Read Hmong Njua Tsiv Dlim 1 Bible Online

Tsiv Dlim 1 - Hmong Njua bible

Tsiv Dlim 1

¹Yakhauj cov tub kws nyag coj nyag quaspuj tubse nrug Yakhauj moog nyob nraag tebchaws Iziv npe hu le nuav:

²Lunpees, Xime-oos, Levis, Yudas,

³Ixakhas, Xenpuloos, Npeenyamees,

⁴Daas, Nathalis, Khas hab Aseles.

⁵Yakhauj tsev tuabneeg kws nwg coj moog muaj xyaa caum leej. Nwg tug tub Yauxej tub xub moog nyob nraag tebchaws Iziv lawm.

⁶Tom qaab ntawd Yauxej txawm tuag lawm, ces taagnrho nwg cov tijlaug, hab cov tuabneeg kws nyob tam ntawd puavleej tuag taag huv tuabsi.

⁷Tabsis puab cov tubki kws yog cov Yixalayees muaj mivnyuas fuamvaam coob nyob puv nkaus tebchaws Iziv.

⁸Tug vaajntxwv tshab kws lug kaav tebchaws Iziv, nwg tsi paub Yauxej.

⁹Nwg has rua nwg cov pejxeem has tas, “Cov Yixalayees fuamvaam coob hab muaj zug heev, nyob tsaam puab ua phem rua peb.

¹⁰Ces thaus muaj tsuv muaj rog tuaj tua peb, puab yuav sau nthwv tuaj yeebncuab tog tua peb, hab puab yuav tsiv tawm huv peb lub tebchaws moog. Peb yuavtsum nrhav kev txuv cov tuabneeg nuav tsi pub kuas puab fuamvaam ntxiv lawm.”

¹¹Yog le ntawd, cov Iziv txhaj khaiv tuabneeg moog yuam cov Yixalayees ua num nyaav kawg nkaus kuas puab poob sab. Cov Yixalayees ua lub nroog Phithoos hab lub nroog Lamexes rau Falaus tej cuabyeej.

¹²Txawm yog cov Iziv yuav quab yuam cov Yixalayees npaum le caag los puab yimfuab fuamvaam coob npaum le ntawd hab rhawv zej zog dlaav zuj zug, ua rua cov Iziv ntshai puab heev.

¹³Cov Iziv yuam cov Yixalayees ua qhev txomnyem ntsuav,

¹⁴hab yuam puab ua cov Iziv tej vaaj tse, tej laj teb hab ua txhua yaam num nyaav, puab tsi hlub cov Yixalayees hlo le.

¹⁵Muaj ib nub cov Iziv tug vaajntxwv has rua ob tug quaspuj kws yog Sifalas hab Puahas kws pheej moog paab cov Henplais tej quaspuj dlaws cev.

¹⁶Nwg has rua obtug tas, “Thaus meb moog paab cov Henplais tej quaspuj dlaws cev, tug mivnyuas twg yog tug tub, meb ca le muab tua povtseg, tabsis tug twg yog tug ntxhais, meb maam le ca nyob.”

¹⁷Tabsis obtug quaspuj ntawd paub ntshai Vaajtswv, obtug txhaj tsi ua lawv le vaajntxwv Iziv has, obtug tsi tua tej mivnyuas tub povtseg.

¹⁸Yog le ntawd, vaajntxwv txhaj tso tuabneeg moog hu obtug tuaj cuag nwg, hab nwg nug obtug has tas, “Vim le caag meb ua le nuav? Vim le caag meb tseem tseg cov mivnyuas tub nyob hab?”

¹⁹Obtug teb has tas, “Cov quaspuj Henplais tsi zoo le peb cov quaspuj Iziv, puab tau mivnyuas sai heev, hab puab tub tau mivnyuas ua ntej wb moog txug lawm.”

²⁰Vim obtug paub ntshai Vaajtswv, Vaajtswv txhaj ua zoo rua obtug hab pub obtug muaj tubki coob.

²¹Cov Yixalayees pheej fuamvaam coob zuj zug hab muaj zug heev.

²²Thaus kawg Falaus saamfwm rua nwg cov pejxeem suavdlawg has tas, “Ca le muab cov Henplais tej mivnyuas tub kws nyavnyuas yug tau lug txhua tug pov rua huv tug Dlej Niles, tabsis tseg cov mivnyuas ntxhais ca.”