam dlaabtsi le, nwg tsuas naav tej kws Henkais kws yog vaajntxwv tug nraug saam kws zuv cov hluas nkauj ntawd muab rua nwg naav nkaus xwb. Exethaws yog ib tug ntxhais kws leejtwg pum los yeej nyam nwg heev.

¹⁶Thaus coj Exethaws moog cuag Vaajntxwv Xawxes huv nwg lub loog, yog lub kaum hli ntuj kws yog lub hlis Tenpes kws Xawxes ua vaajntxwv kaav tebchaws tau xyaa xyoo lawm.

¹⁷Vaajntxwv nyam Exethaws tshaaj cov hluas nkauj kws tub tau moog cuag vaajntxwv lawm, vaajntxwv nyam hab hlub nwg tshaaj lwm tug ntxhais nkaujxwb huv tuabsi. Vaajntxwv txhaj muab lub mom kub lug rua Exethaws ntoo hab muab nwg tsaa ua nam vaajntxwv hloov Vasetis chaw.

¹⁸Ces vaajntxwv txhaj npaaj ib rooj noj haus luj heev, luas qhuas Exethaws hab caw taagnrho nwg cov numtswv hab cov numtswv kws tuav ntaub ntawv tuaj noj. Hab vaajntxwv tshaajtawm moog rua txhua lub xeev kuas suavdlawg su ib nub hab vaajntxwv muab khoom faib pub rua suavdlawg.

¹⁹Tau tsi ntev vaajntxwv txawm tsaa Maudekhais ua ib tug numtswv saib phaab ntaub ntawv.

²⁰Exethaws yeej tsi tau qha rua leejtwg paub has tas, nwg yog tuabneeg Yudais le. Maudekhais txwv tsi pub nwg qha rua leejtwg, hab Exethaws yeej noog Maudekhais lug, ib yaam le thaus nwg tseem yog mivnyuas ntxhais kws Maudekhais coj nwg lug tu ntaag.

²¹Lub sijhawm kws Maudekhais tau ua ib tug nom nyob ntawm vaajntxwv lub loog, mas muaj Npithanas hab Teles kws yog ob tug nraug saam zuv nyob ntawm ob saab lub roojloog kws moog rua huv chaav kws vaajntxwv nyob. Obtug txawm ntxeev sab rua Vaajntxwv Xawxes hab tuavhuv yuav muab vaajntxwv tua povtseg.

²²Maudekhais nov zaaj ntawd, nwg txhaj moog has qha rua nam vaajntxwv Exethaws, ces Exethaws txhaj coj Maudekhais cov lug moog pav qha rua vaajntxwv paub.

²³Thaus kws tshuaj tau tej xwmtxheej hab paub has tas muaj tseeb lawm, luas txhaj muab ob tug txivneej sab phem ntawd coj moog dlai cejdlaab rua sau tug ncej dlai tuabneeg lawm. Hab vaajntxwv saamfwm kuas muab zaaj nuav sau tseg ca rua huv phoo ntawv kws teev tej xwmtxheej huv nwg lub tebchaws khaws ca.