Read Hmong Njua Tsiv Dlim 14 Bible Online

Tsiv Dlim 14 - Hmong Njua bible

Tsiv Dlim 14

¹Ces tug TSWV has rua Mauxes has tas,

²“Koj ca le kuas cov Yixalayees rov qaab moog tsuam chaw su rua ntawm Pis Hahilaus nyob huv ntu nruab nraab ntawm Midaules hab Havtxwv Lab kws nyob ze Npa-aas Xefoos.

³Falaus xaav has tas, cov Yixalayees yuav moog moog lug lug tom taj suabpuam hab nrhav tsi tau kev hlaa taj suabpuam tawm moog.

⁴Kuv yuav ua kuas Falaus muaj lub sab tawv, hab nwg yuav caum mej qaab tuaj, qhov kws kuv yeej Falaus hab nwg tej tubrog, yuav ua rua kuv tau koob meej. Cov Iziv yuav paub has tas, kuv yog tug TSWV.” Cov Yixalayees ua lawv le tug TSWV tej lug kws has rua puab lawm.

⁵Thaus muaj tuabneeg moog qha rua Falaus has tas, cov Yixalayees tsiv taag lawm, nwg hab nwg cov numtswv hloov dlua sab hab has tas, “Ua caag peb laam ua le nuav? Peb txawm tso cov Yixalayees tsiv taag, hab peb tsi tau puab lug ua qhev le lawm!”

⁶Falaus txhaj txhij tubrog hab tej tsheb neeg caij ntaus rog nrug nwg moog caum cov Yixalayees qaab.

⁷Nwg kuas cov thawj tubrog caij rau pua lub tsheb neeg caij ntaus rog kws zoo kawg nkaus, hab lwm yaam tsheb caij ntaus rog nrug nwg moog hab.

⁸Tug TSWV ua rua Falaus muaj lub sab tawv, hab nwg txawm moog caum cov Yixalayees kws muaj Vaajtswv ua tug tsomkwm puab.

⁹Cov Iziv cov tubrog caij neeg, hab cov tubrog tsaav tsheb neeg tuaj caum cov Yixalayees qaab. Puab tuaj caum cuag cov Yixalayees ntawm ntug Havtxwv Lab, qhov chaw kws puab tsuam chaw su hab ze rua ntawm Pis Hahilaus hab Npa-aas Xefoos.

¹⁰Thaus cov Yixalayees pum Falaus hab nwg cov tubrog caum tuaj yuav cuag, mas puab ntshai kawg le, puab txhaj quaj zum zawg thov tug TSWV paab puab.

¹¹Puab ywg Mauxes has tas, “Nyob tom tebchaws Iziv tsi muaj toj ntxaas lawm los? Koj txhaj coj peb lug tuag rua huv taj suabpuam nuav puas yog? Ua caag koj tseem coj peb tawm huv tebchaws Iziv lug ua dlaabtsi hab?

¹²Peb tub has rua koj thaus tseem nyob tom tebchaws Iziv lawm has tas, ‘Ca peb nyob tuabywv; peb zoo sab ua cov Iziv qhev nua ne!’ Peb ua cov Iziv qhev zoo dlua peb tuag taag rua huv taj suabpuam nuav.”

¹³Mauxes ua tuab zoo has rua puab has tas, “Mej tsi xob ntshai! Mej ca le nyob tuabywv saib nub nua tug TSWV yuav paab mej le caag; mej yuav tsi pum cov Iziv nuav ib zag ntxiv le lawm.

¹⁴Tug TSWV yuav paab mej tawmtsaam, mej ca le ua tuabywv.”

¹⁵Tug TSWV has rua Mauxes has tas, “Vim le caag mej yuav quaj thov kuv paab? Kuas cov tuabneeg ca le txaav moog lawm tom ntej.

¹⁶Muab koj tug paas nreg tsaa rua sau nplaim dlej havtxwv. Dlej yuav faib rua ob saab, cov Yixalayees txhaj yuav tau taug kev aav qhuav qhawv moog lawm saab tim u.

¹⁷Kuv yuav ua rua cov Iziv muaj lub sab tawv, kuas puab caum mej qaab, hab kuv yuav tau koob meej lug ntawm qhov kws kuv yeej Falaus, nwg cov tubrog, nwg tej tsheb neeg hab nwg cov tubrog tsaav tsheb neeg.

¹⁸Thaus kuv kovyeej puab lawm, cov Iziv txhaj yuav paub has tas, kuv yog tug TSWV.”

¹⁹Tug TSWV tug timtswv kws moog ua cov tubrog Yixalayees ntej, txaav tuaj tom qaab lawm. Tauv fuab txawm tshem lug thaiv

²⁰nruab nraab ntawm cov tubrog Iziv hab cov Yixalayees. Tauv fuab ua rua cov tubrog Iziv saab tsaus ntuj nti, tabsis ua rua cov Yixalayees saab pum kev kaaj nrig, hab ua rua ob tog txaav tsi tau lug sis ze ib mos.

²¹Mauxes tsaa teg rua sau tug dlej havtxwv, tug TSWV tso cua tuaj saab nubtuaj tuaj ntsawj havtxwv ib mos kaaj ntug ua rua dlej havtxwv faib hlo rua ob saab ua kev qhuav qhawv,

²²hab cov Yixalayees taug kev aav qhuav qhawv huv plawv havtxwv moog rua saab tim u, muaj dlej nphau nphwv thaiv ob saab.

²³Cov tubrog Iziv, tej neeg, tej tsheb neeg hab cov tuabneeg tsaav tsheb neeg, caum cov Yixalayees qaab tuaj rua huv havtxwv.

²⁴Thaus kaaj ntug txoog tug TSWV nyob huv cov nplaim tawg hab huv tauv fuab saib cov tubrog Iziv hab ua rua cov tubrog Iziv ntshai ua ib ce tshee nyo.

²⁵Hab nwg ua rua puab tej lug tsheb neeg ndlog tsi taug, puab sis thaam zum zawg has tas, “Peb ca le tsiv rov qaab tsi xob caum cov Yixalayees, rua qhov tug TSWV paab puab tawmtsaam peb lawm.”

²⁶Ces tug TSWV has rua Mauxes has tas, “Koj ca le tsaa koj txhais teg rua sau dlej havtxwv, kuas dlej nphau lug npug cov Iziv, puab tej tsheb hab cov tuabneeg tsaav tsheb huv tuabsi.”

²⁷Mauxes txawm tsaa teg rua sau dlej havtxwv, thaus kaaj ntug ua cav dlej rov ntum nkaus le qub. Cov Iziv tsiv taag zug kuas dlim, tabsis tug TSWV muab puab pov rua huv havtxwv.

²⁸Dlej nphau lug npug tej tsheb neeg, cov tuabneeg tsaav tsheb neeg, hab cov tubrog Iziv kws taabtom tuaj caum cov Yixalayees txug huv plawv havtxwv tuag taag tsi seem ib tug le.

²⁹Tabsis cov Yixalayees taug kev qhuav qhawv huv havtxwv moog rua saab tim u, muaj dlej nphau nphwv ntawm ob saab ntug kev.

³⁰Nub ntawd tug TSWV paab cov Yixalayees dlim ntawm cov Iziv txhais teg, cov Yixalayees pum cov Iziv tuag ua saab ua sua lawv ntug havtxwv.

³¹Thaus cov Yixalayees pum tug TSWV lub fwjchim kws nwg yeej cov Iziv, cov Yixalayees ntshai kawg, puab muab sab npuab tug TSWV hab ca sab rua Mauxes tug kws yog tug TSWV tug tubkhai.