Read Hmong Njua Exethaws 3 Bible Online

Exethaws 3 - Hmong Njua bible

Exethaws 3

¹Tom qaab tej xwm nuav dlhau lawm, vaajntxwv txhaj muab Hamedathas tug tub Hamaas kws yog Ankas tug xeebntxwv tsaa ua tug nom kws luj dlua lwm tug ntawm vaajntxwv.

²Taagnrho vaajntxwv cov numtswv kws nyob ntawm vaajntxwv lub roojvaag puavleej txhus caug pe hab hawm Hamaas; rua qhov vaajntxwv tau saamfwm kuas txhua tug yuavtsum pe Hamaas. Tabsis Maudekhais tsi kaam txhus caug pe nwg le.

³Ces vaajntxwv cov numtswv kws nyob ntawm vaajntxwv lub roojvaag txhaj nug Maudekhais has tas, “Vim le caag koj tsi kaam ua lawv le vaajntxwv tej lug saamfwm?”

⁴Puab pheej naj nub has los nwg yeej tsi noog puab has le. Maudekhais txhaj qha rua puab has tas, “Kuv yog tuabneeg Yudais, kuv tsi pe Hamaas.” Yog le ntawd, puab txhaj moog pav qha rua Hamaas saib nwg puas pub rua Maudekhais muaj cai ua tau le ntawd.

⁵Thaus Hamaas paub has tas, Maudekhais tsi hawm nwg hab tsi kaam txhus caug pe nwg lawm, nwg chim heev,

⁶hab thaus nwg paub has tas, Maudekhais yog tuabneeg Yudais lawm, nwg tsi yog xaav muab Maudekhais tuab leeg rau txim xwb, nwg tuav tswvyim yuav muab taagnrho cov tuabneeg Yudais kws nyob thoob plawg huv lub tebchaws Pawxias kws Vaajntxwv Xawxes kaav ntawd tua povtseg huv tuabsi hab.

⁷Vaajntxwv Xawxes kaav tebchaws tau kaum ob xyoos rua thaus lub ib hlis ntuj kws yog lub hlis Nixaam, Hamaas txawm saamfwm kuas rhu ntawv xaam noobnyoog (kws puab hu ua “Pulees”) saib nub twg hab lub hlis twg txhaj le zoo caij zoo nyoog rua nwg moog tua cov Yixalayees; puab txhaj rhu ntawv tau rua lub kaum ob hlis ntuj nub kaum peb kws yog lub hlis Adas.

⁸Hamaas has rua Vaajntxwv Xawxes has tas, “Muaj ib tsaav tuabneeg nyob xyaw peb cov pejxeem thoob plawg rua txhua qhov huv koj lub tebchaws nuav. Puab tej kevcai txawv tsi zoo le lwm tsaav tuabneeg tej. Hab puab tsi ua lawv le koj tej kevcai. Yog le ntawd, qhov kws koj ca puab ua neej nyob tsi muaj nqes dlaabtsi rua koj le.

⁹Yog has tas vaajntxwv txaus sab, thov ca le tawm ntawv tso cai muab cov tuabneeg ntawd tua kuas tuag taag huv tuabsi, hab kuv tuamyeem muab peb puas xyaa caum tsib taas nyaj moog tso rua huv vaajntxwv lub txhaab nyaj them rua vaajntxwv cov tuabneeg kws ua num huv lub tebchaws.”

¹⁰Vaajntxwv txawm hle nwg ntiv nplhaib kws siv ua lub homthawj nas tej ntaub ntawv cob rua Hamedathas tug tub Hamaas kws yog Ankas tug xeebntxwv kws yog cov Yudais tug yeebncuab ntawd.

¹¹Vaajntxwv has rua Hamaas has tas, “Kuv muab cov tuabneeg ntawd hab puab tej nyaj txag cob rua koj; koj ca le ua rua puab lawv le koj pum zoo.”

¹²Lub ib hlis ntuj, nub kaum peb, Hamaas hu vaajntxwv cov teev ntawv tuaj, hab kuas puab sau lawv le nwg cov lug saamfwm, muab txhais ua txhua yaam lug le vaajntxwv ibtxwm ua hab muab xaa rua txhua tug tswv xeev, txhua tug thawjcoj hab txhua tug numtswv. Tsaab ntawv nuav sau ua vaajntxwv npe hab muab vaajntxwv lub nplhaib nas homthawj rua.

¹³Cov tuabneeg xaa ntawv xaa tsaab ntawv ntawd ceev heev moog rua txhua lub xeev kws vaajntxwv kaav. Tsaab ntawv nuav has kuas muab cov Yudais, tsi has laug hab hluas, quaspuj hab mivnyuas tua povtseg huv tuabsi rua lub kaum ob hlis, nub kaum peb kws yog lub hlis Adas. Tsi xob hlub leejtwg le, lojxov tua kuas puab tuag taag hab fuab puab tej khoom txhua yaam kuas dlu lug huv tuabsi.

¹⁴Luas xaa tsaab ntawv nuav moog rua txhua lub xeev, ua ib txuj kevcai hab qha rua tsoom pejxeem suavdlawg kuas paub npaaj txhij rua tuab nub ntawd.

¹⁵Thaus muab vaajntxwv cov lug saamfwm tshaajtawm rua suavdlawg paub nyob huv lub tuamceeb nroog Susas lawm, cov tuabneeg xaa ntawv txhaj muab xaa ceev heev moog rua txhua lub xeev. Ces Vaajntxwv hab Hamaas lug nyob tsawg haus cawv; tabsis lub nroog Susas muaj kev tsi sis humxeeb ua ntxhuv nyo.