Read Hmong Njua Tsiv Dlim 12 Bible Online

Tsiv Dlim 12 - Hmong Njua bible

Tsiv Dlim 12

¹Tug TSWV has rua Mauxes hab Aloos thaus obtug tseem nyob huv lub tebchaws Iziv has tas,

²“Lub hlis nuav yog lub ib hlis ntuj ntawm lub xyoo rua mej.

³Meb ca le has rua cov Yixalayees kuas paub has tas, lub hlis nuav nub xab kaug, kuas ib tug txivtsev twg yuavtsum xaiv ib tug mivnyuas yaaj lossis ib tug mivnyuas tshis npaaj rua nwg tsev tuabneeg.

⁴Yog yim tuabneeg twg tsawg noj tsi taag tug tsaj ntawd, kuas nwg hab yim kws nyob ze nwg koom tua ib tug tsaj, puab yuavtsum ntsuag saib yuav noj taag tug tsaj luaj le caag, hab puab yuavtsum suav puab cov tuabneeg kws noj tug tsaj ntawd huv tuabsi.

⁵Mej muab tug mivnyuas yaaj lossis tug mivnyuas tshis ntawd tua noj, tabsis yuavtsum yog tug kws tsi muaj ib qho phem le; hab yog tug txiv kws muaj noobnyoog ib xyoos xwb.

⁶Ces lub hlis nuav nub kaum plaub thaus tsaus ntuj, taagnrho cov Yixalayees yuavtsum tua cov tsaj ntawd noj.

⁷Kuas puab txhua yim kws tua tsaj noj, muab tej ntshaav tsaj coj lug pleev rua sau hau qhovrooj hab ob tug ncej qhovrooj.

⁸Mo ntawd yuavtsum muab cov nqaj ci noj ntxuag cov ncuav kws tsi xyaw keeb hab noj ntxuag tej zaub ab kuas taag.

⁹Mej yuavtsum tsi xob noj nqaj nyoog lossis muab hau noj, tabsis mej yuavtsum muab ci kheej, tsi xob kaus plaab nyuv hab sab ntsws hlo le.

¹⁰Mej yuavtsum noj kuas taag tsi xob pub seem ib qho moog txug rua taagkig kaaj ntug le; yog mej noj tsi taag, mej ca le muab hlawv huv tuabsi povtseg.

¹¹Mej yuavtsum noj kawgkag kuas taag, rua qhov mej yuav tu nraa sawv kev moog, rau khau hab tuav rawv mej tug paas nreg rua ntawm mej txhais teg. Pluag mo nuav yog mej noj ua Kevcai Hlaa Dlhau fwm kuv kws yog tug TSWV.”

¹²“Mo ntawd kuv yuav moog thoob plawg huv tebchaws Iziv, tua cov Iziv txhua tug tub hlub hab tej tsaj thawj tug mivnyuas kws yog tug txiv kuas tuag taag huv tuabsi, hab rau txim kuas txhua nrho rua cov Iziv tej vaajtswv. Kuv yog tug TSWV.

¹³Tej ntshaav kws mej pleev ntawm qhovrooj yuav ua lub cim, cim mej tej tsev. Thaus kuv pum cov ntshaav ntawd kuv yuav hlaa mej moog hab rau txim rua cov Iziv, kuas mej txhaj tsi raug kev puamtsuaj.

¹⁴Mej ncu ntsoov muab nub nua ua nub tseemceeb rua mej. Mej yuav ua kevcai ncu txug tej kws tug TSWV tau ua rua mej pum taag lug lawm. Mej ua kevcai le nuav moog ibtxhis le.”

¹⁵Tug TSWV has tas, “Mej yuavtsum noj tej ncuav kws tsi xyaw keeb kuas puv xyaa nub. Thawj nub, mej yuavtsum muab tej keeb kws nyob huv tsev povtseg huv tuabsi, yog xyaa nub ntawd leejtwg tseem noj ncuav xyaw keeb, mej tsi xob suav has tas tug ntawd yog kuv tsaav tuabneeg lawm.

¹⁶Thawj nub hab nub xyaa mej yuavtsum kuas suavdlawg tuaj sis sau ua ke suav ua nub dlawbhuv. Tsi pub mej ua ib yaam num dlaabtsi rua ob nub ntawd, tsuas pub mej ua pluag noj pluag haus xwb.

