Read Hmong Njua Exethaws 4 Bible Online

Exethaws 4 - Hmong Njua bible

Exethaws 4

¹Thaus Maudekhais nov tej xuv tsi zoo ntawd, nwg txhawj kawg le, nwg txhaj muab nwg cev rig tsho dlua kag, muab ntaub tsaaj lug npua hab tsuab tshauv rua sau nwg taubhau, hab nwg quaj qw nrov heev moog rua huv plawv nroog.

²Thaus nwg moog txug rua ntawm txujkev kws moog rua huv lub loog. nwg tsi nkaag moog rua huv, rua qhov luas txwv tsi pub ib tug tuabneeg twg kws npua ntaub tsaaj moog rua huv lub loog hlo le.

³Nyob rua huv txhua lub xeev kws vaajntxwv tsaab ntawv tshaajtawm moog txug cov Yudais lawm, puab muaj kev txhawjxeeb quaj ntsuag luj kawg le. Puab txhaj le yoo mov, quaj, nyuaj sab hab puab txhua tug puavleej muab ntaub tsaaj lug npua hab dlaa huv qhov tshauv.

⁴Thaus kws Exethaws cov nkauj qhe hab cov nraug saam lug has qha tej kws Maudekhais taabtom quaj hab ua ntawd rua Exethaws paub, Exethaws mob sab heev. Nwg txhaj nqaa rig tsho moog rua Maudekhais naav, hab muab cov ntaub tsaaj hle povtseg, tabsis Maudekhais tsi kaam txais cov rig tsho ntawd le.

⁵Ces Exethaws txhaj le hu Hathas, tug nraug saam kws vaajntxwv tsaa lug ua Exethaws tug tubkhai kuas lug cuag nwg, hab kuas Hathas moog nug Maudekhais saib yog nwg muaj kev nyuaj sab dlaabtsi hab yog vim le caag.

⁶Hathas txhaj tawm moog cuag Maudekhais huv plawv nroog ntawm txujkev kws moog rua huv vaajntxwv lub loog.

⁷Maudekhais pav txhua yaam kws tshwmsim rua nwg ntawd rua Hathas noog hab has txug cov nyaj kws Hamaas coglug yuav muab npaum twg coj moog tso rua huv vaajntxwv lub txhaab nyaj, yog yuav muab cov Yudais tua kuas tuag taag huv tuabsi.

⁸Hab Maudekhais muab tsaab ntawv saamfwm kws vaajntxwv sau tawm huv lub tuamceeb nroog Susas, kuas muab cov Yudais tua povtseg huv tuabsi ntawd rua Hathas, nqaa moog qha rua Exethaws, hab kuas Exethaws ca le moog cuag vaajntxwv, hab thov vaajntxwv hlub nam vaajntxwv tsaav tuabneeg.

⁹Hathas txhaj rov lug hab pav txhua yaam kws Maudekhais tau has ntawd qha rua Exethaws noog.

¹⁰Ces Exethaws txhaj muab lug rua Hathas rov qaab moog has rua Maudekhais has tas,

¹¹“Taagnrho vaajntxwv cov tubkhai hab cov pejxeem kws nyob huv txhua lub xeev kws vaajntxwv kaav, puavleej paub zoo txug txuj cai nuav, tsi has vaajntxwv cov tuavxaam hab tej pejxeem; yog ib tug txivneej lossis ib tug quaspuj twg, laam moog cuag vaajntxwv kws vaajntxwv tsi tau hu nwg moog, tug ntawd yuavtsum raug tua povtseg. Vim muaj txuj kevcai sau tseg le ntawd lawm; tsuas yog tshwj tug kws vaajntxwv muab nwg tug cwj kub cev rua, tug ntawd txhaj tsi raug tua tuag xwb. Vaajntxwv tub tsi hu kuv moog cuag nwg tau peb caug nub nuav lawm.”

¹²Thaus kws Maudekhais nov tej lug kws Exethaws has ntawd lawm,

¹³Maudekhais kuas puab rov qaab moog teb rua Exethaws has tas, “Tsi xob xaav has tas, koj nyob huv vaajntxwv lub loog ces koj yuav dlim, tsi raug tua tuag le lwm tug tuabneeg Yudais.

¹⁴Yog has tas koj pheej nyob tuabywv tsi quavntsej le nuav mas yuav muaj txujkev paab lug sau ntuj lug hab yuav cawm cov Yudais kuas dlim. Tabsis koj hab koj txiv tsev tuabneeg yuav tuag tu noob nrho. Leejtwg yuav paub, tej zag qhov kws koj tau lug ua nam vaajntxwv rua tej lub sijhawm zoo le nuav, yog lug cawm peb tsaav tuabneeg kuas dlim kev puamtsuaj los kuj tsi paub!”

¹⁵Exethaws teb rov moog rua Maudekhais has tas:

¹⁶“Moog has rua taagnrho cov Yudais kws nyob huv lub nroog Susas tuaj sis sau ua ke, hab ua kevcai yoo mov. Tsi xob noj tsi xob haus ib yaam dlaabtsi peb nub peb mos. Kuv hab kuv cov nkauj qhe los yuav yoo mov ib yaam nkaus le mej hab. Ces tom qaab ntawd kuv yuav moog cuag vaajntxwv, yog has tas kuv ua txhum kevcai, kuv tuag los xijpeem, kuv yeej yuav zoo sab tuag.”

¹⁷Ces Maudekhais txhaj moog ua txhua yaam lawv le Exethaws has rua nwg ntawd.