Read Hmong Njua Exethaws 5 Bible Online

Exethaws 5 - Hmong Njua bible

Exethaws 5

¹Exethaws yoo mov lug txug nub peb, nwg txawm muab nwg cev tsoog tsho nam vaajntxwv lug naav moog sawv ntawm chaav kws nyob huv vaajntxwv lub loog, hab nwg tig xubndlag moog rua ntawm vaajntxwv lub zwmtxwv. Vaajntxwv nyob quastsawg sau nwg lub zwmtxwv tig xubndlag tuaj rua ntawm txujkev kws tuaj rua huv lub loog.

²Thaus vaajntxwv pum nam Vaajntxwv Exethaws sawv ntsug tig tuaj rua ntawm vaajntxwv, vaajntxwv txaus sab rua nwg heev, ces vaajntxwv txawm cev hlo nwg tug cwj kub moog rua Exethaws. Ces Exethaws txhaj txaav zog lug tuav nkaus tug cwj kub ntawd.

³Vaajntxwv nug has tas, “Nam Vaajntxwv Exethaws, koj muaj dlaabtsi? Qha kuv saib koj xaav yuav dlaabtsi, txawm yog koj xaav yuav lub tebchaws kws kuv kaav nuav ib nraab los kuv yeej yuav muab kuas tau rua koj.”

⁴Exethaws teb has tas, “Yog txaus vaajntxwv sab, mo nuav kuv xaav kuas koj hab Hamaas tuaj koom kuv rooj mov kws kuv npaaj rua meb tuaj noj.”

⁵Vaajntxwv txhaj has kuas Hamaas ca le kawgkag tuaj, obtug yuav moog noj Exethaws rooj mov. Yog le ntawd, vaajntxwv hab Hamaas txhaj moog noj Exethaws rooj mov ntawd.

⁶Thaus kws obtug tseem taabtom haus cawv txiv maab, vaajntxwv nug Exethaws has tas, “Qha kuv saib koj xaav yuav dlaabtsi, kuv yuav muab kuas tau rua koj. Txawm yog koj thov yuav lub tebchaws kws kuv kaav nuav ib nraab los kuv yeej yuav txaus sab muab rua koj.”

⁷Exethaws teb has tas, “Tej kws kuv xaav tau hab kuv thov, mas yog le nuav:

⁸Yog vaajntxwv txaus sab, hab yog tej kws kuv thov ntawd hum vaajntxwv sab hab ua kuas kuv tej lug thov ntawd tav, thov kuas pigkig koj hab Hamaas rov qaab tuaj noj dlua kuv ib rooj mov kws kuv npaaj rua koj. Thaus lub sijhawm ntawd kuv maam qha tej kws kuv xaav tau rua koj.”

⁹Thaus Hamaas noj mov taag hab sawv tawm moog lawm, nwg zoo sab kawg le. Tabsis thaus kws Hamaas pum Maudekhais nyob ntawm vaajntxwv lub roojvaag, Maudekhais tsi sawv hawm hab txhus caug pe nwg, ces nwg txawm chim heev rua Maudekhais.

¹⁰Txawm le ntawd los Hamaas ua tag tswj kuas tau nwg lub sab hab taug kev moog tsev lawm. Hamaas txhaj le caw nwg cov phoojywg tuaj rua huv nwg tsev hab kuas Xeles kws yog nwg tug quaspuj lug koom nrug puab.

¹¹Hamaas txawm khaav nwg lub neej kws npluanuj, muaj tub coob, hab qhov kws vaajntxwv muab nwg tsaa ua tug nom luj hab tseemceeb tshaaj vaajntxwv tej numtswv huv tuabsi.

¹²Hab Hamaas has ntxiv tas, “Nam vaajntxwv Exethaws yeej tsi caw leejtwg nrug vaajntxwv moog noj nwg rooj mov le, tsuas yog caw kuv tuab leeg nrug vaajntxwv moog noj xwb, hab nwg tseem caw kuas pigkig kuv rov qaab nrug vaajntxwv moog noj mov dlua hab.

¹³Tabsis tej nuav tsi muaj qaabhau dlaabtsi rua kuv hlo le, yog thaus twg kuv tseem pum Maudekhais kws yog tug tuabneeg Yudais, tuaj nyob ntawm vaajntxwv lub roojvaag.”

¹⁴Ces Hamaas tug quaspuj hab nwg cov phoojywg txawm has rua nwg tas, “Ca le moog txhus ib tug ncej dlai tuabneeg kuas sab tsib caug tshim hab pigkig sawv ntxuv, koj ca le moog thov vaajntxwv muab Maudekhais dlai cejdlaab rua sau tsaiv, koj maam le nrug vaajntxwv moog noj haus zoo sab xwb.” Hamaas txaus sab rua cov lug kws puab has ntawd kawg le. Hamaas txhaj le moog txhus tau ib tug ncej dlai tuabneeg.