¹⁷Mej yuavtsum muab nub kws mej ua kevcai noj ncuav tsi xyaw keeb nuav teem ua nub kws tseemceeb, rua qhov nub nuav yog nub kws kuv coj mej txhua xeem tawm huv tebchaws Iziv moog. Txhua xyoo rov txug nub nua, mej hab mej cov xeebntxwv yuavtsum ncu ntsoov ua txuj kevcai nuav.

¹⁸Lub ib hlis ntuj, suav txij le mo kaum plaub moog txug mo neeg nkaum ib, mej yuavtsum noj ncuav tsi xyaw keeb.

¹⁹Xyaa nub ntawd tsi pub muaj ib qho keeb nyob huv mej tej tsev hlo le. Txawm yog tsaav tuabneeg Yixalayees lossis lwm tsaav tuabneeg los xij, yog leejtwg tseem noj ncuav xyaw keeb, mej tsi xob suav has tas, tug ntawd yog kuv tsaav tuabneeg lawm.

²⁰Txawm yog mej nyob qhov twg los xij. Mej tsi xob noj tej ncuav kws xyaw keeb le, mej yuavtsum noj tej ncuav kws tsi xyaw keeb xwb.”

²¹Mauxes hu cov Yixalayees cov thawjcoj tuaj ua ke hab has rua puab tas, “Mej txhua tug nyag ca le moog xaiv nyag ib tug mivnyuas yaaj lossis mivnyuas tshis lug rua mej tej tsev tuabneeg tua noj ua Kevcai Hlaa Dlhau.

²²Mej muab ib re nplooj hixauv moog raus rua huv lub phab kws rau cov ntshaav tsaj, hab coj cov ntshaav ntawd moog pleev rua ob tug ncej qhovrooj hab sau hau qhovrooj. Mo ntawd tsi pub mej ib tug twg tawm rua nrau zoov moog txug taagkig kaaj ntug.

²³Thaus tug TSWV lug tua cov Iziv, nwg yuav pum tej ntshaav kws mej pleev rua sau hau qhovrooj hab ob tug ncej qhovrooj, nwg yuav tsi pub tug timtswv kws yog Txujkev Tuag nkaag lug rua huv mej tej tsev tua mej povtseg.

²⁴Mej hab mej cov tubki yuavtsum fwm txuj kevcai nuav moog ibtxhis tsi kawg le.

²⁵Thaus mej moog txug huv lub tebchaws kws tug TSWV coglug muab pub rua mej, mej yuavtsum ncu ntsoov ua txuj kevcai nuav.

²⁶Thaus mej cov mivnyuas nug mej has tas, ‘Tej kevcai nuav lub ntsab yog le caag?’

²⁷Mej yuavtsum pav qha rua puab has tas, ‘Yog txuj Kevcai Hlaa Dlhau kws peb ua tug TSWV tsaug, rua qhov tug TSWV hlaa dlhau peb cov Yixalayees tej vaaj tse moog tua cov Iziv, nwg tua cov Iziv tabsis nwg tseg peb ca.’ ” Ib tsoom pejxeem Yixalayees txawm txhus caug ndlua rua huv aav hab pehawm Vaajtswv.

²⁸Ces puab txawm rov qaab lug tsev hab ua le tug TSWV tau saamfwm rua Mauxes hab Aloos obtug lawm.

²⁹Thaus ib taag mo tug TSWV lug tua cov Iziv cov tub hlub tuag taagnrho, suav txij le Falaus tug tub hlub, tug kws yuav lug nyob sau lub zwmtxwv lug txug rua cov tuabneeg raug txim kws nyob huv qhov tsaus ntuj cov tub hlub; hab taagnrho tej tsaj txhu thawj tug mivnyuas kws yog tug txiv puavleej raug tua tuag taag huv tuabsi.

³⁰Mo ntawd Falaus, nwg cov numtswv hab taagnrho cov Iziv sawv lug quaj nyav ntshu nrooj, rua qhov puab tej tub hlub tuag taag huv tuabsi lawm.

³¹Mo ntawd Falaus khaiv tuabneeg moog hu Mauxes hab Aloos tuaj cuag nwg, nwg has rua obtug tas, “Meb hab cov Yixalayees ca le tsiv tawm huv peb lub tebchaws nuav moog pe tug TSWV lawv le mej thov kuv.

³²Mej ca le caab mej tej yaaj, tej tshis hab tej nyuj moog kuas taag. Meb thov Vaajtswv foom koob moov rua kuv hab.”

