Read Hmong Njua Tsiv Dlim 11 Bible Online

Tsiv Dlim 11 - Hmong Njua bible

Tsiv Dlim 11

¹Ces Vaajtswv has rua Mauxes has tas, “Kuv yuav rau txim rua Falaus hab cov Iziv ib zag ntxiv hab. Tom qaab ntawd Falaus yuav tso mej moog. Nwg yuav ntab mej tawm huv nuav moog kuas taag.

²Koj ca le moog has rua cov Yixalayees txhua tug has tas, kuas puab moog thov cov tuabneeg zej zog, tej saw nyaj saw kub.”

³Tug TSWV ua rua cov Iziv fwm cov Yixalayees, ua rua Falaus cov numtswv hab taagnrho cov Iziv suav has tas, Mauxes yog ib tug tuabneeg tseemceeb heev.

⁴Mauxes txawm has rua Falaus has tas, “Vaajtswv has le nuav tas, ‘Thaus ib taag mo kuv yuav lug saib cov Iziv.

⁵Cov Iziv tej tub hlub yuav tuag taagnrho, suav txij le Falaus tug tub hlub moog txug rua tug puj qhev kws zum zeb tug tub hlub. Tej tsaj txhu thawj tug mivnyuas los yuav tuag taag huv tuabsi hab.

⁶Yuav muaj suab quaj suab nyav ntshu nrooj thoob plawg huv lub tebchaws Iziv kws ibtxwm yeej tsi tau muaj dlua lossis yuav tsi muaj ib zag ntxiv le lawm.

⁷Tabsis cov Yixalayees nyob ntsag tu, tub tsi nov ib lub suab dlev tum tej tuabneeg lossis puab tej tsaj txhu le. Ces koj txhaj yuav paub has tas, kuv yog tug TSWV kws tau muab ib yaam lug cais cov Iziv hab cov Yixalayees.’ ”

⁸Mauxes xaus lug has tas, “Taagnrho koj cov numtswv yuavtsum tuaj qhau cev hlo pe kuv hab puab yuav tsaa teg thov kuas kuv coj taagnrho kuv tsaav tuabneeg moog. Tom qaab ntawd kuv maam le tawm moog.” Ces Mauxes npautawg heev ua ntsejmuag dlub txig tawm huv Falaus lub loog moog lawm.

⁹Tug TSWV has rua Mauxes has tas, “Falaus yuav tsi kaam noog koj lug, kuas kuv txhaj tau ua kuv tej txujci rua huv tebchaws Iziv nuav ntxiv.”

¹⁰Mauxes hab Aloos ua tej txujci tseemceeb nuav taabmeeg Falaus, tabsis tug TSWV ua rua Falaus muaj lub sab tawv, nwg txhaj tsi tso cov Yixalayees tawm huv tebchaws Iziv moog le.