Read Hmong Njua Exethaws 6 Bible Online

Exethaws 6 - Hmong Njua bible

Exethaws 6

¹Mo ntawd vaajntxwv pw tsi tsaug zug le, hab nwg has kuas nqaa phoo ntawv kws teev tej xwmtxheej huv lub tebchaws kws nwg kaav ntawd lug hab puab muab nyeem rua nwg noog.

²Puab txawm nyeem tau zaaj kws sau has txug Maudekhais qha txug qhov kws Npithanas hab Teles kws yog vaajntxwv ob tug nraug saam kws zuv chaav tsev vaajntxwv nyob, hab obtug tau ntxeev sab yuav muab Vaajntxwv Xawxes tua povtseg ntawd.

³Vaajntxwv nug has tas, “Peb tub muab yeebkoob hab nqe zug rua Maudekhais qhov kws nwg ua nuav lawm los tsi tau?” Vaajntxwv cov numtswv teb has tas, “Yeej tsi tau muab ib yaam dlaabtsi rua nwg hlo le.”

⁴Vaajntxwv nug ntxiv has tas, “Kuv cov numtswv puas muaj leejtwg tuaj nyob huv lub loog nuav.” Thaus ntawd Hamaas taabtom tuaj txug ntawd lub tshaav puam huv vaajntxwv lub loog; nwg tuaj thov vaajntxwv kuas muab Maudekhais coj moog dlai cejdlaab rua sau tug ncej kws nwg npaaj tau lawm.

⁵Vaajntxwv cov tubkhai teb nwg has tas, “Hamaas nyob ntawm nuav, nwg sawv ntawm tshaav puam tog xaav ntsib koj.” Vaajntxwv has tas, “Moog coj nwg lug huv nuav.”

⁶Yog le ntawd, Hamaas txhaj lug hab vaajntxwv nug nwg has tas, “Muaj ib tug tuabneeg kws kuv xaav muab yeebkoob rua heev, kuv yuav ua le caag txhaj tsimnyog rua tug txivneej nuav?” Hamaas txawm xaav tuabywv has tas, “Tseem yuav muaj leejtwg kws vaajntxwv xaav muab yeebkoob rua tshaaj kuv lawm hab? Tsuas yog kuv tuab leeg lawm xwb.”

⁷Yog le ntawd Hamaas txhaj le teb vaajntxwv has tas, “Muab vaajntxwv lub tsho luj kws vaajntxwv naav lug rua tug txivneej ntawd naav. Muab xauv lug saam rua vaajntxwv tug neeg, muab eeb lug pem hab muab tshaam tswb lug dlai rua.

⁹Ces kuas koj ib tug numtswv kws luj dlua cov muab koj cev tsoog tsho ntev khu rua tug kws koj yuav muab yeebkoob rua ntawd naav, hab muab koj tug neeg rua nwg caij, coj nwg taug kev moog rua huv plawv nroog qw has tas, ‘Tug txivneej nuav yog tug kws vaajntxwv txaus sab muab yeebkoob rua nwg.’ ”

¹⁰Ces vaajntxwv has rua Hamaas has tas, “Koj ca le moog muab cev tsoog tsho ntev hab kuv tug neeg lug ua lawv le koj has ntawd ntaag, hab muab yeebkoob rua Maudekhais tug kws yog tuabneeg Yudais kws nyob ntawm lub roojvaag. Yuavtsum ua txhua yaam kws koj has ntawd rua nwg tsi xob tseg ib yaam le.”

¹¹Yog le ntawd, Hamaas txhaj moog muab cev tsoog tsho ntev hab caab vaajntxwv tug neeg lug, muab cev tsoog tsho ntev khu rua Maudekhais naav hab muab tug txiv neeg rua Maudekhais caij taug kev moog rua huv plawv nroog, hab qw tshaajtawm has tas, “Tug txivneej kws vaajntxwv txaus sab muab yeebkoob rua yog tug nuav ntaag.”

¹²Ces Maudekhais rov lug rua ntawm vaajntxwv lub loog. Tabsis Hamaas ca le muab ntaub npug nwg ntsejmuag, maaj ceev nrooj rov moog tsev, tu sab hab txaajmuag kawg le.

¹³Hamaas pav txhua yaam kws tshwmsim lug rua nwg ntawd rua Xeles kws yog nwg tug quaspuj hab nwg cov phoojywg noog. Ces nwg tug quaspuj hab nwg cov phoojywg kws ntse has rua nwg tas, “Yog thaus pib nuav koj tub tsi yeej Maudekhais kws yog tuabneeg Yudais lawm, ces koj yuav swb nwg xwb, nwg yeej yuav kovyeej koj.”

¹⁴Thaus kws puab tseem taabtom sis thaam le ntawd, ces vaajntxwv cov nraug saam txawm tuaj txug ndlua, hab coj Hamaas ceev nrooj moog noj Exethaws rooj mov.