³³Cov Iziv txhib ceev nrooj kuas cov Yixalayees ca le tsiv tawm huv puab lub tebchaws hab has tas, “Yog mej tsi tawm mas peb yuav tuag taag le lauj!.”

³⁴Cov Yixalayees txhaj le muab tej moov nplej tsi xyaw keeb kws puab tub muab ntse tau lawm qhwv rua huv tej khaub dluag hab kwv sau xubpwg moog.

³⁵Puab ua txhua yaam lawv le Mauxes tub has rua puab lawm, puab thov cov Iziv tej nyaj, tej kub hab tej tsoog tsho nqaa moog huv tuabsi.

³⁶Tug TSWV ua rua cov Iziv fwm cov Yixalayees heev, puab txhaj muab puab tej nyaj tej kub rua cov Yixalayees lawv le cov Yixalayees thov. Yog le ntawd, cov Yixalayees txhaj sau cov Iziv tej nyaj txag coj nrug puab moog.

³⁷Cov Yixalayees tawm huv lub nroog Lamexes moog rua nraag lub nroog Xukaus. Cov txivneej muaj kwvyees le rau pua txheeb leej, tsi xaam cov quaspuj hab cov mivnyuas.

³⁸Muaj lwm tsaav tuabneeg coob heev nrug puab moog hab, puab caab yaaj, caab tshis hab caab nyuj coob ua npoj ntwg nrug puab moog.

³⁹Puab muab tej moov nplej tsi xyaw keeb kws puab tub muab ntse tau huv tebchaws Iziv lawm coj lug cub ua ncuav noj, rua qhov cov Iziv ntab puab tsiv tawm sai heev, puab npaaj tsi yeej tej ncuav kws xyaw keeb hab tej khoom noj le.

⁴⁰Cov Yixalayees nyob huv lub tebchaws Iziv tau plaub puas peb caug xyoo.

⁴¹Thaus txug nub kws txwm nkaus plaub puas peb caug xyoo, txhua xeem kws yog tug TSWV tsaav tuabneeg txawm tawm huv tebchaws Iziv moog.

⁴²Thaus ib taag mo tug TSWV coj cov Yixalayees tawm huv tebchaws Iziv moog. Cov Yixalayees txhaj muab mo ntawd lug zuv mo, hab ua kevcai ncu txug tug TSWV ib tam dlhau rua ib tam.

⁴³Tug TSWV has rua Mauxes hab Aloos obtug tas, “Ntawm nuav yog ua Kevcai Hlaa Dlhau: Tsi pub cov tuabneeg txawv tebchaws noj rooj mov ua Kevcai Hlaa Dlhau nuav,

⁴⁴tabsis txhua tug tubqhe kws mej yuav lug, yog mej tub muab ua kevcai txav tawv lawm, tug ntawd noj tau.

⁴⁵Tabsis tug tuaj ua qhua lossis tug tuaj nrhav zug kws lug su huv mej tsev, mej tsi xob pub nrug mej noj.

⁴⁶Pluag mo nuav nyag yuavtsum noj huv nyag tsev xwb, tsi xob nqaa tej nqaj tawm moog noj nrau zoov. Hab mej tsi xob muab tug tsaj ntawd tej pobtxhaa luv le.

⁴⁷Cov Yixalayees txhua tug yuavtsum tuaj koom ua txuj kevcai nuav,

⁴⁸tabsis tsi pub cov txivneej kws tsi tau ua kevcai txav tawv noj rooj mov nuav le. Yog cov tuabneeg txawv tebchaws kws nrug mej nyob tug twg xaav nrug mej koom ua Kevcai Hlaa Dlhau ua tug TSWV tsaug, mej yuavtsum xub muab nwg tsev tuabneeg txhua tug txivneej ua kevcai txav tawv tsaiv, mej maam le pub nwg nrug mej noj. Nwg yuavtsum ua kevcai txav tawv ib yaam le tug kws yug huv tsev tuabneeg Yixalayees.

⁴⁹Cov Yixalayees hab cov tuabneeg txawv tebchaws kws lug nrug mej nyob, suavdlawg yuavtsum coj txuj kevcai nuav.”

⁵⁰Cov Yixalayees txhua tug puavleej ua lawv le tej lug kws tug TSWV has rua Mauxes hab Aloos obtug.

⁵¹Nub ntawd yog nub kws tug TSWV coj cov Yixalayees txhua xeem tawm huv tebchaws Iziv moog.