Read Hmong Njua Exethaws 8 Bible Online

Exethaws 8 - Hmong Njua bible

Exethaws 8

¹Nub ntawd, Vaajntxwv Xawxes muab Hamaas kws yog cov Yudais tug yeebncuab, lub tsev hab tej cuabtxhaj cuabtaam pub huv tuabsi rua nam Vaajntxwv Exethaws. Exethaws txhaj has qha rua vaajntxwv has tas, Maudekhais yog nwg neejtsaa kws txheeb heev, txij thaus ntawd lug vaajntxwv txhaj pub Maudekhais moog cuag tau vaajntxwv.

²Vaajntxwv txhaj hle nwg ntiv nplhaib kws yog nwg lub homthawj (kws nwg muab ntawm Hamaas rov lug) hab muab rua Maudekhais. Hab Exethaws muab Maudekhais tsaa ua tug saib taagnrho Hamaas tej qubtxeeg qubteg.

³Ces Exethaws rov qaab moog thov vaajntxwv dlua ib zag ntxiv; nwg qhau cev hlo ntawm vaajntxwv kutaw thov hab quaj ua kua muag poob dlawb vog. Nwg thov kuas vaajntxwv muab Hamaas kws yog Ankas tug xeebntxwv tej kev npaaj sab kws yuav muab cov Yudais tua kuas puamtsuaj tu noob ntawd txwv tseg.

⁴Ces vaajntxwv txhaj cev nwg tug cwj kub rua Exethaws, ces Exethaws txawm sawv tseeg hab has tas,

⁵“Yog vaajntxwv hlub kuv hab tej lug kws kuv thov ntawd hum vaajntxwv sab, thov vaajntxwv has kuas muab tsaab ntawv kws Hamedethas tug tub Hamaas kws yog Ankas tug xeebntxwv sau xaa moog has kuas muab cov Yudais kws nyob huv lub tebchaws kws vaajntxwv kaav tua povtseg huv tuabsi ntawd rhuav tseg.

⁶Kuv yuav ua le caag nyaj taug saib kuv tsaav tuabneeg raug kev puamtsuaj, hab ca kuv cov neejtsaa raug tua tuag taag?”

⁷Vaajntxwv Xawxes txhaj has rua nam Vaajntxwv Exethaws hab Maudekhais kws yog tuabneeg Yudais has tas, “Kuv tub muab Hamaas lub tsev hab tej cuabtxhaj cuabtaam cob rua Exethaws hab kuv tub has kuas puab muab Hamaas dlai cejdlaab tuag lawm, vim nwg tuav tswvyim muab cov Yudais tua povtseg ntawd.

⁸Meb ca le sau ib tsaab ntawv lawv le meb sab nyam ua vaajntxwv npe hab muab kuv lub nplhaib homthawj nas rua tsaab ntawv ntawd, xaa moog thoob plawg rua cov Yudais. Rua qhov tsaab ntawv kws Hamaas sau kuv lub npe hab muab kuv lub homthawj nas rua ntawd lawm, mas yeej thim tsi tau rov qaab le lawm.”

⁹Ces thaus kws txug lub peb hlis ntuj kws yog hli Xivaas, nub neeg nkaum peb Maudekhais txhaj hu cov numtswv kws ua ntaub ntawv tuaj cuag nwg, hab nwg has kuas puab cov tub sau ntawv sau lawv le kws nwg has rua cov Yudais, hab coj cov numtswv luj kws nyob huv txhua lub xeev hab txhua tug numtswv huv ib puas neeg nkaum xyaa lub xeev kws vaajntxwv ua tug kaav. Yog suav txij ndlua ntawm tebchaws Eedias moog txug ndlua tebchaws Sudaas. Puab sau ua txhua yaam lug lawv le yaam lug kws luas siv nyob huv lub tebchaws ntawd. Hab puab sau ua cov Yudais tej lug rua cov tuabneeg Yudais.

¹⁰Maudekhais txhaj sau tsaab ntawv ntawd ua Vaajntxwv Xawxes npe, muab vaajntxwv lub nplhaib homthawj nas rua, hab muab cov ntawv ntawd rua cov tub xaa ntawv kws caij neeg dlha ceev heev, caij vaajntxwv cov neeg xaa tsaab ntawv ntawd moog.

¹¹Cov lug kws sau rua huv tsaab ntawv nuav vaajntxwv tso ncauj rua cov Yudais kws nyob rua txhua lub nroog, kuas ca le sis sau ua ke hab tiv thaiv puab txujsa. Yog txhua tsaav tuabneeg kws nyob huv txhua lub xeev, tso tubrog tuaj tua cov Yudais hab puab tej quaspuj lossis mivnyuas; kuas cov Yudais ca le tig tua hab rhuav tshem cov yeebncuab ntawd kuas tuag tu noob nrho tsi pub seem ib tug le, hab txeeb puab tej cuabtxhaj cuabtaam moog huv tuabsi.

¹²Nub kws cov Yudais yuav tawmtsaam puab cov yeebncuab nyob thoob plawg rua huv tebchaws Pawxias, yog lub kaum ob hlis kws yog lub hli Adas, nub kaum peb. Nub ntawd yog nub kws Hamaas teem ca tua cov tuabneeg Yudais kuas tuag tu noob.

¹³Puab txhaj muab tsaab ntawv ntawd ua ib txuj kevcai tshaajtawm moog thoob plawg rua txhua tug pejxeem kws nyob rua huv txhua lub xeev kuas nub ntawd cov Yudais txhaj npaaj tau txhij tig rov tawmtsaam puab cov yeebncuab.

¹⁴Vaajntxwv txhaj saamfwm kuas cov xaa ntawv caij vaajntxwv cov neeg dlha ceev heev xaa tsaab ntawv ntawd moog rua txhua qhov chaw. Hab ca le muab tsaab ntawv ntawd nyeem rua cov pejxeem suavdlawg kws nyob huv lub tuamceeb nroog Susas paub.

¹⁵Thaus kws Maudekhais tawm huv vaajntxwv lub loog moog, nwg naav cev tsoog tsho vaajntxwv txaij xav hab txaij dlawb, ntoo lub mom kub hab naav lub tsho ntev kws yog ntaub maag xav. Ces cov tuabneeg kws nyob huv lub nroog Susas qw zoo sab heev.

¹⁶Ces cov Yudais txhaj tau nyob kaaj sab lug, tso sab plhuav hab xyivfaab hlo, vim puab yeej lawm tag.

¹⁷Txhua lub xeev hab txhua lub nroog kws muab vaajntxwv tsaab ntawv moog nyeem rua nov, mas cov Yudais zoo sab heev, hab puab npaaj muaj rooj noj rooj haus luj rua nub kws muaj kev zoo sab ntawd. Hab muaj tuabneeg coob heev ca le kaav xeem lug ua tuabneeg Yudais, rua qhov puab ntshai cov tuabneeg Yudais heev.