Read Hmong Njua Exethaws 7 Bible Online

Exethaws 7 - Hmong Njua bible

Exethaws 7

¹Ces vaajntxwv hab Hamaas obtug txhaj rov ua ke moog nrug nam vaajntxwv Exethaws noj mov

²zag ob. Thaus obtug taabtom haus cawv txiv maab, vaajntxwv rov nug Exethaws dlua ntxiv has tas, “Nam Vaajntxwv Exethaws, koj xaav yuav dlaabtsi? Qha rua kuv, kuv yuav muab pub rua koj. Txawm yog koj xaav yuav lub tebchaws kws kuv kaav nuav ib nraab los kuv yeej yuav muab rua koj.”

³Nam Vaajntxwv Exethaws teb has tas, “Vaajntxwv, yog koj txaus sab rua kuv hab txaus sab yuav pub rua kuv tag, mas thov tseg kuv txujsa, hab tseg kuv tsaav tuabneeg txujsa.

⁴Vim kuv hab kuv tsaav tuabneeg tub raug muab muag coj moog tua povtseg kuas puamtsuaj tu noob nrho le lawm. Yog has tas, peb raug muag moog ua tubqhe hab ntxhais qhev xwb, ces kuv yeej ua tuabywv hab tsi tuaj taabkaum koj txug tej ntawd hlo le, tabsis tub yog peb yuav raug tua kuas puamtsuaj taag, kuv txhaj le muab has qha rua koj paub.”

⁵Ces Vaajntxwv Xawxes nug nam Vaajntxwv Exethaws has tas, “Leejtwg yog tug yuav ua le ntawd? Hab tug ntawd nyob qhov twg?”

⁶Exethaws teb has tas, “Peb tug yeebncuab hab tug tuabneeg kws tsimtxom peb, yog tug nyuas Hamaas kws sab phem nuav ntaag!” Hamaas ntshai vaajntxwv hab nam vaajntxwv kawg nkaus

⁷Ces vaajntxwv txawm sawv ntseeg ntawm rooj npautawg vog tawm plawg moog rua nrau vaajntxwv lub vaaj lawm; tabsis Hamaas tseem nyob ntawd thov kuas nam Vaajntxwv Exethaws tseg nwg txujsa, vim Hamaas paub has tas, vaajntxwv yeej yuav rau txim rua nwg txug zaaj nuav xwb.

⁸Thaus kws vaajntxwv rov qaab nraag lub vaaj lug rua huv chaav tsev kws puab haus cawv, nwg pum Hamaas tseem pe khwb rwg ntxig rua sau lub rooj kws Exethaws nyob thov kev taabncuab. Thaus vaajntxwv pum Hamaas ua le ntawd, vaajntxwv txhaj le qw has tas, “Tug nyuas tuabneeg nuav tseem yuav muab nam vaajntxwv yuam taabmeeg rua kuv pum huv kuv lub loog nuav hab los?” Thaus vaajntxwv has le ntawd taagnrho xwb, vaajntxwv cov nraug saam tub muab ntaub qhwv nkaus Hamaas taubhau lawm.

⁹Ces puab cov ntawd tug kws npe hu ua Hanpaunas txawm has tas “Hamaas txhus tau ib tug ncej dlai tuabneeg sab tsib caug tshim rua ntawm nwg tog tsev, yuav ca dlai Maudekhais tug kws tau cawm vaajntxwv txujsa.” Vaajntxwv txhaj has tas, “Ca le coj Hamaas moog dlai rua ntawm tug ncej ntawd ntaag.”

¹⁰Yog le ntawd, Hamaas txhaj le raug coj moog dlai rua sau tug ncej kws nwg txhus ca dlai Maudekhais. Ces vaajntxwv txujkev chim txhaj nqeg lawm.